Deuteronomi
TE FAAITOITO A TE PǓPǓ TAHUˈA I TE TAATA IA HAERE I TE TAMAˈI.
20 Ia haere oe e aro i to mau enemi i te tamaˈi, e ite atura oe i te puaahorofenua, e te pereoo, e te taata rahi roa e iti oe ra, eiaha e mǎtaˈu ia ratou: tei ia oe hoi to oe ra Atua o Iehova, o tei aratai mai ia oe mai te fenua maira mai Aiphiti. 2 E ia fatata oe i te aro ra, ei reira te tahuˈa e haere mai ai i pihaiiho i te taata atoa, 3 a na ô mai ai ia ratou, E faaroo mai, e Iseraela e! ua fatata outou i te aro i to outou mau enemi i teie nei mahana, eiaha roa e taiâ te aau, eiaha e mǎtaˈu; eiaha e rurutaina, eiaha e aehuehu noa ˈtu ia ratou: 4 te haere atoa nei hoi to outou Atua ra o Iehova, e aro i ta outou tamaˈi i to outou mau enemi, e ei faaora ia outou.
5 E na te feia toroa ra e parau atu i te taata atoa ra, a na ô atu ai, O vai te taata i faatia na i te fare apî, e aita i faaavari i taua fare ra? e hoˈi oia e haere i taua utuafare no ˈna ra, o te pohe hoi oia i te tamaˈi, e na te tahi taata ˈtura e faaavari. 6 O vai te taata i tanu na i te ô vine, e aore â i faaavari i to taua ô ra? e hoˈi oia, e haere i te utuafare, o te pohe hoi oia i te tamaˈi, e na te tahi taata ê atura e faaavari. 7 O vai te taata i momoˈa na i te vahine, e aore â i faaipoipo i taua vahine ra? e hoˈi oia e haere i to ˈna utuafare, o te pohe hoi oia i te tamaˈi, e na te tahi taata ê atura e faaipoipo ia ˈna. 8 E parau faahou â hoi te feia toroa i te taata, e na ô â ratou, O vai te taata i mǎtaˈu, e ua tarapape te aau? e hoˈi oia, e haere i te utuafare, o te tarapape atoa hoi te aau o tana mau taeae, mai to ˈna atoa ra aau. 9 E ia faaoti aˈera ta te feia toroa ra parauraa i te mau taata, ei reira e faataahia ˈi te mau raatira no te mau pǔpǔ ra, ei na mua i te mau taata ra.
10 Ia haere oe i pihaiiho i te hoê oire e aro ra, ei hau ta oe e hopoi atu: 11 e ia hopoi mai taua oire ra i te parau hau ei motoi mai i ta oe ra, e ia iriti mai i te mau uputa ra ia riro te mau taata atoa i roto i taua oire ra ei tavini no oe, e ei aufau mai i te taoˈa na oe i reira. 12 Ia ore roa râ ia faatia mai i te hau na oe ra, e aro mai â ia oe, e rave oe i te reira e aro: 13 e ia tuuhia mai e to Atua ra e Iehova taua oire ra i to rima, e tairi oe i te mau tane atoa i roto ra i te ˈoˈe; 14 area te mau vahine, e te tamarii, e te mau puaa, e te mau mea atoa i roto i taua oire ra, te mau taoˈa atoa ra, e rave oe i te reira na oe iho; e amu hoi oe i te maa na to mau enemi i pau ra, ta to Atua ta Iehova i horoa mai na oe ra. 15 E na reira oe i te mau oire i te atea ê ra, e ere i te mau oire no teie nei mau nunaa. 16 Area to teie nei feia mau oire, ta to Atua ta Iehova e horoa mai no oe ei parahiraa, eiaha roa te hoê mea e huti i te aho e vaiiho-ora-hia e oe; 17 e rave haapau roa râ oe ia ratou; oia te ati Kanaana ra, e te ati Amori, e te ati Heta, e te ati Perezi, e te ati Hevi, e te ati Iebusi; ta to Atua ra ta Iehova i faaue mai ia oe ra; 18 o te haapii mai ratou ia outou ia rave atoa outou i ta ratou mau mea faufau i ravehia e ratou i to ratou ra mau atua, hara ˈtura outou i to outou Atua ia Iehova ra.
19 Ia maoro oe i te tamaˈiraa ˈtu i te hoê oire, i te aroraa ˈtu ia pau, eiaha oe e tâpû i te mau raau maa i te opahi, e riro hoi oe i te amu i te reira, eiaha oe e tâpû i te reira i taua aroraa ra; na te taata hoi te mau raau maa o te fenua nei, ei maa i te aroraa. 20 O te mau raau ra ta oe i ite ra e, e ere i te raau maa, o te reira anaˈe ra ta oe e tâpû e e haapau, ei ravea na oe i te aroraa i taua oire e tamaˈi mai ia oe ra, e ia pau atu.