Ephesia

TE AˈO NEI I TE TAMARII E TE FEIA METUA; TE MAU TAVINI E TO RATOU MAU FATU.

6 E te mau tamarii ra, e faaroo i to outou mau metua i te Fatu ra, e parau-tia hoi te reira. 2 E faatura ˈtu i to metua tane e to metua vahine; (o te ture matamua ïa i pahonohia i te maitai i faaitehia mai.) 3 Ia maitai hoi oe, e ia maoro to parahiraa i te ao nei. 4 O outou hoi, e te feia metua ra, eiaha e faaooo atu i ta outou tamarii ia riri, e haapii râ ia ratou e ia paari ma te aˈo a te Fatu ra.

5 E te mau tavini ra, e faaroo i to outou mau fatu i te tino nei, ma te mǎtaˈu e te oriorio, ma te aau haavare ore, mai ta outou e faaroo i te Mesia ra. 6 Eiaha ei faaroo mata, mai te faarearea taata ra, mai te tavini râ o te Mesia ra, i te ohiparaa i te hinaaro o te Atua ma te tae mau o te aau. 7 I te raveraa i te ohipa tavini ma te hinaaro, mai te mea e na te Fatu, e ere i ta te taata. 8 Ua itea hoi e, e ohipa maitai ta te hoê taata i rave, e utua ta ˈna e noaa i te Fatu ra, ta te tavini e ta te tiamâ. 9 E o outou hoi, e te mau fatu ra, e na reira atoa outou ia ratou, eiaha ei parau haamǎtaˈu: ua ite hoi outou e, e Fatu atoa to outou iho tei te raˈi, o tei ore roa ïa e haapao i te huru o te taata nei.

10 E tena na, e au mau taeae, ia itoito outou i te Fatu, e i to ˈna ra puai rahi. 11 A ahu na i te haana tamaˈi atoa a te Atua ra, ia tia ia outou ia patoi atu i te mau ravea paari a te diabolo ra. 12 E ere hoi i te taata anaˈe ra ta tatou e to nei o te feia hau atoa râ, e te mana, e te mau tavana o teie nei ao pouri, e te mau varua iino i te reva nei. 13 A rave hoi outou i te haana tamaˈi atoa a te Atua ra, ia tia ia outou ia patoi atu i te enemi i te mahana ino ra, e tia roa aˈera ïa, ia mau â. 14 Ia mau, ma te tatuahia to outou tauupu i te parau mau, e ma te tapoˈi ouma ra o te parau-tia i te ahuraa; 15 e ma te faatamaahia to outou avae i te faaineineraa o te evanelia ra o te hau; 16 a rave hoi i te paruru ra o te faaroo, ei nia roa iho ïa, o te mea ïa e pohe ai te mau ihe auahi atoa a taua varua ino ra: 17 a rave atoa hoi i te faaupoo ra i te ora; e te ˈoˈe a te Varua ra o te parau a te Atua: 18 ma te pure tuutuu ore i te mau pure atoa ra, e te ani a te Varua ra, e ma te ara-tamau-maite-raa i te reira, e te aniraa hoi i te maitai no te feia moˈa atoa ra; 19 e no ˈu hoi, ia horoahia mai te parau ia ˈu, ia parau noa tau vaha ma te itoito, ia faaite hua ˈtu i te parau aro ra o te evanelia, 20 i riro ai au nei ei vea tapeahia; ia parau hoi au i tei reira ma te itoito, te au ia ˈu ia parau ra.

21 Ia ite râ outou i te mau parau no ˈu, e ta ˈu e rave nei, na te taeae here nei na Tuhiko, te orometua haavare ore i te Fatu nei, e faaite atu ia outou i te mau parau atoa ra: 22 i tono atu ai hoi au ia ˈna ia outou na, ia ite outou i te mau parau na matou nei, e ia haamahanahana oia i to outou aau. 23 Ei hau to te mau taeae, e te aroha, ma te faaroo, no ǒ mai i te Atua Metua e te Fatu hoi ia Iesu Mesia. 24 Ia vai â te aroha mau i te feia atoa i hinaaro i to tatou Fatu ra ia Iesu Mesia ma te haavare ore. Amene.