Ephesia

TE FAAITOITO NEI PAULO IA RATOU IA AU MAITE I TE PARAU HOÊ.

4 E teie nei, te aˈo atu nei au, te taata i tapeahia i te Fatu nei, ia outou, ia au to outou haerea i te parauraa i parauhia mai ai outou na, 2 ma te aau haehaa, e te mǎrû, ma te haamahuraa roa, i te faaoromairaa te tahi i te tahi ma te aroha; 3 ma te ara maite ia vai â te au tahoê a te Varua i te ati ra i te hau. 4 Hoê â tino, hoê hoi Varua, mai ia outou hoi i parauhia i te tiairaa hoê o to outou parauraa ra. 5 Hoê hoi Fatu, hoê faaroo, hoê bapetizo, 6 hoê Atua o te Metua o te taata atoa ra, e tei nia iho hoi i te taata atoa, e tei pihai iho i te taata atoa, e tei roto hoi ia outou atoa. 7 Ua horoahia mai hoi te maitai ia tatou atoa nei, i ta te Mesia i au i te horoa mai. 8 Oia i parauhia ˈi e, Ia ˈna i reva i nia ra e tiaa rahi tîtî ta ˈna i aratai, e ua horoa mai i te maitai i te taata nei. 9 (E oia hoi i reva i nia ra, e ere anei no te mea ua pou mai na oia i raro i te vahi haehaa i teie nei ao? 10 O tei pou mai i raro nei, o tei reva â ïa i nia roa ˈtu i te mau raˈi atoa nei, ia faaî oia i te mau mea atoa ra.) 11 E ua haapao oia i e tahi pae ei aposetolo; e te tahi pae ei peropheta; e te tahi pae ei haapii evanelia; e te tahi pae ei tiai e ei orometua; 12 ei faaau i te feia moˈa i te ohipa ra e orometua, ia tupu i te maitai te tino o te Mesia ra: 13 ia riro tatou atoa nei ei taata paari, i te faaroo hoê e te ite hoê i te Tamaiti a te Atua, ia taea te faito ra i te î o te Mesia i te rahi; 14 ia ore tatou ia aueue noa i te mataˈi ra, i tera parau, i tera parau, mai te tamarii ra, i te ravea a te taata nei, e te paari i te mau peu atoa o te haavare ra: 15 ia tapea maite râ i te parau mau ma te aroha, ia tupu i te auraa ˈtu ia ˈna i te upoo ra i te Mesia, i te mau mea atoa nei: 16 no ˈna hoi te au-maite-raa o te tino atoa ra, e i ati ai hoi no te maitai o te mau tiaatiraa atoa, e te puai au o te mau vahi atoa ra, tupu aˈera te tino i te rahiraa o to ˈna iho maitai ma te aroha.

17 E teie nei, teie ta ˈu parau, ta te Fatu ta ˈu e faaite hua ˈtu nei, Atire roa outou i te haere i ta te tahi pae Etene haerea, i te haapaoraa i te parau maamaa a to ratou aau, 18 ma te manaˈo haapourihia, e te taa ê hoi i te ora a te Atua i te ite ore i roto ia ratou, e no te etaeta o to ratou aau: 19 e no te ite ore i te haama, ua horoa noa ia ratou iho i te mau peu taiata ra, ei rave i te mau parau faufau atoa ma te ru rahi. 20 E ere râ mai te reira ta outou i ite aˈenei i te Mesia ra. 21 Ua faaroo hoi outou i ta ˈna, e ua haapiihia outou e ana, tei ia Iesu hoi te parau mau, 22 e e haapae outou i ta outou parau i mutaa ihora, i te taata tahito i tei ino i te hinaaro haavare ra; 23 e ia faahouhia outou i to outou varua ra i te aau; 24 e ia faataata apî hoi outou, o tei hamanihia ia au i te Atua ra, i te parau-tia e te maitai mau ra.

25 E teie nei, e haapae i te haavare, ei parau mau ta te taata atoa ia parau atu i te tahi, e melo anaˈe hoi tatou no tatou iho. 26 E ia riri outou ra, eiaha ia harahia; eiaha ia mairi te mahana i to outou ririraa. 27 Eiaha hoi e tuu i ta te diabolo ra vahi ia ô mai. 28 O tei eiâ na, eiaha e eiâ faahou: a rave râ to ˈna iho rima i te mea maitai, ia faufaahia ta ˈna ia horoa na tei ere ra. 29 Eiaha ei parau faufau to roto mai i to outou vaha, ei parau maitai râ, e tupu ai te maitai au ra, e maitai ai te feia e faaroo ra. 30 E eiaha e faariri i te Varua Maitai o te Atua ra i tapaohia ˈi outou e tae noa ˈtu i te mahana oraraa ra. 31 Ia haapae-roa-hia te mamahu ore, e te iria, e te riri, e te avau e te faaino, e te tairoiro, eiaha roa atoa ïa. 32 Ia hamani maitai outou ia outou iho, ma te aau mǎrû aroha noa, ma te faaore hoi i te hara te tahi e te tahi, mai ta te Atua i faaore mai i ta outou i te Mesia ra.