Korinetia 2
TE MEA I TONO ATU AI PAULO IA TITO MA, E IA RAHI TO RATOU HOROA E TIA ˈI.
9 I te parau i te aufau i te taoˈa na te feia moˈa ra, eiaha noa ˈtu vau e papai atu i te parau ia outou i reira. 2 Ua ite hoi au i te tia o to outou aau, i arue ai au ia outou i to Makedonia ra, e ua ineine Ahaia mai te tahi matahiti mai â, e rave rahi tei anaanatae i taua itoito no outou na. 3 Ua tono atu râ vau i te mau taeae, o te riro ta matou arueraa ia outou i taua mea nei ei mea faufaa ore, ia ineine â outou mai ta ˈu hoi i parau aˈenei. 4 O te haere atoa ˈtu to Makedonia nei ia haere atu vau ra, o te roohia ˈtu aita outou i ineine, o te haama hoi matou, (eiaha ˈtu outou,) i taua arueraa papu nei. 5 I manaˈo ai hoi au e mea tia ia aˈo atu i te mau taeae, e e na muâ ratou i te haere ia outou, e faatia atea noa i taua taoˈa horoa noa na outou i parauhia i mutaa ihora, ia taa maite taua taoˈa ra ei mea horoa noa, eiaha mai te mea titauhia ˈtu.
6 Teie râ ta ˈu parau, O te ueue ma te faaherehere ra, e ooti ïa ma te iti; e o te ueue ma te faaherehere ore ra, e ooti ïa ma te rahi. 7 E horoa te taata atoa i ta ˈna i opua i roto i to ˈna aau; eiaha ma te nounou, e mai te mea e no te titau: o te taata horoa noa hoi ta te Atua e hinaaro. 8 E tia hoi i te Atua ia faarahi roa ˈtu i te mau maitai atoa na outou; ia ore outou ia faaea i te rave i te mau ohipa maitatai atoa ra, i te mea te rahi ra te mau mea atoa ra ia outou. 9 (Mai tei papaihia ra e, Ua faaani oia, ua hopoi atu na te taata rii; e tia tana parau-tia i te vai-maite-raa. 10 E teie nei, o tei tuu mai i te huero na te ueue ra, e te maa ei maa, ia tuu mai ïa e ia faarahi hoi i ta outou huero i ueuehia ra, e ia faarahi hoi i te hoturaa o ta outou parau-tia ra:) 11 ia rahi te mau mea atoa nei ia outou, no te mau horoaraa atoa, o tei faatupu ïa i te haamaitai i te Atua ia matou nei. 12 Ua faaîhia hoi te vahi toe i te feia moˈa, i te raveraa i taua ohipa aufau nei, e ere râ o te reira anaˈe ra, ua manii noa râ i te rahi i te haamaitai i te Atua. 13 Te haamaitai ra ratou i te Atua, i to outou auraro-maite-raa i te evanelia o te Mesia i mauhia e outou na, e to outou horoa ia ratou, e te taata atoa hoi, teie nei ohipa aufau to ratou ite; 14 ma te pure hoi ratou no outou, e te popou rahi ia outou no te rahi o te maitai a te Atua i roto ia outou na. 15 E teie nei, ia haamaitaihia te Atua i to ˈna ra horoa eita e tia ia parau ra.