Korinetia 2

TE FAAITE RA PAULO I TO ˈNA IHO ITOITO, E TE AˈO RA IA RATOU EIAHA E AMUI I TE HAAMORI IDOLO.

6 E teie nei te aˈo atoa ˈtu nei matou, te rave ohipa amui nei, ia outou, e eiaha outou e farii faufaa ore noa i te aroha mau o te Atua ra; 2 (te parau ra hoi oia e, Ua faaroo vau ia oe i te anotau au ra, e ua turu atu vau ia oe i te mahana faaoraraa ra: e inaha, teie taua anotau au ra; inaha, teie taua mahana faaoraraa ra.) 3 Aore roa i tuu i te turoriraa i te taata atoa, ia ore ia faainohia te toroa nei: 4 te faaite hua nei râ matou ia matou iho e e rave ohipa na te Atua i te mau mea atoa nei, i te faaoromai rahi, e te pohe, e te apǐapǐ, e te ahoaho, 5 i te papai, e te tapea, e te auê, e te ohipa, e te ara, e te haapaeraa maa: 6 i te viivii ore, e te ite, e te haamahûraa roa, e te hamani maitai, e te Varua Maitai, e te aroha haavare ore, 7 i te parau mau, e te mana o te Atua, e te mauhaa ra o te parau-tia i te rima atau e te rima aui; 8 i te teitei, e te haehaa, i te roo ino, e te roo maitai: mai te feia haavare ra, e feia parau mau râ; 9 mai te mea e aore i itea, ua itea-papu-hia râ; mai te mea e te pohe nei, e inaha te ora noa nei â matou: ua aˈohia mai, aita râ i taparahi-pohe-roa-hia: 10 mai te mea e te oto nei, aita râ e faaea i te oaoa; mai te mea e e veve, te faariro nei râ i te taata e rave rahi ei taata taoˈa; mai te mea e aita roa e faufaa, tei ia matou râ te mau mea atoa nei. 11 E to Korinetia e! te parau hua ˈtu nei to matou vaha ia outou, ua mahora noa to matou aau. 12 Aore outou i apǐapǐ ia matou, ua apǐapǐ râ outou i roto i to outou iho aau. 13 E na reira atoa mai ia matou, (te parau atu nei au mai te mea e e tamarii outou na ˈu,) ia mahora atoa hoi outou. 14 Eiaha outou ia amui-au-ore-hia i te feia faaroo ore ra: eaha to te parau-tia auraa i te parau-tia ore? e eaha to te maramarama auraa i te pouri? 15 E eaha to te Mesia auraa ia Behala? e eaha to te taata faaroo ra faufaa i te taata faaroo ore? 16 E eaha to te hiero o te Atua ra atiraa ˈtu i te idolo? o te hiero hoi tatou o te Atua ora ra; ta te Atua i parau maira e, E parahi mau vau i rotopu ia ratou, e hahaere au i rotopu ia ratou; e ei Atua vau no ratou, e ei taata hoi ratou no ˈu. 17 E teie nei, te na ô maira Iehova, E haere mai outou i rapae au mai roto mai ia ratou ra, ia taa ê outou, e eiaha e rave noa ˈtu i te mea viivii ra; e na ˈu e farii atu ia outou, 18 e ei metua vau no outou, e ei tamarii tamaroa outou na ˈu e ei tamarii tamahine, te parau maira Iehova tei tia ia ˈna te mau mea atoa ra.