Korinetia 2

TE HAAMAITAI NEI PAULO I TO ˈNA TOROA, I TE TUURAA I TE EVANELIA RA.

3 E haamaitai faahou anei matou ia matou iho? e ei episetole haamaitai anei ta matou ia matou iho ia outou na, mai ta te hoê paeau ra, e tia ˈi, e te episetole haamaitai ia matou no ǒ na mai ia outou na? 2 O outou hoi ta matou episetole, i papaihia i roto i to matou aau, ua itea e ua taiohia e te taata atoa. 3 Ua faaite-papu-hia hoi outou e o te episetole ïa a te Mesia, i ohipahia e matou, aita râ i papaihia i te inita, na te Varua râ o te Atua ora ra; eiaha i nia i te pǎpǎ ofai, ei nia râ i te pǎpǎ taata ra i te aau.

4 O te huru ïa o to matou manaˈo i te Atua i noaa i te Mesia ra. 5 E ere râ mai te mea e e au ia matou iho ia manaˈo e, e tia te hoê mea iti ia matou anaˈe iho, no ǒ mai râ i te Atua ra to matou tia; 6 o tei faariro atoa ia matou ei orometua itoito i te faufaa apî nei; eiaha i te parau papai anaˈe ra, i te varua atoa râ; e pohe hoi tei te parau papai ra, e ora râ tei te varua. 7 E hanahana hoi to te tuuraa i te parau pohe i ootihia i nia i te ofai ra, e aita ˈtura e tia i te tamarii a Iseraela ia hiˈo tamau atu i te mata o Mose, i te anaana o to ˈna mata; e faaorehia ra taua anaana ra; 8 e ore na anei e rahi atu te hanahana i te tuuraa mai i te parau a te varua ra; 9 E hanahana hoi to te tuuraa mai i te parau faahapa ra, e hanahana rahi atu ïa to te tuuraa mai i te parau-tia ra. 10 E taua mea hanahana ra hoi, aita ˈtura ïa i hanahana ia faaauhia ra, no taua hanahana rahi i hau ê ra. 11 E hanahana hoi to taua mea e faaorehia ra, e rahi atu ïa te hanahana i to te vai â.

12 E teie nei, e tiairaa to matou mai te reira te huru, te parau papu hua nei matou: 13 e ere hoi mai ia Mose o tei paruru i to ˈna mata, ia ore te tamarii a Iseraela ia hiˈo papu i te hopea o taua mea e faaorehia ra: 14 ua haapourihia râ to ratou aau: te vai noa ra taua paruru ra e tae noa aˈenei i teie nei mahana i te taioraa i te faufaa tahito; ua faaorehia hoi te reira i te Mesia nei. 15 Te vai noa ra te paruru i to ratou aau, ia taiohia Mose ra, e tae roa aˈenei i teie mahana. 16 Ia fariu râ te taata i te Fatu ra, e iriti-ê-hia ïa taua paruru ra. 17 E teie nei, o te Fatu taua varua ra, e tei ia ˈna te Varua o te Fatu ra, tei reira te tiamâ. 18 Te hiˈo atoa nei tatou i te maitai o te Fatu ma te mata paruru ore ra, mai te mea e tei roto i te hiˈo ra, te faahuru-ê-hia nei tatou ei hohoˈa hoê, mai te maitai hoê e tae noa ˈtu i te maitai, i te Varua o te Fatu ra.