Korinetia 2
TE AˈO ATURA PAULO I TE FEIA MÂRÔ I TE PARAU INO, E TE HAAMAHANAHANA RA I TE MAU TAEAE.
13 O te toru hoi teie i to ˈu haereraa ˈtu ia outou na. Tei te vaha o na ite toopiti e tootoru ra e riro ai te mau parau atoa na ei parau mau. 2 I parau na vau ia outou i mutaa iho, e te parau faahou atu nei au, o te piti ïa, mai te mea tei ǒ na vau, taa ê noa ˈi nei, e te papai nei au i te parau i te feia i hara na, e te tahi paeau atoa ra, e ia tae faahou atu vau, e ore au e faaherehere; 3 o outou hoi i titau mai i te ite, e te parau nei te Mesia ia ˈu nei, aita hoi oia i paruparu i roto ia outou na, te puai na râ i roto ia outou. 4 I faasataurohia â hoi oia no te paruparu, te ora ra râ oia i te mana o te Atua. Te paruparu atoa nei hoi matou i roto ia ˈu, e ora râ matou e oia atoa i te mana o te Atua i roto ia outou na. 5 E imi maite ia outou iho i to outou faaroo; e hiˈopoa maite ia outou iho. Aita outou iho i ite, e e ere outou i te feia tia-ore-hia mai, tei roto ïa Iesu Mesia ia outou? 6 Te manaˈo nei râ vau e, e ite outou e e ere matou i te feia tia-ore-hia mai. 7 E teie nei, te pure nei au i te Atua ia ore roa outou ia rave i te ino; e ere râ ia itea e ua tiahia matou, ia rave râ outou i te parau maitai ra, ia riro noa ˈtu â matou mai te mea ite-ore-hia mai. 8 Aita roa e mea e tia ia matou ei faaore i te parau mau, area ei faatia i te parau mau. 9 Ia paruparu hoi matou e ia puai outou, te oaoa nei matou i reira: e te pure atoa nei hoi matou, ia tia roa outou. 10 I papai atu ai hoi au i teie nei mau parau i te atea ê nei, ia ore au ia rave uˈana ˈtu ia tae atu i pihai iho, i te mana hoi a te Fatu i horoa mai ia ˈu nei ia maitai, e ere hoi ia pohe. 11 E te hopea o ta ˈu nei parau, e au mau taeae, ia ora na. Ia maitai â, ia mahanahana roa, ia hoê â aau, e parahi ma te hau; e tia ïa te Atua no ˈna te aroha e te hau i rotopu ia outou. 12 E aroha outou ia outou iho i te hôˈi moˈa ra. 13 Te aroha nei te feia moˈa atoa ia outou. 14 Ei ia outou atoa na te aroha mau a te Fatu ra a Iesu Mesia, e te hinaaro o te Atua, e te au a te Varua Maitai ra. Amene.