Korinetia 2

TE FAAITE RA PAULO I TA ˈNA OHIPA, E TO ˈNA MAU POHE, E TE TUPURAA O TE PARAU A TE ATUA IA ˈNA.

11 Ahiri outou e faaoromai iti noa mai ia ˈu nei i ta ˈu nei parau faaahaaha maua noa nei; oia ïa, e faaoromai mai â outou ia ˈu. 2 Te manaˈonaˈo nei au ia outou i te manaˈonaˈo Atua; ua momoˈahia outou e au i te tane hoê, ia pûpû atu vau ia outou ei paretenia viivii ore i te Mesia ra. 3 Te mǎtaˈu nei râ vau, o te faainohia to outou aau ia ore atu te rotahi noa e au i te Mesia nei, mai ta te ophi i haavare atu ia Eva i to ˈna ra paari. 4 Te parau ra taua taata i haere maira i te tahi Iesu ê, o tei ore i parauhia e matou ra, e te farii na outou i te tahi varua ê, o tei ore i fariihia e outou ra, e te tahi evanelia aore i mauhia e outou, faaoromai tia outou ia ˈna. 5 Te manaˈo nei hoi au e, aore roa vau i iti i te mau aposetolo rarahi atoa ra. 6 Te maua ra vau i te parau, eita râ vau e maua i te ite; ua itea-hua-hia râ matou i rotopu ia outou i taua mau mea atoa nei. 7 Ua hapa anei au i te faahaehaaraa ia ˈu iho, ia teitei outou; o vau i parau noa ˈtu i te evanelia o te Atua ia outou na? 8 Ua pau hoi vetahi mau ekalesia ia ˈu i te raveraa vau i te utua, ia tia ia ˈu ia rave i ta outou ohipa. 9 Ia ˈu hoi i parahi i ǒ outou na a ati ai au ra, aore roa te hoê taata i teimaha ia ˈu, na te mau taeae râ no Makedonia mai i turu mai ia ˈu i taua ati no ˈu ra, ua ara maite au ia ˈu iho aita i faaea i ore outou ia teimaha ia ˈu, e e ara vau ia ˈu iho. 10 Tei roto ia ˈu nei te parau mau a te Mesia ra, eita roa e ore teie nei arue ia ˈu nei, e ati noa ˈˈe Ahaia atoa ra. 11 Eaha e ore ai? no te mea aore au e aroha ia outou? e ere, ua ite hoi te Atua. 12 O ta ˈu râ e rave nei, e rave â vau ei faaore atu i te ravea a te feia i imi i te ravea, ia riro ratou mai ia matou atoa nei i taua mea ta ratou e arue ra. 13 E aposetolo haavare hoi te reira, e rave ohipa haavare ïa, i te faahua aposetoloraa na te Mesia ia ratou iho. 14 Eita hoi e maerehia; o Satani hoi tei faahua melahi atoa ia ˈna iho no te maramarama. 15 E ere hoi i te mea maere rahi, ia faahua tavini tana mau tavini no te parau-tia; e faaauhia to ratou hopea i ta ratou ohipa. 16 Teie â ta ˈu parau, Eiaha roa te hoê taata e manaˈo ia ˈu e e maamaa; te manaˈo ra e e maamaa, e faaoromai mai ia ˈu i te maamaa nei, ia arue iti noa na vau. 17 Ta ˈu hoi e parau nei, aore hoi au e parau mai te mea e au i te Fatu ra, mai te mea râ e parau maamaa noa, i te parau arue nei. 18 E e rave rahi tei arue i te tino nei, e arue atoa hoi au. 19 I faaoromai tia outou i te maamaa, te paari ra hoi outou iho. 20 Te faaoromai ra hoi outou, ia haafao mai te hoê ia outou, e ia pau outou i te hoê, e ia haru mai hoi te hoê, e ia faateitei te hoê ia ˈna iho, e ia moto mai hoi te hoê i to outou mata. 21 No taua faaino ra, e te paruparu nei matou, ta ˈu ïa e parau nei. Te mea râ i etaeta ˈi te hoê taata ˈtu, (te parau maamaa noa nei au,) e etaeta atoa hoi au. 22 E Hebera anei ratou? oia atoa vau. E ati Iseraela anei ratou? oia atoa vau. E huaai anei ratou no Aberahama? oia atoa vau. 23 E orometua anei ratou na te Mesia? (te parau maamaa noa nei au) e hau vau; e rahi ta ˈu ohipa i rave, e rahi hoi te papairaahia, e rahi hoi te tae i roto i te tapearaa, e rave rahi hoi te pohe. 24 A pae aˈenei o ˈu papairaahia e te ati Iuda, taitoru ahuru taiiva tiahapa, i te papairaa hoê. 25 A toru o ˈu papairaahia i te raau, hoê o ˈu tuiraahia i te ofai, e toru o ˈu pauraa i te pahi parari, hoê o ˈu rui hoê hoi ao i raro i te moana. 26 E rave rahi te haerea, e te ati i te pape tahe, e te ati i te nǎnǎ eiâ, e te ati i te taata i to ˈu iho fenua, e te ati i te etene, e te ati i roto i te oire, e te ati i te medebara, e te ati i te miti, e te ati i rotopu i te mau taeae haavare ra; 27 te rohirohi e te opa, e te araraa e rave rahi, te porori e te poihâ, e te haapaeraa maa e rave rahi, te toetoe e te veve: 28 e ere hoi o te mau mea anaˈe i rapae au ra, o te peapea râ i roohia noa mai ai au i te mau mahana atoa nei, i te faaitoito i te mau ekalesia atoa ra. 29 O vai tei paruparu e aore au i paruparu? o vai tei turori e aore au i ama? 30 E arue â vau e tia ˈi, e arue au i te mau mea no to ˈu nei paruparu. 31 O te Atua, te Metua o to tatou Fatu ra o Iesu Mesia, tei ia ˈna te maitai mure ore ra, o tei ite ïa e aore au i haavare. 32 Na te tavana a Areta Arii ra i tuu i Damaseko i te tiai i te oire a to Damaseko ra, hinaaro i te haru ia ˈu: 33 e i tuuhia vau i raro na roto i te haamaramarama na te pae aua i roto i te hinai, ora ˈtura vau i to ˈna rima.