Korinetia 1

O TA TE EKALESIA RAVEA E AU I TE TAATA HARA RAHI RA.

5 I parauhia e taiata tei ǒ outou na, e taiata hoi aore roa i itea i ǒ te Etene atoa ra, tei te hoê taata te vahine a to ˈna ihora metua tane. 2 E te faaahaaha noa na outou? e ore anei e au ia outou te oto? e ia tuua-ê-hia taua taata i roto ia outou i rave i taua mea ra. 3 O vau nei râ, taa ê noa mai â tau tino nei, tei pihai iho tau varua, i feruri noa na vau i taua taata i rave i taua mea ra, mai te mea e tei reira mau iho vau; 4 ia putuputu outou e tau varua atoa, ma te mana o te Fatu ra o Iesu Mesia, 5 A tuu atu ai ia Satani i taua taata ra, i te iˈoa o to tatou Fatu ra o Iesu Mesia, ia pohe te tino, ia ora te varua i te mahana o te Fatu ra o Iesu.

6 E ere to outou faaahaaha i te mea maitai. Aita outou i ite e, e hopue te puea atoa i te faahopue iti haihai ra? 7 E teie nei, a tamâ na i te faahopue tahito ra, ia riro outou ei puea apî, ia ore te faahopue ia outou na: o te Mesia hoi ta tatou pasa, i taparahihia ïa na tatou. 8 E teie nei, e haapao tatou i taua oroa ra, eiaha ma te faahopue tahito ra, eiaha atoa ma te faahopue tairoiro e te ino, ma te maa faahopue-ore-hia râ, o te haavare ore e te parau mau.

9 Te papai atu nei au i teie nei episetole ia outou na e, eiaha outou e amui atu i te taiata. 10 Eiaha râ te mau taiata atoa, e te nounou taoˈa, e te haru, e te haamori idolo o teie nei ao ra; ahiri hoi te reira ra, e faarue mai outou i teie nei ao e tia ˈi. 11 Te papai nei râ vau ia outou, e eiaha outou e amui atu i te taata i parauhia e taeae ia riro ei taiata, e te nounou taoˈa, e te haamori idolo, e te faaino, e te taero ava, e te haru; e eiaha atoa e amu noa ˈtu i te maa i reira. 12 Eaha ta ˈu faufaa ia parau i to rapae au ra? Aore anei outou e parau i to roto na? 13 Area to rapae au ra, na te Atua ïa e parau. E tena na, e faataa ê atu outou i taua taata parau ino i roto ia outou na.