Korinetia 1

E TURU Â I TE FEIA MOˈA RA E TIA ˈI.

16 E teie nei, i te parau i te taoˈa aufau na te feia moˈa ra, o ta ˈu â hoi i poroi i te mau ekalesia i Galatia ra, e na reira atoa outou. 2 Ia tae te mahana matamua o te hebedoma ra, e vaiiho aˈe outou atoa e ati noa ˈˈe i te tahi pae moni i roto i te vairaa ra, ia au i ta te Atua haamanuïaraa ia ˈna ra, e ia tae atu vau ra, eiaha ei aufauraa i reira. 3 E ia tae atu vau ra, o te au ra ia outou ra, o ta ˈu ïa e tono ma te leta ei hopoi i ta outou taoˈa horoa noa i Ierusalema. 4 E o vau atoa te haere e tia ˈi, e haere atoa ïa ratou e o vau atoa. 5 E haere atu hoi au ia outou na, ia ati aˈe na Makedonia ia ˈu: te haere nei hoi au na Makedonia. 6 E e riro paha vau i te parahi i ǒ outou, e ia unu noa ˈtu te tau vero nei, e ia tae au ia outou i ta ˈu vahi e haere ra. 7 E ore hoi au e ite tapae noa ia outou i teie nei, te hinaaro nei hoi au ia maoro aˈe to ˈu parahiraa i ǒ outou na, ia tia i te Fatu ra. 8 E parahi râ vau i Ephesia e ia tae i te Penetekose ra. 9 E opani rahi hoi e te maitai tei iritihia ia ˈu nei: e rave rahi râ hoi te enemi.

10 Ia tae atu Timoteo ra, e haapao maite outou ia parahi oia i roto ia outou ma te mǎtaˈu ore: te rave ra hoi oia i te ohipa a te Fatu, mai ia ˈu atoa nei. 11 Eiaha roa te hoê taata e ite ino noa ˈtu ia ˈna, e aratai mai râ ia ˈna i to ˈna tere ma te hau, ia tae mai oia ia ˈu nei: te tiai nei hoi au ia ˈna e te mau taeae atoa. 12 Area tau taeae nei o Apolo, ua parau maite atu hoi au ia ˈna ia haere atu oia e te mau taeae atoa ia outou na; aita râ oia i hinaaro i te haere atu i teie nei, e tae atu râ oia ia tae i te mahana e au ai ra. 13 E ara; ia mau papu i te faaroo, e faataata paari outou, e faaitoito. 14 Ia ravehia te mau mea atoa i roto ia outou na ma te aroha.

15 Te aˈo atu nei au ia outou, e au mau taeae, (e ite atu outou i te fetii o Setephano ra, o te oho matamua ïa ratou i Ahaia na, e ua haamataro ratou i te tauturu i te feia moˈa.) 16 Ia auraro maite outou i te reira, e te feia atoa i au mai, tei rave atoa i te ohipa ra. 17 Te oaoa nei au ia Setephano i tae mai, e ia Phoratunato, e ia Ahaiko: no te mea ua tia tei toe ia outou na ia ratou. 18 E ua haamahanahana mai ratou i tau aau e to outou atoa hoi: e teie nei, e ite maitai atu outou i te taata mai te reira te huru.

19 Te aroha ˈtu nei te mau ekalesia i Asia nei ia outou. Te rahi nei to Akuila raua o Peresila aroha ia outou i te Fatu nei, e to te ekalesia i roto i to raua ra fare. 20 Te aroha ˈtu nei te mau taeae atoa ia outou. E aroha atoa outou ia outou iho ma te hôˈi moˈa ra. 21 O to ˈu hoi teie aroha to Paulo, na to ˈu iho rima i papai. 22 Te taata aore i hinaaro i te Fatu ra ia Iesu Mesia, ia riro oia ei Anatema Mara-nata. 23 Ia vai â te aroha mau o to tatou Fatu ra o Iesu Mesia ia outou na. 24 Ia vai â to ˈu aroha ia outou atoa i roto i te Mesia ra ia Iesu. Amene.