Korinetia 1
E TITAU Â I TE AROHA, O TE MEA MAITAI ROA ÏA.
14 E tapi i te aroha, e ia rahi te hinaaro i ta te Varua ra, o te aˈo â ia aˈo outou. 2 O tei parau hoi i te parau ê ra, aore ïa i parau i te taata, i te Atua râ: aore hoi e taata i ite i ta ˈna parau; ua parau râ oia i te parau aro i te Varua. 3 Area tei aˈo ra, ua parau ïa i te taata, ia tupu te ite, e ia mahanahana, e ei faaitoitoraa. 4 O tei parau i te parau ê ra, ua faarahi ïa i to ˈna iho; area tei aˈo ra, ua faarahi ïa i te ite o te ekalesia. 5 Te hinaaro nei au ia parau atoa outou i te parau ěê, e rahi atu â ia aˈo outou; e rahi hoi tei aˈo i tei parau i te parau ěê, ia ore oia ia faaite, ia noaa te ite i te ekalesia.
6 Ia haere atu vau ia outou, e au mau taeae, ma te parau ěê i te parauraa ˈtu, eaha ta outou faufaa e noaa ia ˈu i reira, ia ore au ia parau atu i te parau mai te parau-heheu-hia ra, e te parau no te ite ra, e te tohu ra, e te parau i haapiihia ra? 7 Oia atoa te mau mea ora ore e oto nei, mai te vivo e te kinura ra, ia ore râ ia taa te oto ra, eaha ihora e itea ˈi te oto vivo e te kinura? 8 E ia ore hoi ia taa te oto o te pu ra, na vai e faaineine ia ˈna iho e haere i te tamaˈi? 9 Oia atoa outou, ia ore to outou vaha ia parau i te parau itea ra, eaha ihora e itea ˈi te parau i parauhia ra? e riro outou i te parau noa i roto i te reva. 10 Rahi noa ˈtu â te huru o te reo i te ao nei, aita roa ra te hoê reo taa ore. 11 Ia ore râ vau ia ite i taua reo ra, e riro vau ei barebaro i taua taata i parau maira, e e riro hoi taua taata i parau maira ei barebaro ia ˈu. 12 Oia atoa hoi outou, te nounou na outou i ta te Varua ra, e titau maite ia hau outou i te reira, ia tupu te maitai i te ekalesia ra. 13 E teie nei, o tei parau i te parau ê ra, e pure oia ia tia atoa ia ˈna ia faaite. 14 Ia pure hoi au ma te parau ê ra, o tau varua tei pure, aita râ e faufaa i tupu ia ˈu, no te mea aore i itea. 15 E teie nei, e nahea vau? E pure au ma te varua, e e pure hoi au ma te itehia mai; e himene au ma te varua, e e himene hoi au ma te itehia mai. 16 Aore râ, ia haamaitai oe i te Atua ma te varua, eaha te taata ite ore ra e tia ˈi ia parau e, Amene, i ta oe haamaitairaa, aore hoi oia i ite i ta oe parau? 17 Te maitai mau ra hoi ta oe haamaitairaa, aita râ i tupu te maitai i te tahi. 18 Te haamaitai nei au i tau Atua, e rahi ta ˈu nei parau ěê e parau nei, i ta outou atoa na. 19 I roto râ i te ekalesia ra, ia pae noâ iho a ˈu parau ia parau ma te itehia mai, e ia pii te tahi pae ia ˈu ra, e mea maitai ïa ia ˈu, i te parau itea ore e ia ahuru noa ˈtu te tausani.
20 E au mau taeae, eiaha outou ei tamarii i te ite; area i te ino ra, ei tamarii aruaru ïa outou, i te ite râ, ei taata paari ïa outou. 21 Ua papaihia i roto i te ture, Te parau maira Iehova, E parau atu vau i teie nunaa i te parau ěê, e te vaha ěê, e eita ratou e faaroo mai ia ˈu. 22 E teie nei, e tapao te parau ěê nei, e ere ra no te feia i faaroo ra, no te feia faaroo ore râ; area te aˈo ra, e ere ïa te tapao no te feia faaroo ore, no te feia faaroo râ. 23 Ia putuputu hoi te ekalesia atoa i te vahi hoê ra, e te parau paatoa ra i te parau ěê, ia tomo maira te feia ite ore, e te faaroo ore, e ore anei ratou e parau e, ua maamaahia outou? 24 Area ia aˈo paatoa, a tomo mai ai te hoê taata faaroo ore, e te ite ore, ua faaite-paatoa-hia oia, ua hiˈo-paatoa-hia e ratou. 25 I itea ihora te parau aro i roto i to ˈna aau, tipapa ihora oia i raro, haamori atura i te Atua, ma te parau e, tei roto mau â te Atua ia outou.
26 Eaha na te mea, e au mau taeae, ia putuputu outou ra, e salamo ta te tahi, e parau haapii ta te tahi, e parau ê ta te tahi, e parau-heheu-hia mai ta te tahi, e faaauraa ta te tahi? e rave i te mau mea atoa ia tupu te maitai ra. 27 Ia parau mai te hoê taata i te parau ê, ia toopiti e ia tootoru roa ia parau e tataitahi maite ratou; e na te hoê e faaite. 28 E aita e faaite ra, e mamu noa oia i roto i te ekalesia, e parau noa râ oia ia ˈna iho e i te Atua hoi. 29 Ia toopiti peropheta e ia tootoru hoi ia parau, e na te taata atoa e hiˈo. 30 E e parau tei faaitehia mai i te hoê e parahi i pihai ihora, ia mamu tei mutaa ihora a parau ai. 31 E tia atoa ia outou ia tataitahi i te tohu; ia pii atoa, e ia mahanahana atoa. 32 Te varua hoi o te mau peropheta ra, tei te mau peropheta iho â ïa; 33 e ere hoi te Atua i te tumu no te anoi noa, no te hau râ, mai tei te mau ekalesia feia moˈa atoa ra.
34 Ia mamu noa ta outou mau vahine i te mau ekalesia ra: aita hoi ratou e tia ia parau; ia auraro maite râ, mai ta te ture atoa i parau maira. 35 E ia hinaaro ratou i te haapii ra, e ui ratou i ta ratou mau tane i te utuafare ra: e mea au ore hoi i te vahine ia parau i roto i te ekalesia ra.
36 Eaha? no ǒ na mai ia outou na te parau a te Atua? e o outou anaˈe anei tei tae na ˈtu e taua parau ra? 37 Te manaˈo na te hoê taata e e peropheta oia, e tei ia ˈna ta te varua ra, e parau oia i te mau parau ta ˈu e papai atu ia outou na, e e parau ïa na te Fatu. 38 E te vai ite ore noa ra te hoê taata, ia vai ite ore noa ˈtu â oia. 39 E teie nei, e au mau taeae, ia rahi to outou hinaaro i te aˈo, eiaha râ e faaore ia parau i te parau ěê. 40 E rave râ i te mau mea atoa ra ma te tia e ma te nehenehe.