Roma
E FARII MAITE Â I TE FEIA AORE I ITOITO REA I TE FAAROO E TIA ˈI.
14 Te taata hoi aore i itoito i te faaroo nei, e farii atu outou eiaha râ e mârô i te parau aore i itea-papu-hia ra. 2 Te manaˈo ra hoi te tahi e tia ia ˈna ia amu i te mau maa atoa nei, e o te tahi hoi o tei ore i itoito ra, o te maa faaapu anaˈe ra ta ˈna e amu. 3 Eiaha tei amu ra e vahavaha ˈtu i tei ore i amu ra; e eiaha atoa hoi tei ore i amu ra e faahapa ˈtu i tei amu ra: ua fariihia hoi oia e te Atua. 4 O vai hoi oe na a faahapa ˈi i to vetahi ê ra tavini? tei to ˈna ra fatu to ˈna mau e to ˈna hiˈa: e haamauhia râ oia, e e tia hoi i te Atua ia haamau ia ˈna. 5 Te manaˈo nei te tahi, e huru ê to te tahi mahana i te tahi; te manaˈo nei hoi te tahi, hoê â huru to te mau mahana atoa; ia papu râ te taata atoa i to ˈna ihora aau. 6 O tei haapao i te hoê mahana ra, no te Fatu ïa i haapao ai; e o tei ore e haapao i te mahana ra, no te Fatu ïa i ore i haapao ai. O tei amu ra, no te Fatu ïa i amu ai, ua haamaitai hoi oia i te Atua; e o tei ore i amu ra, no te Fatu ïa i ore i amu ai, e ua haamaitai hoi i te Atua. 7 Aore roa hoi te hoê o tatou e ora nei ei faatupu i ta ˈna iho, e aore roa e taata e pohe nei ei faatupu i ta ˈna iho. 8 Te ora nei tatou, i ora ïa tatou ei faatupu i ta te Fatu; e te pohe nei tatou, i pohe ïa tatou ei faatupu i ta te Fatu: e teie nei, te ora nei tatou, e te pohe nei hoi, no te Fatu â tatou. 9 No reira hoi te Mesia i pohe ai, e i tia faahou ai i nia, e e tia hoi oia i te oraraa, ia riro oia ei Fatu no tei pohe e no tei ora hoi. 10 Eaha râ hoi oe i faahapa ˈi i to taeae? e eaha hoi oe i vahavaha ˈtu ai i to taeae? e tia atoa hoi tatou i mua i te haavaraa a te Mesia ra. 11 Ua papaihia hoi e, Te na ô maira Iehova, Te ora nei au, e hope te mau turi atoa i te tuu i raro i mua ia ˈu, e hope te mau vaha atoa i te faˈi i te parau i te Atua ra. 12 E teie nei, e hope roa tatou atoa i te faˈi i te parau ia ˈna iho i te Atua ra.
13 E teie nei, atira na tatou i te faahapa ia tatou iho; teie râ ta outou e haapao, e eiaha ei turoriraa i tuuhia mai i mua i te hoê taeae, e te mea e maheaitu ai. 14 Ua ite au, e ua faaitehia vau e te Fatu ra e Iesu, e aita roa e mea viivii mau iho; o te taata râ i manaˈo e, e mea viivii taua mea ra, e mea viivii â ïa ia ˈna. 15 Ia inoino râ to taeae i ta oe na maa, aita ˈtura to oe haerea e au i te aroha. Eiaha ia paruparu te taata i pohe ai te Mesia ra i ta oe na maa. 16 Eiaha hoi to outou maitai ia faainohia. 17 E ere hoi te basileia o te Atua ra i te amu e te inu, o te parau-tia râ, e te hau, e te oaoaraa i te Varua Maitai ra. 18 O tei haapao hoi i teie nei mau parau i to ˈna taviniraa i te Mesia ra, te au ra ïa oia i te Atua, e e faatiahia e te taata atoa nei. 19 E teie nei, e titau tatou i te parau hau, e te parau e maitai apipiti ai ra. 20 Eiaha e faaorehia te ohipa a te Atua nei i te maa. E mea viivii ore hoi te mau mea atoa nei; e mea ino râ i te taata i amu ma te turori. 21 E mea maitai hoi ia ore ia amu i te puaa, e ia ore ia inu i te uaina, e ia ore ia rave i te mau mea atoa e turori ai to taeae ra, e e maheaitu ai, e e paruparu ai hoi. 22 E faaroo to oe? e tapea maite na no oe iho i mua i te aro o te Atua. E ao to te taata aore i faahapa ia ˈna iho i ta ˈna ra mea tia. 23 O tei faahuru ê râ i te maa nei, ua faahapahia oia ia amu ra, no te mea e ere ta ˈna i te amu faaroo: o te mau mea atoa hoi e ere i to te faaroo ra, e hara ïa.