Ohipa

TO SETEPHANO FAATIARAA I TA ˈNA PARAU I TE ARO O TE TAHUˈA RAHI RA.

7 Ua parau maira te tahuˈa rahi ra, Oia mau anei te reira? 2 Ua parau atura oia, E te mau taeae e te feia metua nei, a faaroo mai na; Ua faaite mai te Atua mana ia Aberahama i to tatou metua, a parahi ai oia i Mesopotamia ra, hou oia i parahi ai i Harana ra, 3 ua na ô maira ia ˈna, E haere ê mai oe, e vaiiho atu i to fenua e to fetii atoa, e haere mai oe i teie nei fenua na ˈu e faaite atu ia oe. 4 Ua haere maira oia mai te fenua mai o te Kaladaio ra, e parahi ihora i Harana. E pohe atura tana metua ra, mai reira hoi, ua aratai maira te Atua ia ˈna i teie nei fenua, e parahihia e outou nei. 5 Aore râ oia i horoa noa ˈtu i te hoê tufaa na ˈna i taua fenua nei, e mai ta ˈna vahi e taahi ra te rahi: ua parau mai râ oia e horoa mai no ˈna e no tana huaai a muri atu, aore â a ˈna tamaiti i reira. 6 Ua parau maira te Atua ia ˈna e, E purutia to ˈna huaai i te fenua ê, e e pau i te faafaohia e ratou, e hamani ino mai hoi ia ratou e e maha hanereraa matahiti. 7 E ua parau mai te Atua i taua fenua i fao ai ratou ra e, na ˈu ïa e tahoo atu; ei reira ratou e haere mai ai i ǒ nei a haamori ai ia ˈu. 8 E ua tuu maira oia ia ˈna i te peritome; e fanau aˈera ta ˈna o Isaaka, peritome ihora ia ˈna i te rui vau ra; e fanau aˈera ta Isaaka o Iakoba, e fanau aˈera ta Iakoba o te mau patereareha tino ahuru ma piti ra.

9 E feii ihora te mau patereareha ra, hoo atura ia Iosepha i Aiphiti, tei ia ˈna ra te Atua. 10 E ua faaora ia ˈna i to ˈna atoa ra mau pohe, e ua horoa mai i te paari e te maitai no ˈna i mua i te aro o Pharao i te arii o Aiphiti ra; e na ˈna oia i faariro atu ei tavana i Aiphiti e to ˈna atoa ra fetii. 11 E roohia ihora Aiphiti e Kanaana i te oˈe e te pohe rahi, e ati noa aˈera te fenua; e aore roa a to tatou hui metua ra maa i noaa. 12 Ia ite râ Iakoba e, e maa tei Aiphiti, ua tono atura oia i to tatou mau metua i te tonoraa matamua ra. 13 E tae aˈera i te piti, faaite maira Iosepha i tana mau tuaana, e i faaitehia hoi Pharao i te fetii o Iosepha ra. 14 Ua faatono atura Iosepha i te taata e parau atu i tana metua ia Iakoba, e tana fetii atoa e hitu ahuru ma pae ra, e haere mai ia ˈna ra. 15 Haere atura Iakoba i Aiphiti, e pohe atura oia i reira, e to tatou mau metua atoa ra. 16 E hopoihia ˈtura i Sehema, tuuhia ˈtura i te menema i hoohia e Aberahama i te moni i te mau tamarii a Hamora te metua o Sehema ra.

17 Ia fatata râ te tau ta te Atua i parau mai ia Aberahama ma te tǎpǔ ra, te rahi ra hoi taua mau taata ra i Aiphiti; 18 e tupu aˈera hoi te hoê arii aore i ite ia Iosepha. 19 Imi ihora oia i te ravea paari i to tatou, e hamani ino ihora i to tatou hui metua, i te faarueraa i ta ratou tamarii ia mou ratou ra. 20 I te reira tau to Mose fanauraa, e purotu rahi oia, faaamuhia oia i roto i te fare o tana metua e e toru marama. 21 E ia faaruehia oia ra, ua rave maira te tamahine a Pharao ia ˈna, hii atura ei tamaiti na ˈna iho. 22 E haapiihia ihora Mose i te mau parau paari a to Aiphiti ra, e mana ˈtura oia i te parau e te ravea. 23 E tae aˈera i te maha o te ahururaa i to ˈna ra matahiti, manaˈo aˈera tana aau e haere e hiˈo i tana mau taeae, i te tamarii a Iseraela ra. 24 E ite atura oia i te hoê o ratou i te hamani-ino-raahia, faatia ˈtura oia, e taparahi ihora i to Aiphiti, ei hoo no tei hamani-ino-hia ra. 25 Parau aˈera oia, e ite tana mau taeae e, e ora ratou ia ˈna i te Atua; aore râ ratou i ite. 26 E ao aˈera, ua faaite faahou atura oia ia ratou ra, e te taputô ra hoi e toopiti o ratou, ua vavao atura oia ia raua ia hau, e na ô atura, E homa, hoê â hoi o orua fetii, eaha orua i hamani ino ai ia orua iho? 27 O te taata râ i hamani ino i tana taeae ra, ua hopara maira ia ˈna, na ô maira, Na vai oe i faariro ei tavana e ei haava ia matou? 28 E taparahi mai oe ia ˈu mai ta oe i taparahi i te taata o Aiphiti i nanahi ra? 29 Horo ê atura râ Mose i Midiana i taua parau ra, purutia ˈtura i te reira fenua, e fanau aˈera a ˈna pue tamarii tamaroa i reira toopiti. 30 E a maha aˈera ahururaa o te matahiti i hope, ua fa maira te hoê melahi a te Fatu ia ˈna ra i roto i te auahi, i te hoê pu aihere i te medebara i te mouˈa ra i Sinai. 31 E ia hiˈo atura Mose, umere atura oia i taua orama ra; e ia faafatata ˈtura oia i pihai iho e hiˈo, o te reo maira o te Fatu ia ˈna, 32 na ô maira, O vau te Atua o to mau metua ra, o te Atua o Aberahama, e te Atua o Isaaka, e te Atua hoi o Iakoba. Rurutaina ihora Mose, aita aˈera e hiˈo atu i te mǎtaˈu. 33 Ua parau maira te Fatu ia ˈna, A iriti na i to tamaa i to avae ihora, e vahi moˈa tena na vahi ta oe e tia mai na. 34 Ua hiˈo tamau maite au i te pohe o tau mau taata i Aiphiti ra, e ua faaroo vau i to ratou autâ, i haere mai nei au i raro nei e faaora ia ratou: e teie nei, e haere mai oe i ǒ nei, e tono vau ia oe i Aiphiti. 35 O taua Mose ra ta ratou i hopara ra, a na ô mai ai ra e, Na vai oe i faariro ei tavana e ei haava, oia tei tonohia ˈtu e te Atua ei tavana e ei faaora, i te rima o te melahi i fa mai ia ˈna i roto i te pu aihere ra. 36 Na ˈna ratou i aratai mai, e rave atura hoi i te tapao e te semeio i taua fenua ra i Aiphiti, e te miti uteute ra, e te medebara hoi, e e maha ahururaa te matahiti.

37 O taua Mose ra hoi tei parau atu i te tamarii a Iseraela ra e, Na to outou Atua na Iehova e faatupu i te hoê peropheta no outou, ei roto i to outou mau taeae na, mai ia ˈu atoa nei â te huru, oia ta outou e faaroo. 38 Oia atoa hoi tei roto i te ekalesia i te medebara ra, oia atoa hoi e te melahi i parau mai ia ˈna i te mouˈa ra i Sinai, oia atoa hoi e to tatou hui metua ra; o te rave atu i te parau ora e hopoi mai na tatou ra: 39 oia tei ore i faaroohia e to tatou hui metua ra, e hopara ê atura ratou ia ˈna, e hoˈi faahou atura hoi to ratou aau i Aiphiti; 40 a na ô atu ai ia Aarona ra e, E hamani oe i te atua ei na mua ia tatou; area Mose i aratai mai ia tatou mai Aiphiti maira, aore ïa tatou i ite ia ˈna. 41 Ua hamani ihora ratou i te kafa i taua mau mahana ra, e hopoi atura hoi i te tusia i taua idolo ra, e oaoa ˈtura i ta to ratou iho rima i hamani ra. 42 Fariu ê atura te Atua, faarue maira ia ratou ia haamori noa na i to te raˈi; oia tei papaihia i roto i te buka a te mau peropheta ra e, E te utuafare o Iseraela e, i hopoi mai outou i te puaa tiapaihia, e te tusia ia ˈu anaˈe, i te medebara ra e e maha ahuru ra te matahiti ra? 43 Aore, ua hopoi râ outou i te sekene o Moloha, e te fetia o to outou atua o Remephana, te mau hohoˈa ta outou i hamani ei haamoriraa ra; e teie nei, e hopoi ê au ia outou i ǒ ê roa ˈtu i Babulonia. 44 E sekene faaiteraa hoi to to tatou hui metua i te medebara i opuahia e ana, a parau mai ai ia Mose ra e, e hamani oe mai te huru ta oe i ite ra. 45 O ta to tatou hui metua i rave ra, e ua hopoi maira ratou atoa o Iosua i te fenua o te etene, ta te Atua i tiavaru ê atu i mua i te aro o to tatou hui metua ra, e tae roa aˈenei i te anotau ia Davida nei ra; 46 o tei herehia mai i mua i te aro o te Atua ra, e hinaaro aˈera oia ei fare to te Atua o Iakoba. 47 Na Solomona râ i faatia i te fare no ˈna. 48 E ore râ te Teitei e parahi i te hiero i hamanihia e te rima, ta te peropheta i parau maira e, 49 Te na ô maira Iehova, O te raˈi to ˈu terono, e o te fenua to ˈu taahiraa avae, eaha te huru o ta outou hiero ia faatia no ˈu? e eihea vau parahi ai? 50 E ere anei na tau rima i hamani i te mau mea atoa nei?

51 E te feia etaeta nei, e te aau e te tariˈa peritome-ore-hia nei, e patoi â ïa outou i te Varua Maitai: Mai to outou hui metua ra, oia atoa outou. 52 O vai to te mau peropheta ra i ore i hamani-ino-hia e to outou hui metua ra? e ua taparahi ratou i te feia i faaite atea mai i te haerea mai o taua Taata Parau-Tia ra; e ua riro iho nei outou ei haavare atu ia ˈna, e ei taparahi hoi. 53 Ua tuuhia mai hoi te ture ia outou na roto i te nanai melahi ra, e aore aˈenei outou i haapao i te reira. 54 E tei te faarooraa ratou i taua mau parau ra, putapû atura to ratou aau i te riri, aati atura to ratou poa ia ˈna. 55 Î aˈera râ oia i te Varua Maitai, e hiˈo tamau maite atura i nia i te raˈi, e ite atura i te hanahana o te Atua, e ia Iesu i te tia-maite-raa i te rima atau o te Atua ra. 56 Ua na ô aˈera oia, Inaha, te ite atura vau i te raˈi, ua vevetehia, e te Tamaiti a te taata i te tiaraa i te rima atau o te Atua ra. 57 Ua porutu maira to ratou reo, opanipani ihora i to ratou mau tariˈa, horo pupara noa maira ratou atoa i nia ia ˈna. 58 Arato atura ia ˈna i rapae i taua oire ra, pehi ihora ia ˈna i te ofai; e na taata i ite ra, tuu atura i to raua ahu i te pae avae o te hoê taata apî ra, o Saulo te iˈoa. 59 Ua pehi ihora ratou ia Setephano i te ofai, te pure noa ra oia, te na ô ra, E tau Fatu, e Iesu e, a rave mai oe i tau varua. 60 Topa turi ihora oia, ua pii hua ˈtura te reo, E te Fatu, eiaha teie nei hara e haio tia ia ratou nei: e teie te na reiraraa ra, mairi atura tana taoto.