Ohipa

TE HARA E TE POHE O ANANIA E TANA VAHINE O SAPHIRA.

5 O te hoê taata râ o Anania te iˈoa, e tana vahine o Saphira hohoo atura i te fenua. 2 E huna ihora i te hoê pae i taua hoo ra, ua ite atoa hoi tana vahine; e hopoi maira hoi i te hoê pae, tuu ihora i te pae avae o te mau aposetolo ra. 3 Ua parau atura Petero, E Anania e, eaha to aau i riro roa ˈi ia Satani, i haavare ai oe i te Varua Maitai, i huna ˈi i te hoê pae hoo i te fenua na? 4 I te vai-noa-raa ra, e ere anei to oe iho na? ia hoo na ra hoi, e ere anei tei ia oe â? eaha hoi oe i faatupu ai i roto i to aau i tena na parau? o te Atua ta oe i haavare na, e ere i te taata. 5 Tei te faarooraa mai Anania i taua parau ra, mairi ihora i raro, unuhi roa aˈera: mǎtaˈu roa anaˈe ihora te feia atoa i ite i taua mea ra, 6 Ua tia aˈera te mau taata apî ra, viri ihora ia ˈna, e hopoi atura i rapae, tanu atura. 7 E e toru aˈera hora i mairi, ua haere atoa maira tana vahine i roto, aore i ite i taua mea ra. 8 Ua parau atura Petero ia ˈna, E faaite mai oe, o te hoo mau anei teie i ta orua i hoo i te fenua na? Ua parau maira oia, E, oia tena. 9 Ua parau atura Petero ia ˈna, Eaha orua i faaau ai i ta orua parau e tauvere i te Varua o te Fatu na? inaha, tei te uputa mai nei te avae o te feia i tanu i to tane na, e na ratou atoa oe e hopoi i rapae au. 10 Ua mairi ihora oia i reira ra i raro i tana pae avae ra, pohe roa aˈera: e ia tomo mai te mau taata apî ra i roto, roohia maira ua pohe roa oia, hopoi atura i rapae, tanu atura i pihai iho i tana tane ra. 11 Roohia ihora taua ekalesia atoa ra e te mǎtaˈu, e te feia atoa i ite i taua parau ra. 12 E rave rahi te tapao e te semeio i ravea e te rima o te mau aposetolo ra i ropu i te taata atoa: e tairuru aˈera ratou atoa i roto i te poretiko o Solomona ra. 13 Area te hoê pae ra, aore roa ïa i te hoê i amui tia mai ia ratou i te mǎtaˈu; ua aruehia râ ratou e te taata. 14 Te feia râ i faaroo i te Fatu ra, e rave rahi roa ˈtura ïa tei amui mai ia ratou ra, te tane e te vahine atoa hoi. 15 E hopoi maira ratou i te feia maˈi i rapae i te mau aroâ ra, tuu ihora i nia i te roi e te roi rii hopohopoi ra, peneiaˈe o te aea vetahi e te ata o Petero ia haere na reira ihora. 16 E rave rahi hoi to te mau oire ra i haere mai e ati noa ˈˈe, i te hopoiraa mai i te feia maˈi e te feia i peapea i te varua faufau i Ierusalema: e faaora-anaˈe-hia ihora ratou atoa.

17 Ua tia aˈera te tahuˈa rahi ra, e te feia atoa i pihai iho ia ˈna ra, (oia hoi te pǔpǔ Sadukea ra,) ua î roa aˈera i te riri. 18 Ua haru maira to ratou rima i te mau aposetolo ra, faatomo atura ia ratou i roto i te tapearaa taata iino ra. 19 Na te hoê melahi râ a te Fatu i iriti i te mau opani i taua tapearaa ra i te rui, e ua aratai maira ia ratou i rapae, e ua na ô atura, 20 A haere i roto i te hiero tia ˈi, a parau atu ai i te taata i te mau parau atoa o teie nei ora. 21 E ite aˈera ratou i te reira, haere atura i roto i te hiero i te poipoi roa, haapii atura. Ia tae mai râ te tahuˈa rahi ra, e te feia atoa i pihai iho ia ˈna ra, ua ope maira ratou i to te sunederi atoa o te tamarii a Iseraela ra, ua tono atura i te feia toroa i te tapearaa ra e aratai mai ia ratou. 22 Tae atura râ taua feia toroa ra, roohia ˈtu, aita ra ratou i roto i te tapearaa ra; ua hoˈi maira ratou e faaite, 23 na ô maira, Roohia ˈtura e matou, te mau maitai ra te opani o te tapearaa ra, e te feia tiai hoi i te tia-noa-raa i rapae i te mau uputa ra; ia iriti râ matou i te opani ra, aore roa e taata o roto. 24 E ite aˈera te tahuˈa rahi e te tavana o te hiero ra, e te autahuˈa rarahi atoa ra i te reira parau, maere ihora ratou i taua parau ra, e eaha ra. 25 Ua haere maira te hoê taata ua parau maira ia ratou, na ô maira, Inaha, te mau taata ta outou i faatomo i roto i te tapearaa, tera ˈˈe e tia noa ˈˈe i roto i te hiero, te haapii aˈera i te taata. 26 Ua tii atura te tavana e te feia toroa atoa, ua aratai maira ia ratou ma te puai ore, i mǎtaˈu ratou i te taata o te pehihia ratou i te ofai. 27 E ia arataihia mai ratou ra, tuu atura ia ratou i mua i te aro o te sunederi ra; ua ui maira te tahuˈa rahi ra ia ratou, na ô maira, 28 Aore matou i parau hua ˈtu ia outou, eiaha outou e haapii ma teie nei iˈoa? e inaha, ua î roa Ierusalema ia outou i ta outou parau, e te hinaaro na outou ia haio mai te toto o teie nei taata i nia ia matou nei. 29 Ua parau atura Petero e te mau aposetolo atoa ra, na ô atura, O te Atua ta matou e faaroo e tia ˈi eiaha te taata. 30 Ua faatia iho nei hoi te Atua o to tatou hui tupuna ra ia Iesu, o ta outou i taparahi i te patitiraa i nia i te raau ra. 31 Oia ta te Atua i faateitei aˈenei i tana rima atau ei Arii e ei Ora, ei horoa mai hoi i te tatarahapa no Iseraela, e te matara hoi o te hara. 32 Ei ite hoi matou no ˈna i taua mau parau nei, e te Varua Maitai atoa ta te Atua i horoa mai i te feia i faaroo ia ˈna ra.

33 E ite aˈera ratou i te reira, putapû atura to ratou aau, e feruri noa ihora i te ravea e pohe ai ia ratou. 34 Ua tia aˈera te hoê Pharisea i taua sunederi ra i nia, o Gamaliela te iˈoa, e haapii ture, e taata haamaitaihia e te taata atoa, ua faaue atura e aratai i te mau aposetolo i rapae e ia roovau iti aˈe; 35 ua parau atura ia ratou, E te mau taata o Iseraela nei, e ara ia outou i ta outou raveraa ˈtu i tena na mau taata. 36 Tupu aˈenei Teuda i mutaa aˈenei, i te faaahaaharaa ia ˈna iho e, e taata rahi oia; amui atoa ˈtura te taata ia ˈna e maha atoa hanere: taparahihia ˈtura oia, e te feia atoa i faaroo ia ˈna ra, purara ê atura ïa, e mou atura. 37 I tupu aˈenei hoi i muri aˈe ia ˈna Iuda i Galilea, i te anotau papairaa iˈoa ra; e amui atura oia i te taata e rave rahi i te peeraa ˈtu ia ˈna: e pohe atura oia: e te feia atoa i pee ia ˈna ra, purara ê atura ïa. 38 E teie nei, teie ta ˈu parau ia outou, Eiaha e hauti noa ˈtu i tena na mau taata, e vaiiho noa ˈtu; na te taata teie parau e teie nei ohipa, e morohi noa ïa; 39 na te Atua râ, eita ïa e morohi ia outou; o te riro noa ˈtu hoi outou ei feia tamaˈi atu i te Atua. 40 Ua faatia maira ratou ia ˈna, e faahoˈihia maira e ratou te mau aposetolo i roto, ua papai atura, parau atura ia ratou, eiaha roa ratou e parau ma te iˈoa o Iesu, tuu atura ia ratou. 41 Haere atura ratou mai te aro atu o te sunederi ra ma te oaoa, i te mea no to ˈna iˈoa i manaˈohia ˈi ratou e au ia ratou taua hamani ino ra. 42 E aore e mahana tuua ia ratou i te aˈo, e te haapii atu i te taata, e o Iesu â te Mesia, i roto i te hiero, e i tera fare, i tera fare.