Ohipa

Te Ohipa a te mau Aposetolo ra

TE PARAHIRAA O TO TATOU FATU I TE AO NEI I MURI AˈE I TANA TIA-FAAHOU-RAA RA.

1 I papai na vau i tei mutaa ihora papaa parau, e Teophilo, no te mau mea atoa a Iesu i rave e ta ˈna i haapii ra, 2 e tae roa aˈenei i te mahana i ravehia ˈtu ai oia i nia ra, ia oti te mau aposetolo i maitihia e ana ra, i te poroihia e ana i te Varua Maitai. 3 O ta ˈna atoa ïa i faaite ia ˈna iho i te oraraa, i muri aˈe i tana poheraa, ma te tapao hapa ore e rave rahi ra; e maha hoi ahururaa o ˈna rui i te hiˈohiˈoraahia e ratou, e te parauraa oia ia ratou i te parau o te basileia o te Atua. 4 E haaputuputu aˈera oia ia ratou ra, ua aˈo atura ia ratou eiaha e faarue ia Ierusalema, e tiai râ i ta te Metua i parau maira, o ta outou i ite na ia ˈu ra. 5 Ua bapetizo â hoi Ioane i te pape, e bapetizohia râ outou i te Varua Maitai i eie nei pue mahana. 6 E putuputu aˈera ratou, ua ui maira ratou ia ˈna, na ô maira, E te Fatu, ei teie nei anei oe e faahoˈi mai ai i te hau ia Iseraela? 7 Ua parau atura râ oia ia ratou, Aore ïa i haapaohia e ia ite outou i te taime e te anotau, i vaiihohia e te Metua ia ˈna ihora. 8 E noaa râ to outou mana i te Varua Maitai ia haere mai i nia iho ia outou: e ei ite hoi outou no ˈu i Ierusalema nei e Iudea atoa hoi e ati noa ˈˈe, e Samaria, e tae noa ˈtu i te hopea o te fenua ra. 9 E te parau noa ra oia i taua mau parau nei, e te hiˈo noa maira ratou ia ˈna, ravehia ˈtura oia i nia, e vehîa maira oia e te ata, moe atura oia i to ratou mata. 10 E tei to ratou tiatonu-maite-raa i nia i te raˈi i te peeraa ˈtu oia i nia ra, inaha, te tia noa maira e toopiti pue taata i pihai iho ia ratou ma te ahu teatea; 11 o tei parau mai ïa ia ratou e, e te mau taata o Galilea nei, eaha outou i tia noa ˈi e i tiatonu mârô ai i nia i te raˈi ra? o Iesu nei â, tei ravehia aˈenei i nia i te raˈi, e hoˈi mai ïa mai te reira atoa ra, mai ta outou i ite atu ia ˈna i te revaraa ˈtu i nia i te raˈi ra.

12 Hoˈi maira ratou i Ierusalema, mai te mouˈa mai i parauhia ra o Oliveta, tei pihai iho i Ierusalema, mai te vahi haerehia i te sabati nei te huru. 13 E tae maira ratou i roto i te oire, tomo atura ratou i roto i te hoê piha i nia, e ruru atoa ˈi Petero ma ra, e Iakobo, e Ioane, e Anederea, e Philipa, e Toma, e Baretolomea, e Mataio, e Iakobo a Alephaia ra, e Simona Zelote, e te taeae hoi o Iakobo ra o Iuda. 14 Tamau maite atura ratou atoa i te pure e te aniraa ma te aau hoê, e te mau vahine atoa, e o Maria hoi te metua vahine o Iesu ra, e to ˈna atoa ra fetii.

15 E i tei reira ra mau mahana, ua tia aˈera Petero i nia i ropu i te mau pîpî ra, ua na ô maira, (hoê hanere e piti ahururaa te taata i putuputu mai,) 16 e homa, e te mau taeae, ia tupu te parau i papaihia ra e tia ˈi, ta te Varua Maitai i parau mai i te vaha o Davida i mutaa iho ia Iuda ra, o tei riro ei aratai i te feia i haru ia Iesu ra. 17 I amui-atoa-hia hoi oia i roto ia matou nei, i noaa atoa hoi teie nei toroa ia ˈna. 18 E hoo na ihora e taua taata ra te hoê fenua iti i te utua o ta ˈna hara, e mairi ihora oia i raro te mata, amaha ˈtura ropu ia ˈna, purehu atura tana aau i rapae. 19 E ua itea taua mea ra e to Ierusalema atoa, e mairihia ihora taua maa fenua iti ra i ta ratou iho parau, Akeladama, oia hoi, O te fenua toto. 20 Ua papaihia hoi i roto i te buka Salamo, Ia ano to ˈna parahiraa, e eiaha roa ei taata e parahi i reira, e ia riro hoi to ˈna toroa ia vetahi ê. 21 E teie nei, te mau taata i amui atoa mai ia tatou, a parahi atoa ˈi te Fatu ra o Iesu i ropu ia tatou nei ra, 22 mai to ˈna bapetizoraahia mai â e Ioane ra, e tae roa mai nei i te mahana i ravehia ˈtu ai oia i nia ra, ia faataahia te hoê o ratou e tia ˈi, ei ite e tatou atoa hoi i tana tia-faahou-raa i nia nei. 23 Ua tapao atura ratou i e toopiti pue taata, o Iosepha Barasaba, o tei mairihia ia Iuseto ra, e o Matatia hoi. 24 Ua pure ihora ratou, na ô atura, E te Fatu, o tei ite i te aau o te taata atoa nei, e faaite mai oe i ta oe i hinaaro i eie nei pue taata, 25 ia rave atoa mai oia i teie nei toroa i te aposetolo, i mairi ia Iuda i te hara, ia tae oia i to ˈna ra vahi mau. 26 Ua tuu ihora ratou i te kelero, riro atura te kelero ia Matatia; amui-atoa-hia maira oia i te mau aposetolo tino ahuru ma hoê ra.