Ioane

TO TE MESIA HAERE-FAAHOU-RAA MAI I TE MAU PǏPǏ I TE MITI RA I TIBERIA.

21 E muri aˈera, ua faaite faahou maira Iesu ia ˈna iho i te mau pǐpǐ i te roto i Tiberia ra, i na ô oia i te faaiteraa mai. 2 E te putuputu atoa ra Simona Petero ma, e o Toma o te parauhia ia Didimo ra, e o Natanaela o Kana i Galilea ra, e na tamarii hoi a Zebedaio ra, e o e toopiti hoi pue pǐpǐ â a Iesu ra. 3 Ua parau atura Simona Petero ia ratou, Te haere nei au e ravaai. Ua parau maira ratou, E haere atoa tatou. Haere atura ratou i reira ra i nia i te pahi, aore ra a ratou faufaa i noaa i te reira rui. 4 E poipoi aˈera, te tia noa ra Iesu i te pae roto ra; aore râ te mau pǐpǐ i ite e, o Iesu. 5 Ua parau maira Iesu ia ratou, E te mau tamarii ra, e maa ta outou? Ua parau atura ratou, Aita. 6 Ua parau maira Iesu ia ratou, A tuu na te upeˈa i te tau atea o te pahi na, e noaa ïa ta outou. Ua tuu atura ratou, e aita aˈera e maraa ia ratou ia ume i te rahi o te iˈa. 7 Ua parau atura taua pǐpǐ herehia e Iesu ra ia Petero, O te Fatu; faaroo aˈera Petero e, o te Fatu tera, ua ahu ihora i tana ahu i nia iho, (o tei vaiiho-ê-hia e ana ra,) e tatia ihora hoi e oua ˈtura oia i raro i taua roto ra. 8 Na nia maira te hoê pae pǐpǐ ra i te boti, ma te upeˈa e te iˈa i te umeraa mai. (Aita hoi i maoro rea uta, e au i te piti hanere o te kubiti ra.) 9 E tae maira ratou i te pae, hiˈo atura ratou i te auahi i te amaraa, e te iˈa i nia iho e te pane hoi. 10 Ua parau atura Iesu ia ratou, A rave mai na i e fanu iˈa i ta outou iˈa i noaa na. 11 Haere atura Simona Petero i nia i te boti, ua ume maira i te upeˈa i te pae, ua î roa i te iˈa rarahi, hoê hanere e pae ahuru e toru tiahapa; aore râ i motumotu te upeˈa i taua iˈa rarahi ra. 12 Ua parau atura Iesu ia ratou, A haere mai a amu. E aore roa te hoê pǐpǐ i ui noa ˈtu e, O vai oe, i te mǎtaˈu, ua ite hoi ratou, e o te Fatu ïa. 13 Ua haere atura Iesu, rave ihora i te pane, ua tuu atura ia ratou ra, e te iˈa atoa hoi. 14 O te toru teie i to Iesu faaiteraa mai ia ˈna iho i te mau pǐpǐ ra, i muri aˈe i tana tiaraa mai te pohe mai ra.

15 E paia aˈera ratou, ua parau atura Iesu ia Simona Petero, E Simona a Iona e, te rahi na to oe hinaaro ia ˈu i teie? Ua parau maira oia, E te Fatu e, ua ite oe e, te hinaaro atu nei au ia oe. Ua parau atura Iesu ia ˈna, A faaamu i tau mau arenio. 16 Ua parau faahou atura oia ia ˈna, o te piti ïa o te parauraa ˈtu, E Simona a Iona e, te hinaaro na oe ia ˈu? Ua parau maira oia ia ˈna, E te Fatu, e, ua ite oe e, te hinaaro atu nei au ia oe. Ua parau atura Iesu ia ˈna, A tiai i tau mau mamoe. 17 Ua parau faahou atura oia ia ˈna, o te toru ïa o te parauraa ˈtu, E Simona a Iona e, te hinaaro na oe ia ˈu? Ua oto ihora Petero i te mea a toru aˈera o ˈna uiraa mai ia ˈna e, Te hinaaro na oe ia ˈu? e ua parau maira ia ˈna, E te Fatu, aore roa e mea toe i te itea ia oe, ua ite oe e, te hinaaro atu nei au ia oe. Ua parau atura Iesu ia ˈna, A faaamu i tau mau mamoe. 18 Amene, amene, e parau atu vau ia oe, I to apîraa ra, ua tatia oe ia oe iho, e hahaere ihora oe i ta oe ra vahi hinaaro; ia ruhiruhia râ oe, na oe e faatoro i to rima, e na te tahi ê e ruuruu ia oe, e a hopoi atu ai hoi ia oe i te vahi hinaaro-ore-hia e oe ra. 19 Na reira ˈtura oia ei faaiteraa ˈtu ia ˈna i te huru o to ˈna pohe e maitai ai te Atua. E oti aˈera taua parau ra, ua parau atura oia ia ˈna, A pee mai ia ˈu.

20 Ua fariu maira Petero i muri, ite maira i taua pǐpǐ herehia e Iesu ra i te peera ˈtu, o tei hirinai i nia i tana ouma i te amuraa maa ra, o tei parau ra e, E te Fatu, o vai te taata e haavare mai ia oe? 21 Ua hiˈo maira Petero ia ˈna e, ua parau atura ia Iesu, E te Fatu, eahahia hoi teie nei taata? 22 Ua parau maira ia Iesu ia ˈna, I hinaaro vau i te vaiiho ia ˈna e ia tae noa mai au ra, eaha ta oe i reira? e pee mai oe ia ˈu. 23 Parare atura taua parau ra i te mau taeae ra e, eita taua pǐpǐ ra e pohe; aita râ Iesu i parau atu e eita oia e pohe, i na ô râ e, I hinaaro vau i te vaiiho ia ˈna e ia tae noa mai au ra, eaha ta oe i reira? 24 Teie taua pǐpǐ ra e parau atu i teie nei mau parau, e ua papai hoi i taua mau parau nei; e ua ite hoi matou e e parau mau ta ˈna. 25 E rave rahi â ta Iesu peu i rave, ahiri i hope atoa i te papaihia, te manaˈo nei au, e ore e tia i to te ao atoa nei ia farii mai i taua mau buka ra, ahiri i papaihia. Amene.