Ioane

TO IUDA TUURAA ˈTU IA IESU I TE RIMA O TE FEIA TAHUˈA E TE MAU PHARISEA.

18 E oti aˈera teie nei parau i te parauhia e Iesu ra, haere atura oia e ta ˈna mau pǐpǐ atoa na nia i te pape ra i Kederona, e ô tei reira, tomo atura oia i roto e ta ˈna mau pǐpǐ atoa. 2 Ua ite atoa Iuda i haavare ia ˈna ra i taua vahi ra, ua mataro hoi Iesu i te haere i reira e ta ˈna mau pǐpǐ atoa ra. 3 E tiihia ˈtura e Iuda te pǔpǔ faehau e te feia toroa i te mau tahuˈa rarahi ra e te mau Pharisea ra, e ua haere maira ma te mori, e te rǎmǎ, e te mauhaa atoa hoi. 4 Area Iesu, ua ite ïa i te mau mea atoa e roohia mai ai oia ra, haere atura e ua parau atura oia ia ratou, O vai ta outou e imi na? 5 Ua parau maira ratou ia ˈna, O Iesu o Nazareta ra. Ua parau atura Iesu ia ratou, O vau nei hoi ïa. Tei ia ratou atoa ra Iuda i haavare ia ˈna. 6 E tei te parauraa ˈtu oia ia ratou ra e, O vau nei hoi ïa, otohe atura ratou i muri e hiˈa tufera ˈtura i raro i te repo. 7 Ua ui faahou atura oia ia ratou, O vai ta outou e imi na? Ua parau maira ratou, O Iesu o Nazareta ra. 8 Ua parau atura Iesu, Ua parau atu hoi au ia outou e, o vau nei hoi ïa; te imi nei outou ia ˈu ra, e tuu atu ia ratou nei ia haere na. 9 Tia ˈtura ta ˈna i parau ra e, O ta oe i ho mai no ˈu ra, aore roa ïa te hoê o ratou i moe ia ˈu.

10 E ˈoˈe ta Simona Petero, e ua unuhi aˈera, tairi atura i te tavini o te tahuˈa rahi ra, e motu ê atura tana tariˈa atau. O Malako te iˈoa o taua tavini ra. 11 Ua parau atura Iesu ia Petero, A oomo i to ˈoˈe i roto i te vehî: eiaha vau e inu i te auˈa a te Metua i ho mai na ˈu ra? 12 Ua haru maira te pǔpǔ faehau ra, e te raatira, e te hui raatira o te ati Iuda ra ia Iesu, ua ruuruu ihora ia ˈna. 13 E ua aratai atura ia ˈna ia Ana ra, no te mea e metua hoovai oia no Kaiapha, o te tahuˈa rahi ïa i te reira matahiti. 14 O Kaiapha hoi tei aˈo atu i te ati Iuda ra e, Ia pohe atu te hoê taata e tia ˈi, eiaha te taata atoa.

15 Ua pee atura Simona Petero, e te hoê pǐpǐ atoa ia Iesu: ua ite hoi te tahuˈa rahi i taua pǐpǐ ra, e ua tomo atura i roto i te fare o te tahuˈa rahi ra e Iesu atoa hoi. 16 O Petero râ, tia noa ihora ïa i rapae i te uputa ra. Ua haere atura taua pǐpǐ i itehia e te tahuˈa rahi ra i rapae, ua parau atura i te potii tiai uputa ra, e ua tuu maira ia Petero i roto. 17 Ua parau maira taua potii tiai uputa ra ia Petero, E ere anei oe i te hoê pǐpǐ a teie nei taata? Ua parau atura oia, E ere au. 18 Te tia noa ra te mau tavini e te feia toroa i te pae auahi i ta ratou i tahu ra, no te maariri, e te haamahanahana ra ia ratou iho. E te tia atoa ra Petero i roto ia ratou, te haamahanahana atoa ra ia ˈna iho.

19 Ua ui maira te tahuˈa rahi ra ia Iesu i ta ˈna mau pǐpǐ, e ta ˈna parau e haapii ra. 20 Ua parau atura Iesu ia ˈna, I parau faaite noa vau i te taata atoa; e tiâ vau i roto i te mau sunago ra e i roto i te hiero ra i te haapiiraa, i te vahi e rǔrǔ ai te ati Iuda ra: aore roa vau i parau i te vahi moemoe. 21 Eaha oe i ui mai ai ia ˈu? e ui atu i te feia i faaroo mai i ta ˈu i parau atu ia ratou ra. Ua ite hoi ratou i ta ˈu i parau atu. 22 E tei te na reiraraa ˈtu oia ra, ua moto maira ia Iesu te hoê o te feia toroa e tia noa i pihai iho ia ˈna ra, ua parau maira, E na reira oe i te parau atu i te tahuˈa rahi? 23 Ua parau atura Iesu, Ua hapa ta ˈu i parau aˈenei, a faaite mai na i te hapa; e parau-tia râ, eaha hoi oe i moto mai ai ia ˈu?

24 E tuua taaihia ˈtura oia e Ana ia Kaiapha i te tahuˈa rahi ra. 25 Te tia noa ra Simona Petero i te haamahanahanaraa ia ˈna ihora, ua ui maira ratou ia ˈna, E ere anei oe i te hoê pǐpǐ a ˈna nei? Ua huna ˈtura oia, na ô atura, E ere au. 26 Ua parau maira te hoê tavini o te tahuˈa rahi ra, no te fetii o te taata no ˈna te tariˈa i tâpûhia e Petero ra, E ere tei ite au ia oe i roto i te ô ra e oia atoa ra hoi? 27 Ua huna faahou atura Petero, e aaoa ihora te moa i reira ra.

28 E ua aratai atura ratou ia Iesu i te haavaraa ra, mai te fare mai o Kaiapha ra: ua poipoi: e aita te ati Iuda i tomo i roto i te haavaraa ra, o te viivii ratou, e o te ore hoi ratou o te amu i te pasa ra. 29 Ua haere maira Pilato i rapae au ia ratou ra, ua parau maira, I pari mai outou i teie nei taata i te aha? 30 Ua parau atura ratou ia ˈna, na ô atura, Ahiri oia e ere i te taata hara ra, eita matou e tuu atu ia ˈna ia oe na. 31 Ua parau maira Pilato ia ratou, A rave maori outou a haava ˈtu ia ˈna i ta outou ture. Ua parau atura te ati Iuda ia ˈna, Eita e au i te ture ia taparahi matou i te taata. 32 Tupu atura ta Iesu i parau ra, o ta ˈna i faaite mai i te huru o to ˈna ra pohe. 33 Hoˈi atura Pilato i roto i te haavaraa ra, ua parau atura ia Iesu, na ô atura ia ˈna, O te Arii oe o te ati Iuda? 34 Ua parau maira Iesu ia ˈna, Na oe iho anei tena na parau, e na vetahi ê anei oe i na reira mai ia ˈu? 35 Ua parau atura Pilato, E ati Iuda anei au? Na to oe iho fenua e na te mau tahuˈa rarahi ra oe i tuu mai ia ˈu nei. Eaha na oe? 36 Ua parau maira Iesu, E ere i to teie nei ao to ˈu basileia; ahiri no teie nei ao to ˈu basileia, ua faaitoito ïa tau mau tavini ia ore au ia tuuhia ˈtu i te rima o te ati Iuda; e ere râ to ˈu basileia i to ǒ nei. 37 Ua parau atura Pilato, O te Arii maori oe? Ua parau maira Iesu, Te parau maira oe e e Arii au. I fanau mai ai au, e i haere mai ai hoi au i te ao nei, e faaite i te parau mau. No te parau mau oia ra, e faaroo ïa i tau reo. 38 Ua ui atura Pilato ia ˈna, Eaha te parau mau? E tei te na reiraraa ra, haere faahou maira oia i rapae i te ati Iuda ra, ua parau maira ia ratou, Aita roa to taua taata aˈera ino i itea ia ˈu. 39 O te peu râ e tuu vau i te hoê taata ia outou i te pasa ra, e tia anei ia outou ia tuu atu vau ia outou i te Arii o te ati Iuda ra? 40 Ua pii atura ratou atoa, na ô atura, Eiaha teie nei taata, o Baraba râ. E haru taoˈa hoi Baraba.