Ioane

TO IESU HOROIRAA I TE AVAE O TE MAU PǏPǏ, EI HAAPIIRAA ˈTU EIAHA E FAATEITEI.

13 Hou te oroa i te pasa ra i ite ai Iesu e ua tae i to ˈna hora e faarue mai ai oia i teie nei ao, a reva ˈtu ai i te Metua ra, oia râ i aroha i tana taata i te ao nei, aroha noa ˈtura oia ia ratou e tae noa ˈtura i te hopea ra. 2 Ia ratou hoi i amu i taua amuraa maa rui ra, ua tuu mai na Satani i te parau i roto i te aau o Iuda Isakariota a Simona ra e haavare ia ˈna. 3 Ite noâ Iesu e ua pûpû mai te Metua i te mau mea atoa tei tana rima, e mai ǒ mai oia i te Atua ra, e te hoˈi atura hoi oia i te Atua ra; 4 ua tia aˈera oia i nia i taua amuraa maa ra, haapae atura i tana ahu, tatua ihora ia ˈna i te hoê ahu horoi. 5 Ua ninii ihora i te pape i roto i te hoê auˈa, ua horoi atura i te avae o te mau pǐpǐ ra, e horoi atura hoi i te ahu horoi i tatuahia e ana ra. 6 E tae atura oia ia Simona Petero ra, ua parau maira Petero ia ˈna, E te Fatu, e horoi mai hoi oe i tau avae? 7 Ua parau atura Iesu ia ˈna, na ô atura, Aita oe i ite i ta ˈu e rave nei i tena na, e ite râ oe a muri atu. 8 Ua parau maira Petero ia ˈna, Eiaha roa oe e horoi i to ˈu avae. Ua parau atura Iesu ia ˈna, Ia ore au ia horoi ia oe ra, aita roa a oe faufaa ia ˈu nei. 9 Ua parau maira Simona Petero ia ˈna, E te Fatu, eiaha maori tau avae anaˈe ra, o tau rima atoa e tau upoo atoa hoi. 10 Ua parau atura Iesu ia ˈna, O tei hopu ra, atira ïa, maori râ o tana avae anaˈe te horoi; o tana tino atoa ra ua mâ ïa; e ua mâ hoi outou, aita râ i hope. 11 Ua ite hoi oia i te taata e haavare ia ˈna ra, i parau atu ai oia e, Aore outou i hope i te mâ.

12 E oti aˈera to ˈna horoiraa i to ratou avae, ua ahu ihora i tana ahu, taoto faahou ihora i raro i te amuraa maa ra, ua parau atura ia ratou, Te ite nei outou i ta ˈu i rave iho ia outou nei? 13 Te parau nei hoi outou ia ˈu e, O te Orometua e te Fatu; e parau-tia ta outou: oia mau â hoi au nei. 14 Ua horoi una hoi au o te Orometua e te Fatu i to outou avae, e horoi atoa hoi outou i to outou iho avae e tia ˈi. 15 Ua horoa ˈtu na hoi au i te haapaoraa na outou, o ta ˈu i rave iho ia outou nei, ia na reira atoa hoi outou. 16 Amene, amene, e parau atu vau ia outou, Aore te tavini i hau i to ˈna ra fatu, e te aposetolo aore ïa i hau i tei tono ia ˈna. 17 E ao to outou, e te feia i ite i teie nei mau parau, ia haapao outou i taua parau ra.

18 E ere to outou atoa ta ˈu e parau nei, ua ite au i ta ˈu i maiti; ia tupu râ te parau i papaihia ra e tia ˈi, O te amu i ta ˈu ra amuraa maa, ua faateitei oia i to ˈna poro avae ia ˈu. 19 I faaite atea ˈtu na vau ia outou i teie nei parau, ia faaroo outou ia tupu ra e, o vau ïa. 20 Amene, amene, e parau atu vau ia outou, O te ite mai i ta ˈu e tono ra, ua ite mai ïa ia ˈu, e te ite mai ia ˈu ra, ua ite ïa ia ˈna i tei tono mai ia ˈu nei ra.

21 Tei te parauraa ˈtu Iesu i teie nei mau parau, horuhoru roa ˈtura tana aau, e ua parau atura, na ô atura, Amene, amene, e parau atu vau ia outou, E haavare mai te hoê o outou nei ia ˈu. 22 Ua hiˈo aˈera te mau pǐpǐ ratou ratou iho, ma te maere i ta ˈna e parau ra. 23 Te hirinai noa ra te pǐpǐ here a Iesu ra i nia i tana ouma. 24 Ua tuou maira Simona Petero ia ˈna, ia ui atu oia i ta ˈna e parau ra. 25 Ua parau atura tei hirinai i nia i te ouma o Iesu ra ia ˈna, E te Fatu, o vai? 26 Ua parau maira Iesu, O ta ˈu e hopoi atu i teie nei maa maa iti ia uhihia e au ra, e ua uhihia ihora taua maa maa iti ra, ua hopoi atura na Iuda Isakariota a Simona ra. 27 E pau aˈera taua maa maa iti ra, ua tomo maira Satani i roto ia ˈna. Ua parau atura Iesu ia ˈna. Ta oe e rave ra ia peepee i te rave. 28 Aita roa râ te hoê i taua amuraa maa ra i ite i te mea i parau atu ai oia ia ˈna i taua parau ra. 29 Te manaˈo râ te hoê pae, no te mea tei ia Iuda te putê i parau atu ai Iesu ia ˈna e, e hoo i te hoo e au i taua oroa ra, e e hopoi atu i te taoˈa na te taata rii. 30 E tei te pauraa taua maa maa iti ra ia ˈna, haere atura ïa i reira ra i rapae i te rui.

31 E reva ˈtura oia, ua parau atura Iesu, Ua maitai te Tamaiti a te taata i teie nei, e ua maitai hoi te Atua ia ˈna. 32 Ua maitai te Atua ia ˈna ra, i haamaitaihia mai oia i te Atua ia ˈna iho, i teie nei â hoi te haamaitairaa ia ˈna. 33 E au mau tamarii nei, no parahirahi aˈe au i ǒ outou nei, e imi outou ia ˈu; e ta ˈu i parau atu i te ati Iuda ra e, Te vahi ta ˈu e haere nei e ore outou e tae aˈe i reira, ta ˈu ïa parau ia outou i teie nei. 34 E tuu atu vau i te parau apî na outou, E aroha outou ia outou iho, mai ia ˈu e aroha ˈtu ia outou na, e aroha atoa hoi outou ia outou iho. 35 O te mea teie e ite ai te taata atoa e, e pǐpǐ outou na ˈu, ia aroha outou ia outou iho. 36 Ua parau maira Simona Petero ia ˈna, E te Fatu, e haere tia oe i hea? Ua parau atura Iesu ia ˈna, I teie nei vahi ta ˈu e haere nei, eita e tia ia oe ia pee mai ia ˈu i teie nei; e pee mai râ oe ia ˈu a muri atu. 37 Ua parau maira Petero ia ˈna, E te Fatu, eaha i ore i tia ˈi ia ˈu ia pee atu ia oe i teie nei? e horoa hoi au i to ˈu ora no oe. 38 Ua parau atura Iesu ia ˈna, E horoa oe i to oe ora no ˈu e? Amene, amene, e parau atu vau ia oe, e ore e aaoa te moa a taitoru atura o oe hunaraa ia ˈu.