Luka

TE TAVINI O TE RAATIRA HANERE I TE FAAORARAAHIA E TE MESIA RA.

7 E ia faaoti aˈera oia i ta ˈna atoa ra mau parau, o tei faaroohia e te taata atoa ra, tomo atura oia i roto i Kaperenaumi. 2 Ua pohe te tavini here a te hoê raatira hanere i te maˈi, ua faatata i te pohe. 3 E ite aˈera oia i te roo o Iesu, ua tono atura oia i te feia paari ati Iuda ra, e parau maitai atu ia ˈna e haere mai oia e faaora i tana tavini. 4 E tae atura ratou ia Iesu ra, parau maitai atura ratou ia ˈna, na ô atura, E taata au teie ia hamani maitai atu oe; 5 e aroha hoi oia i to tatou nunaa, e na ˈna i faatia i to matou sunago. 6 Ua haere maira Iesu e ratou atoa, e huru fatata maira ia ˈna taua fare ra, ua tono atura taua raatira hanere ra i te mau hoa, e parau atu ia ˈna e, E te Fatu, eiaha a haarahi oe, eita hoi au e au ia tomo mai oe i roto i tau fare: 7 i ore ai hoi au i manaˈo ai e, e au vau ia haere atu i mua i to aro na; e parau noa mai râ oe i te parau, e ora ïa tau tavini. 8 O vau atoa nei hoi, o raro aˈe ia vetahi ê, e faehau ra to raro aˈe ia ˈu, ia parau vau i te hoê, A haere, ua haere ïa; ia parau hoi i te tahi, A haere mai, ua haere mai ïa; e ia parau hoi i tau tavini, A na ô, ua na reira ïa. 9 E ite aˈera Iesu i taua parau ra, maere atura ia ˈna; ua fariu atura i te tiaa rahi i pee mai ia ˈna ra, na ô atura, E parau atu vau ia outou, aitâ vau i ite i teie faaroo i te rahi i Iseraela atoa nei. 10 Ua hoˈi maira taua feia i tonohia ra i te utuafare, roohia maira, ua ora taua tavini i pohe i te maˈi ra.

11 E ao aˈera, haere atura oia i roto i te hoê oire o Naina te iˈoa, e te mau pǐpǐ atoa na ˈna i te haereraa e te taata atoa e rave rahi. 12 E fatata maira ia ˈna te uputa o taua oire ra, inaha, e taata pohe, te hopoihia maira i rapae au, e tamaiti fanau tahi na to ˈna metua vahine e ivi hoi oia; e e rave rahi atoa to taua oire ra i reira. 13 E ite atura te Fatu i te metua vahine, aroha ˈtura ia ˈna, e ua parau atura, Eiaha e oto. 14 Ua faafatata ˈtura oia, rave atura i te iri hopoi ra (faaea noa ihora te feia i hopoi), na ô atura, E teie nei taata apî, a tia, te parau atu nei au ia oe. 15 Ua tia maira taua taata i pohe ra i nia, e ua parau maira, ua tuu atura Iesu ia ˈna i te metua vahine ra. 16 Roohia paatoa ihora ratou i te mǎtaˈu, e haamaitai atura i te Atua, na ô aˈera, E peropheta rahi teie i tupu iho nei i roto ia tatou nei, e ua hiˈo aroha mai te Atua i to ˈna taata. 17 Parare roa ˈtura taua roo no ˈna ra e ati noa aˈera Iudea, e te mau fenua atoa i reira iho.

18 Ua faaite atura te mau pǐpǐ a Ioane ia ˈna i taua mau parau nei. 19 Ua parau atura Ioane i te toopiti o ratou, o ta ˈna ïa i tono atu ia Iesu ra, e ui ia ˈna e, O oe anei te tae mai? e e tiai atu anei tatou ia vetahi ê? 20 E tae atura taua na taata ra ia ˈna, ua parau atura raua, I tonohia mai mâua e Ioane Bapetizo e ui ia oe e, O oe anei te tae mai, e tiai atu anei tatou ia vetahi ê? 21 Te faaora ra Iesu i te taata e rave rahi i to ratou maˈi, e te mauiui rahi, e te varua ino i taua hora ra; e te horoa ra i te ora i te matapo e rave rahi. 22 Ua parau maira Iesu ia raua, na ô maira, A haere a parau atu ia Ioane, i ta orua i faaroo e ta orua i ite iho nei; e te roaa nei te ite i te matapo, te haere nei te pirioi, te tamâhia nei te lepera, te faaroo nei te turi, te faatiahia nei tei pohe, e te parauhia nei te evanelia i te taata rii. 23 E o te ore e maheaitu ia ˈu nei, e ao to ˈna.

24 E ia reva na vea a Ioane ra, ua parau atura Iesu i taua feia rahi ra ia Ioane, I haere outou i te medebara ra e hiˈo i te aha? i te aeho i ueuehia e te mataˈi? 25 I haere râ outou e hiˈo i te aha? i te taata i te ahuraa i te ahu mǎrû? inaha hoi, te feia e ahu i te ahu mǎrû e e amu i te maa maitai ra, tei te fare ïa o te hui arii. 26 I haere râ outou e hiˈo i te aha? i te peropheta? Oia ïa, e faaite atu vau ia outou, e rahi ïa oia i te peropheta. 27 Oia hoi teie no ˈna te parau i papaihia ra e, Inaha, e tono vau i tau vea na mua ia oe, e na ˈna e haamaitai i to oe eˈa i mua ia oe. 28 E faaite atu hoi au ia outou, I ta te vahine e fanau nei, aita ˈtu ïa e peropheta rahi ia Ioane Bapetizo nei; o tei iti roa râ i te basileia o te Atua ra, e rahi ïa ia ˈna. 29 Ua faatia anaˈe te taata, e te mau telona atoa i faaroo ia Ioane ra, i te Atua, o ratou i bapetizohia i te bapetizoraa na Ioane. 30 Area te mau Pharisea e te mau haapii ture, ua patoi ïa ratou i te aˈo a te Atua ia ratou iho, o ratou aore i bapetizohia e ana.

31 E ua parau atura te Fatu, E faaau vau i teie nei ui taata i te aha? e au ratou ia vai? 32 E au ratou i te tamarii i te vahi hooraa ra, i te tiaororaa i to ratou iho, i te na ôraa e, I faaoto atu na matou i te vivo, e aore outou i ori mai; i pehe atu na matou i te pehe oto, e aore outou i oto mai. 33 I haere mai nei hoi Ioane Bapetizo ma te amu ore i te pane e ma te inu ore i te uaina, e te parau na outou e, E demoni to ˈna. 34 I haere mai râ te Tamaiti a te taata nei ma te amu e te inu, e te parau na outou e, Inaha e taata aamu e te inu uaina; e au no te mau telona e te feia rave hara. 35 Ua faatiahia râ te paari e ta ˈna atoa ra mau tamarii.

36 Ua parau maira te hoê o te mau Pharisea ra ia Iesu e amu i te maa i ǒ na ra. Haere atura oia i roto i te fare o taua Pharisea ra, taoto atura i te amuraa maa ra. 37 E inaha, te hoê vahine hara i taua oire ra, ite aˈera e te amu ra Iesu i te maa i te fare o taua Pharisea ra, ua hopoi maira i te hoê piha alabata mura ra, 38 tia noa ihora i muri i tana pae avae ma te oto, e rarirari aˈera tana avae i te roimata, horoi ihora i tana io rouru, hôˈi ihora i tana avae, e faatavai ihora i te mura. 39 Ite aˈera râ te Pharisea i parau atu ia ˈna ra i taua mea ra, ua na ô aˈera i roto ia ˈna iho, Ahiri teie nei taata e peropheta, e ite ïa oia i teie nei vahine e rave mai ia ˈna nei, e to ˈna roo; e rave hara hoi oia. 40 Ua parau atura Iesu ia ˈna, na ô atura, E Simona, e maa parau iti ta ˈu ia oe na. Ua na ô maira oia, E parau noa mai oe, e te Orometua. 41 Toopiti a te hoê taata tau amutarahu, e pae hanere moni veo i ta te hoê aore i hoo na, e pae hoi ahuru i ta te tahi. 42 No te mea râ aita roa a raua faufaa e hoo na ai, faaore noa ˈtura oia i ta raua atoa tarahu. E tena na, e faaite mai oe, o teihea te rahi i te mauruuru ia ˈna i taua na taata ra? 43 Ua parau maira Simona, na ô maira, Te manaˈo nei au, o tei faaorehia e ana te tarahu rahi ra. Ua parau atura Iesu ia ˈna, E manaˈo tia to oe. 44 Ua fariu aˈera oia i taua vahine ra, e ua parau atura ia Simona, Te hiˈo nei oe i teie nei vahine? I tomo mai nei au i roto i to fare nei, e aore oe i hopoi mai i te pape ei horoi i tau avae, ua faarari râ oia i tau avae i te roimata, e ua horoi i to ˈna iho io rouru. 45 Aore oe i hôˈi mai ia ˈu, area teie nei vahine, aita aˈenei i faaea i te hôˈihôˈi i tau avae mai to ˈna tomoraa mai â. 46 Aore oe i faatahinu mai i tau upoo i te monoˈi, area oia, ua faatavai ïa i tau avae i te mura. 47 E teie nei, e faaite atu vau ia oe, O ta ˈna nei hara rahi, ua faaorehia ïa; i rahi ai to ˈna mauruuru; area te taata hara iti i faaorehia ra, e iti ïa to ˈna mauruuru. 48 Ua parau aˈera oia i taua vahine ra, Ua faaorehia ta oe hara. 49 Ua na ô aˈera taua feia i te amuraa maa ra i roto ia ratou iho, O vai teie e faaore atoa i te hara nei? 50 Ua parau atura oia i taua vahine ra, Ua ora oe i to oe faaroo; ia ora na i te haerea.