Luka

TE TELONA RA O ZAKAIO I TE PARAURAAHIA E TE MESIA RA.

19 E tomo atura Iesu i Ieriko haere atura na roto, 2 E inaha, tei reira te hoê taata o Zakaio te iˈoa, e taata taoˈa e e telona rahi hoi. 3 Te hinaaro ra oia i te hiˈo ia Iesu ia ite i te huru; e aita aˈera oia i ite, i te rahi o te taata, e taata poto hoi oia. 4 Horo atura oia na mua, paiuma ˈtura i nia i te hoê sukamino e hiˈo ia ˈna; te na reira maira hoi oia i te haere. 5 E tae maira Iesu i taua vahi ra, ua hiˈo aˈera oia i nia, ite atura ia ˈna, e ua parau atura ia ˈna, E Zakaio, a pou mai i tena na, ei to fare ra hoi au parahi ai auanei. 6 Ua pou oioi maira oia i raro, ite maitai maira ia ˈna ma te oaoa. 7 E ite aˈera taua feia rahi atoa ra, ua ohumu ihora, na ô aˈera, Te haere atura oia ei manihini na te taata rave hara. 8 Ua tia noa maira Zakaio i mua i te aro o Iesu, na ô maira, Inaha, e te Fatu, e horoa vau i te afa i ta ˈu nei taoˈa na te taata rii, e i hamani ino na vau i te tahi taata ˈtu i te hoê mea iti aˈe, ia taimaha ïa ta ˈu e faahoˈi atu na ˈna. 9 Ua na ô aˈera Iesu ia ˈna, Ua tae mai te ora i teie nei fare i teie nei mahana, e tamaiti atoa hoi oia na Aberahama. 10 I haere mai nei hoi te Tamaiti a te taata nei e imi i tei moe ra e faaora.

11 E te faarooroo maira te taata i taua parau nei, ua tuu atoa ˈtura oia i teie nei parabole, no te mea te fatata maira Ierusalema ia ˈna, e te manaˈo ra ratou e, e itea mai te basileia o te Atua i reira ra. 12 No reira oia i na ô atu ai, Haere atura te hoê taata mana i te fenua roa ia noaa ia ˈna te toroa arii ra, e a hoˈi mai ai. 13 Ua parau atura oia i te mau tavini no ˈna e tino ahuru ra, e ua tuu atura i na mina hoê ahuru ia ratou, na ô atura, E hoo outou, e ia hoˈi mai au ra. 14 Te riri ra râ to to ˈna ra fenua ia ˈna, e ua tono atura i te vea na muri ia ˈna ei parau e, Eiaha tena na taata ei arii no matou. 15 E hoˈi maira oia ma te toroa arii atoa i nia ia ˈna, ua faaue atura oia e tii i taua mau tavini ta ˈna i tuu atu i te moni ra, ia ite oia i te huru o te taoˈa i noaa ia ratou i te hooraa ra. 16 Ua haere maira te hoê, na ô maira, E te fatu, hoê ahuru mina i noaa i te mina na oe ra. 17 Ua parau atura oia ia ˈna, Ua tia, e tavini rave maitai oe; no te mea ua haapao maitai oe i tena na mea iti haihai, ei tavana oe e ia hoê ahuru o oe oire. 18 Ua haere maira te toopiti, na ô maira, E te Fatu, e pae mina i noaa i te mina na oe ra. 19 Ua parau atoa ˈtura oia ia ˈna, Ei tavana atoa oe i na oire e pae ra. 20 Ua haere maira hoi te tahi, na ô maira, E tau Fatu, inaha, tera mai te mina na oe, i vaiiho-maite-hia e au i roto i te vehî; 21 i mǎtaˈu hoi au ia oe, no te mea e taata iria oe: e titau â oe i tei ore i vaiihohia e oe ra, e ooti hoi oe i tei ore i ueuehia e oe ra. 22 Ua parau atura oia ia ˈna, E teie nei tavini ino e, e haava vau ia oe i te parau no roto i to oe iho vaha. Ua ite oe e, e taata iria vau, i te titauraa i tei ore i vaiihohia e au ra, e te ootiraa i tei ore i ueuehia e au: 23 eaha ihora oe i ore i hopoi ai i tau moni i te hooraa ra, e ia hoˈi mai au ra noaa ihora ta ˈu ma te hoo? 24 Ua parau atura oia i te feia i tia noa i pihai ihora, A rave atu i ta ˈna mina, e hopoi atu na te taata auahuru a ˈna mina ra. 25 Ua parau maira ratou ia ˈna, E te Fatu, auahuru hoi a ˈna mina. 26 E faaite atu hoi au ia outou, E taoˈa ta ˈna ra, e horoahia ˈtu â ta ˈna; e aita a ˈna ra, e ravea-ê-hia ïa ta ˈna. 27 Area taua mau enemi no ˈu ra, o tei ore i farii mai ia ˈu ei arii no ratou, aratai mai na ïa i ǒ nei i mua i tau aro nei e taparahi.

28 E oti aˈera taua parau nei, na mua ˈtura Iesu i te haereraa ˈtu i Ierusalema. 29 E fatata maira Betephage e Betania ia ˈna, i te mouˈa i parauhia ra, Oliveta, ua tono aˈera oia i e toopiti pue pǐpǐ a ˈna ra, 30 na ô atura, E haere orua i tera ra oire iti; e ia tomo orua i roto ra, e ite orua i te hoê fanauˈa asini i te fetiiraahia, aore â i parahihia e te taata i nia iho: e tatara e putô mai. 31 E ia ui mai te hoê taata ia orua, Eaha orua i tatara ˈi? e na ô atu orua ia ˈna, No te mea e au teie i te Fatu. 32 Haere atura raua o tei tonohia ra, e roohia ˈtu oia mau atura ta ˈna i parau atu ia raua ra. 33 E tei te tatararaa raua i taua fanauˈa asini ra, ua parau maira te feia fatu ia raua ra, Eaha orua i tatara ˈi i te fanauˈa asini ra? 34 Ua parau atura raua, E au teie i te Fatu. 35 Ua putô maira raua i taua asini ra ia Iesu ra; ua tuu ihora i to ratou ahu i nia iho i taua fanauˈa ra, haaparahi ihora ia Iesu i nia iho. 36 Ua vauvau ihora te taata i to ratou ahu i te aratai i taua haerea no ˈna ra.

37 E fatata maira te oire ia ˈna, i te tumu o te mouˈa ra Oliveta, ua pii noa ihora taua tiaa rahi pǐpǐ atoa ra i te haamaitairaa i te Atua, i te mau semeio atoa ta ratou i ite ra; 38 na ô aˈera, Ia ora na te Arii i te haerea mai ma te iˈoa o te Fatu ra; ei hau to te raˈi, e te haamaitai i te vahi teitei. 39 Ua parau maira e toofanu pue Pharisea no roto i taua tiaa rahi ra ia ˈna, E te orometua, e aˈo aˈe na oe i to mau pǐpǐ nei. 40 Ua parau atura oia ia ratou, na ô atura, Teie ta ˈu parau ia outou, ia mamû noa ratou nei, ua pii noa mai ïa te mau ofai nei.

41 E fatata ˈtura oia, ua hiˈo atura i taua oire ra, oto atura ia ˈna, 42 na ô atura, Ahiri oe i ite na i teie nei i to oe nei anotau, i te parau e ora ˈi oe na! i teie nei râ, ua moe ê ïa parau e ore to mata e ite. 43 Te fatata maira hoi te tau e haaatihia ˈi oe e to mau enemi i te aua, a haapuni ai ia oe e ati noa ˈˈe, a tapea ˈi ia oe i roto. 44 E e huri hoi ia oe i raro roa i te repo, e to tamarii atoa i roto ia oe na; e e ore roa te hoê ofai i roto ia oe na e vaiihohia i nia iho i te tahi; o oe aore i haamanaˈo i to oe iteraahia mai.

45 Ua tomo atura oia i roto i te hiero, ua tiahi atura i te feia i hoo i roto i te hiero i rapae; 46 na ô atura ia ratou, Ua oti hoi i te papaihia e, E fare pureraa to ˈu nei fare, i faarirohia iho nei râ e outou ei ana eiâ haru. 47 E tia oia i roto i te hiero i te haapiiraa, i te mau mahana atoa. Ua titau maira râ te feia tahuˈa rarahi, e te mau papai parau, e te feia rahi ra ia ˈna e taparahi. 48 Aita i ite i te ravea e tia ˈi, te faaroo papu maite maira hoi te taata atoa ia ˈna.