Luka

NA PǏPǏ E HITU AHURU I TE TONORAAHIA E TE MESIA RA E RAVE I TE SEMEIO.

10 E muri aˈera, ua haapao atura te Fatu i e hitu ahuru, e tatoopiti atura i te tonoraa ia ratou na mua ia ˈna, i te mau oire e te mau vahi atoa ta ˈna i opua ra e e haere atoa oia i reira. 2 Ua parau atura oia ia ratou, Te rahi mau nei te auhune sitona, te iti nei râ te feia e ooti: e teie nei, e pure outou i te Fatu o te ohipa, ia tono â oia i te rave ohipa ei ooti. 3 A haere, inaha te tono nei au ia outou mai te arenio i rotopu i te mau luko ra. 4 Eiaha ei farii moni e hopoihia, eiaha ei pute, eiaha ei tamaa hopoi noa: eiaha roa e aroha ˈtu i te taata i te aratia. 5 E te fare ta outou e tomo ra, e mata na i te parau atu, Ei hau to teie nei utuafare. 6 E tei reira te hoê tamaiti no te hau, e vai â taua hau ra i nia iho ia ˈna; aore ra, e hoˈi mai ïa i nia iho ia outou. 7 Ei taua fare ra parahi ai, e amu hoi e e inu i ta ratou e horoa maira, e au hoi i te rave ohipa ta ˈna ra utua. Eiaha e haere i tera fare, i tera fare. 8 E te oire ta outou e tomo ra, e i ite mai ratou ia outou, e amu i ta ratou e tuu mai i mua i to outou aro ra; 9 e faaora hoi i to reira maˈi, e parau atu hoi ia ratou, Te fatata maira te basileia o te Atua ia outou nei. 10 Area te oire ta outou e tomo ra, e aore ratou i ite mai ia outou, e haere outou i te aroâ i taua oire ra, a parau atu ai, 11 Te repo o to outou oire e piri mai ia matou nei, te horoi atu na matou: te fatata mai nei râ te basileia o te Atua ia outou, ia ite hoi outou. 12 Teie râ ta ˈu parau ia outou, E huru tia ˈˈe Sodoma ia haamahu ia tae i te reira mahana ra, i te reira oire.

13 Auê oe, e Korazina e! auê hoi oe, e Betesaida! ahiri hoi te mau semeio i ravehia i roto ia orua na, i ravehia i Turia e Sidona, ua tatarahapa ê na ratou, ua parahi i te rehu auahi ma te ahu paau. 14 E huru tia ˈˈe ra Turia e Sidona ia haamahu ia orua na, ia tae i te mahana haavaraa ra. 15 E o oe na hoi, e Kaperenaumi i faateiteihia i nia i te raˈi na, e hoparahia oe i raro roa i hade. 16 O tei faaroo mai ia outou na, ua faaroo mai ïa ia ˈu; e o tei vahavaha mai ia outou na, ua vahavaha mai ïa ia ˈu; e o tei vahavaha mai ia ˈu ra, ua vahavaha ïa ia ˈna i tei tono mai ia ˈu nei.

17 Ua hoˈi faahou maira taua hitu ahuru ra ma te oaoa, na ô maira, E te Fatu, ua vi atoa te mau demoni ia matou i to iˈoa na. 18 Ua parau atura oia ia ratou, Ua ite au ia Satani i te mairiraa, mai te uira no nia i te raˈi ra. 19 E inaha, e haamana ˈtu vau ia outou, ia taahi noa ˈtu i te ophi, e te pata, e te mana atoa o te enemi: e aore roa e mea e pohe ai outou. 20 Eiaha râ e oaoa i te mea ua vi te mau varua ino ia outou; e oaoa râ i to outou iˈoa i papaihia i nia i te raˈi ra.

21 Oaoa ˈtura to Iesu varua i taua hora ra, na ô atura, E haamaitai au ia oe, e tau Metua, e te Fatu o te raˈi e te fenua, i te mea, huna ê noâ oe i teie nei mau parau i te feia paari e te ite ra, ua faaite mai oe i te tamarii nei: oia ïa, e tau Metua, o te mea tia ïa ia oe. 22 Ua hope roa te mau mea atoa i te tuuhia mai e tau Metua tei ia ˈu, e aore roa te hoê i ite i te Tamaiti maori râ o te Metua; aore hoi te hoê i ite i te Metua, maori râ o te Tamaiti, e o ta te Tamaiti i hinaaro i te faaite atu.

23 Ua fariu atura oia i ta ˈna mau pǐpǐ ra, parau huna ˈtura ia ratou, E ao to te mata i hiˈo i te mau mea ta outou e hiˈo nei: 24 e faaite atu hoi au ia outou, e rave rahi te peropheta e te hui arii i hinaaro i te hiˈo i te mau mea ta outou e hiˈo nei, e aore aˈenei i hiˈo; e i hinaaro hoi i te faaroo i te mau parau ta outou e faaroo nei, e aore aˈenei i faaroo.

25 E inaha, ua tia maira te hoê haapii ture i nia, ua fâfâ maira ia ˈna, na ô maira, E te orometua, eaha vau e noaa ˈi te ora mure ore? 26 Ua parau atura Iesu ia ˈna, Eaha tei papaihia i roto i te ture ra? te nahea ra ta oe taioraa? 27 Ua parau maira oia, na ô maira, E hinaaro oe i to Atua ia Iehova ma to aau atoa e ma to varua atoa, e ma to puai atoa, e ma to manaˈo atoa ia hope, e aroha hoi oe i to taata-tupu mai te aroha ia oe iho na. 28 Ua parau atura oia ia ˈna, Ua tia ta oe i parau mai na, e ora oe ia na reira. 29 Area oia, no te hinaaro i te faatia ia ˈna iho, ua parau maira ia Iesu, O vai hoi to ˈu taata-tupu? 30 Ua parau atura Iesu ia ˈna, na ô atura, Te hoê taata no Ierusalema i te haereraa i Ieriko, roohia ihora i te nǎnǎ eiâ haru, taratarahia ihora tana ahu e ratou, e paruparu ihora oia, haere atura, faarue ihora ia ˈna, ua fatata i te pohe. 31 Ua haere noa maira te hoê tahuˈa na taua eˈa ra, e ite atura oia ia ˈna, faahahau ê aturâ, na te tahi pae eˈa ˈtura i te haere. 32 E te hoê ati Levi hoi i te haerea na taua eˈa ra, e fatata maira taua vahi ra, e ite atura ia ˈna, ohipa ê atura na te tahi pae eˈa. 33 Te hoê taata râ no Samaria i haere noa i to ˈna haerea, e tae atura i taua vahi ra, e ite atura oia ia ˈna, aroha ˈtura; 34 haere atura i pihai iho, ua ninii ihora i te hinu e te uaina i roto i te mau puta no ˈna ra; vehî ihora, e haaparahi atura ia ˈna i nia i tana iho puaa, aratai atura ia ˈna i te fare tipaeraa, utuutu atura ia ˈna. 35 E ao aˈera, ia haere ê oia ra, ua rave aˈera oia i e piti moni veo, tuu atura i te taata fare ra, na ô atura ia ˈna, E utuutu oe i teie nei taata, e ia riro atoa ta oe ra moni, na ˈu ïa e hopoi atu i te hoo ia oe ia hoˈi mai au ra. 36 O vai te taata-tupu i to oe manaˈoraa i taua na taata tootoru ra, i te taata i roohia i te nǎnǎ eiâ hara ra? 37 Ua parau maira oia, O tei aroha ia ˈna ra. Ua parau atura Iesu ia ˈna, E haere oe, e na reira atoa.

38 E te haere atura ratou i to ratou haerea, ua tomo atura oia i roto i te hoê oire iti; ua farii maira te hoê vahine ia ˈna i roto i to ˈna fare, o Mareta te iˈoa. 39 E taeae to ˈna o Maria te iˈoa, o tei parahi ïa i te pae avae o Iesu i te faarooraa i ta ˈna parau. 40 Area Mareta, peapea ihora ïa i te haapaoraa i te manihini, e ua haere maira, na ô maira, E te Fatu, eita oe e haapao mai, e ua faarue mai tau taeae ia ˈu, o vau anaˈe teie rave noa ˈi? e parau atu oe ia ˈna e rave atoa mai. 41 Ua parau atura Iesu ia ˈna, na ô atura, E Mareta e, e Mareta, ua ahoaho oe, e te peapea na oe ia oe iho i te mau mea e rave rahi: 42 hoê roa râ mea tia, e ua rave iho nei Maria i taua mea tia ra, e ore roa hoi ta ˈna e riro ê.