Mareko

TE MESIA I TE FAAORARAA I TE TAATA I URUHIA E TE MAU DEMONI

5 E tipae atura ratou i te tahi pae i taua roto ra i te fenua o to Gadara ra. 2 E tei te taeraa ˈtu oia i uta, ua farerei maira ia ˈna te hoê taata i uruhia e te varua faufau no roto mai i te mau menema ra; 3 e tia oia i roto i taua mau menema ra; e aore roa e taata e tia ˈi ia tapea ia ˈna i te auri fifi atoa: 4 e rave rahi to ˈna tapearaahia i te auri e te fifi, e ua motu te fifi, ua fatifati hoi te auri ia ˈna; e aore roa e taata e rata ˈi. 5 E tia oia i te mouˈa i te rui e te ao, e i roto hoi i te mau menema auě noa ˈi ma te otioti ia ˈna iho i te faoa. 6 Ia hiˈo mai râ oia ia Iesu i te atea ê, 7 Ua horo maira tahopu maira ia ˈna, Pii hua maira, na ô maira, Eaha ta oe ia ˈu nei, e Iesu e, te tamaiti a te Atua teitei ra? Te parau atu nei au ia oe i te iˈoa o te Atua, e eiaha oe e haamauiui mai ia ˈu. 8 I parau na hoi Iesu ia ˈna e, A haere oe i rapae au, e tena na varua faufau, vaiiho atu i tena na taata. 9 Ua ui atura oia ia ˈna, O vai to oe iˈoa? ua parau maira oia, na ô maira, O Legeona to ˈu iˈoa, e rave rahi hoi matou. 10 Ua rahi roa maira ta ˈna parau taparu ia ˈna, eiaha oia e tiavaru ê ia ratou i te reira fenua. 11 E nǎnǎ rahi puaa tei reira iho i te amu-haere-raa i te maa i nia i te mouˈa. 12 Ua taparu maira te mau demoni atoa ia ˈna, na ô maira, E tuu oe ia matou i tera ra mau puaa ia tomo atu matou i roto. 13 Ua tuu atura Iesu ia ratou i reira ra. Reva ˈtura taua mau varua faufau ra i rapae, tomo atura i roto i te puaa; horo pupara noa ˈtura taua nǎnǎ ra e piti atoa tausani i na te mato, e raro roa i te roto, pohe atura i reira. 14 Fati atura te feia i tiai i te puaa, faaite haere atura i roto i te oire e te mau oire rii ra. Ua haere maira to reira i rapae au e hiˈo i taua mea ra. 15 E tae maira ratou ia Iesu ra, e ite maira ia ˈna i tei uruhia e te demoni ra, e legeona hoi to ˈna ra, i te parahiraa, ma te ahu hoi i te ahu, e ma tana aau mau iho â, mǎtaˈu aˈera ratou. 16 E ia faaite atu te feia i ite ia ratou, i tei ravehia i te taata demoni e te nǎnǎ puaa ra; 17 ua taparu maira ratou ia ˈna ia haere ê oia i to ratou ra vahi. 18 E tei te haereraa oia i nia i te pahi ra, ua parau maitai maira taua taata i uruhia e te demoni ra, e ei pihai atoa iho oia ia ˈna. 19 Aita râ Iesu i faatia ˈtu, na ô atura râ ia ˈna, A haere i te utuafare i to oe ra fetii, a faaite atu ai ia ratou i taua mea rahi a te Fatu i rave iho nei i te aroha ia oe. 20 Haere atura oia, parau haere atura i Dekapoli atoa ra i te hamani maitai rahi o Iesu ia ˈna; maere anaˈe ihora te taata atoa.

21 E ia hoˈi faahou Iesu i te tahi paeau na nia i te pahi, e feia rahi tei tairuru mai ia ˈna i te hiti â o taua roto ra. 22 E inaha, ua haere maira te hoê tavana o te sunago ra, o Iaeiro te iˈoa; e ite maira oia ia ˈna, ua haamairi ihora i tana pae avae, 23 taparu hua maira ia ˈna, na ô maira, Ua fatata roa tau potii iti i te pohe, teie ta ˈu parau ia oe, e haere mai oe e tuu i to rima i nia iho ia ˈna ia ora, e ora ia oia i reira. 24 Haere atura Iesu raua atoa, e te taata atoa e rave rahi i te tueveraa mai i muri iho ia ˈna. 25 E te hoê vahine hoi, hoê aˈera ahuru e piti tiahapa i te matahiti i te poheraa i te tapahi: 26 e pohe rahi to ˈna i te mau rapaau e rave rahi, e ua pau roa ta ˈna taoˈa e aore e ora i noaa, te tupu ra râ to ˈna maˈi i te rahiraa: 27 ite aˈera oia ia Iesu, ua na muri maira i te haere na roto mai i te tiaa i nenei noa mai ia ˈna ra, ua faatiaia ˈtura i to ˈna hiti ahu: 28 ua na ô aˈera hoi oia, Ua faatiaia anaˈe au i to ˈna ahu, e ora ïa vau. 29 Mono ihora i taua tapahi no ˈna ra i reira, ite ihora oia i roto ia ˈna iho e, ua ora oia i taua maˈi no ˈna ra. 30 Ite aˈera Iesu i roto ia ˈna iho, e mana tei pûpû atu no roto ia ˈna i reira ra, ua fariu aˈera i roto i taua feia i nenei maira, na ô aˈera, O vai tei faatiaia mai i tau ahu nei? 31 Ua parau atura ta ˈna mau pǐpǐ ia ˈna, Te ite mai nei hoi oe i teie nei feia rahi i te tueveraa ˈtu ia oe, e e parau mai hoi oe, O vai tei faatiaia mai ia ˈu? 32 Ua hiˈo atura Iesu e ati noa ˈˈe ia ite oia ia ˈna i te na reira mai ia ˈna ra. 33 Ua haere maira taua vahine ra ma te mǎtaˈu e te rurutaina, ua ite ihora i te huru ê i faatupuhia i roto ia ˈna ra, ua tipapa ihora i raro i mua ia ˈna, ua faˈi hua maira i te parau mau. 34 Ua parau atura râ oia ia ˈna, E tau tamahine, i ora oe i to faaroo; a haere ma te hau, e ma te ora i to maˈi. 35 E aita i mure i taua parau na ˈna ra, o te vea maira, mai te utuafare mai o te tavana o te sunago ra, e ua parau maira, Ua pohe roa to tamahine, eaha oe i haapeapea ˈtu ai â i te orometua? 36 E ite aˈera Iesu i taua parau ra i te parauraahia, ua na ô atura i te tavana o te sunago ra, Eiaha e mǎtaˈu; e faaroo noa mai. 37 E aore roa e taata e tia ia ˈna ia pee mai, maori râ o Petero, e o Iakobo, e o Ioane, te taeae o Iakobo ra. 38 E tae atura oia i te fare o te tavana o te sunago ra, e ite aˈera oia i te auê e te taata i te otoraa mu atura te hea. 39 E ia tomo atura oia i roto i te fare ua parau atura oia ia ratou, Eaha outou i auê noa ˈi e i oto ai hoi? aore taua potii nei i pohe, ua taoto râ. 40 Ua faatio maira ratou ia ˈna. Ua tuu atura râ oia ia ratou atoa i rapae, aratai atura i te metua tane e te metua vahine â taua potii ra e te feia i pee mai ia ˈna ra, tomo atura i roto i te piha i te vairaa o taua potii ra. 41 Ua rave atura i te rima o taua potii ra, ua na ô atura, Talita kumi; i te faaauraa ra, E teie nei potii, a tia i nia, te faaue atu nei au ia oe. 42 Ua tia maira taua potii ra i nia i reira ra, hahaere ihora, hoê ahuru hoi o ˈna matahiti e piti tiahapa, maere roa ˈtura ratou. 43 Ua aˈo hua ˈtura oia ia ratou e eiaha roa e faaite noa ˈtu i te hoê taata; ua faaue atura oia e hopoi mai i te maa na taua potii ra e amu.