Mareko
TE TIA-FAAHOU-RAA O TE MESIA I FAAITEHIA E TE HOÊ MELAHI I NA VAHINE TOOTORU RA.
16 E oti aˈera te sabati ua hoo atura Maria i Magadala, e o Maria te metua vahine o Iakobo, e o Salome, i te raau noˈanoˈa ia haere ratou e faatavai ia ˈna. 2 Haere atura ratou i taua menema ra i te poipoi roa, i te mahana matamua o te hebedoma ra, te huru hiti ra te mahana. 3 Ua parau ihora hoi ratou iho, Na vai ra e huri i te ofai i te uputa o te menema ra ia tatou? 4 (Ia hiˈo atura râ ratou, ite atura, e ua huri-ê-hia na taua ofai ra,) e ofai rahi roa hoi taua ofai ra. 5 Ua tomo atura i roto i te menema, ite atura ratou i te hoê taata apî i te parahiraa i te pae atau, ma te ahu maoro teatea i te ahuraa, horiri atura ratou. 6 Ua parau maira râ oia ia ratou, Eiaha e mǎtaˈu, te imi nei outou ia Iesu i Nazareta i faasataurohia nei; ua tia ïa oia i nia; aore oia i ǒ nei; a hiˈo na i te vahi ta ratou i vaiiho ia ˈna ra. 7 E haere râ outou e parau atu i ta ˈna mau pǐpǐ e ia Petero, e te na mua ra oia ia outou i te haere i Galilea, ei reira outou e ite ai ia ˈna, ta ˈna i parau mai ia outou na. 8 Tei rapae au atura ratou, faarue maira i te menema horo atura, roohia ihora ratou e te rurutaina, e te maere; aore roa hoi i parau iti noa ˈˈe ia vetahi ê i te rahi o to ratou mǎtaˈu.
9 Tia aˈera Iesu i nia i te poipoi roa i te mahana matamua o te hebedoma ra, e ua na mua i te faaite ia ˈna iho ia Maria i Magadala ra, ta ˈna i tiavaru na demoni toohitu no roto ia ˈna ra. 10 Haere atura oia, faaite atura i te feia i pee ia ˈna ra, te mihi noa ra ïa ma te roimata. 11 Ia faaroo ra ratou e ua ora oia, e ua itea ia ˈna, aore ratou i faaroo.
12 E i muri aˈera itea ihora oia i e toopiti o ratou ma te huru ê, i to raua haere-noa-raa i rapae. 13 Ua hopoi maira raua, e ua faaite maira i e tahi pae, aita râ ratou i faaroo ia raua.
14 E i muri aˈera, ua faaite maira oia i te tino ahuru ma hoê, i ta ratou amuraa maa ra, ua avau maira ia ratou i to ratou faaroo ore, e te mârô, o ratou aore i faaroo i te feia i ite ia ˈna i muri aˈe i to ˈna tia-faahou-raa ra. 15 E ua parau maira ia ratou, E haere outou e ati noa aˈe te mau fenua atoa, e faaite haere i te evanelia i te taata atoa. 16 O te faaroo e ua bapetizohia, e ora ïa; area o te ore e faaroo ra, e faahapahia ïa. 17 E te feia faaroo ra, e riro ia ratou teie nei mau tapao; e hee te mau demoni ia ratou i to ˈu nei iˈoa; e parau hoi ratou i te parau apî: 18 e rave noa hoi ratou i te ophi; e ia inu ratou i te mea taero, e ore ratou e ino; e ora hoi te maˈi ia ratou ia tuu i to ratou rima i nia iho.
19 E oti aˈera ta te Fatu parauraa mai ia ratou, ravehia maira oia i nia i te raˈi, parahi atura i te rima atau o te Atua ra. 20 Haere atura ratou, parau haere atura i te mau vahi atoa, e te Fatu atoa hoi i te rave-atoa-raa i te ohipa, e te faatupuraa i taua parau ra, i te mau semeio atoa i ravehia ra. Amene.