Mataio

TE MAU APOSETOLO I TE TONORAAHIA.

10 Ua parau atura oia i ta ˈna mau pǐpǐ tino ahuru ma piti e putuputu maira i pihai iho ia ˈna, ua tuu atura i te mana no ratou, ia tiavaru i te mau varua viivii i rapae, e ia faaora i te mau maˈi e te mau pohe atoa. 2 Teie hoi te iˈoa o te mau aposetolo tino ahuru ma piti ra, O Simona te matamehai, o tei parauhia ia Petero ra, e tana taeae o Anederea; o Iakobo a Zebedaio ra, e tana taeae o Ioane; 3 o Philipa e o Baretolomea, o Toma e te telona ra o Mataio, o Iakoba a Alephaia ra, e o Lebaio, o tei parauhia ia Tadaio, 4 o Simona i Kanaana ra, e o Iuda Isakariota, o tei haavare ia ˈna ra. 5 O taua tino ahuru ma piti nei ta Iesu i faatono, e ua aˈo atura ia ratou, na ô atura, Eiaha e haere noa ˈtu i te eˈa o te mau Etene ra, e eiaha atoa e tomo atu i te oire o to Samaria ra: 6 e haere tia ˈtu râ i te mau mamoe i moe i te utuafare ra o Iseraela. 7 E poro haere outou, e na ô atu, Te fatata mai nei te basileia o te ao. 8 E faaora i te mau maˈi, e tamâ i te mau lepera, e faatia i tei pohe, e tiavaru i te mau demoni; i horoa-noa-hia mai ta outou, e horoa noa hoi outou. 9 Eiaha e tuu i te auro, e te ario, e te veo i roto i to outou tatia; 10 eiaha ei pute no te tere e hopoihia, eiaha e tataipiti pereue, e te tamaa, e te raau; e au hoi te rave ohipa ra i ta ˈna utua. 11 E te oire e te oire iti ta outou e tomo ra, e ui atu i to reira taata au, ei reira parahi ai e reva noa ˈtu outou. 12 E ia tomo atu outou i roto i te fare, a faaora ˈtu i taua fetii ra. 13 E te au ra taua fetii ra, o te ora ta outou i hinaaro no ratou ra, e tae ïa i nia ia ratou: ia ore râ ia au, e hoˈi mai ïa ora i nia ia outou iho. 14 E o te ore e ite mai ia outou, e aore e haapao i ta outou parau, ia haere ê outou i taua fare ra e i taua oire ra, e ueue atu i te repo o to outou avae. 15 Oia mau ta ˈu e parau atu ia outou nei, e huru tia ˈˈe i te fenua ra o Sodoma e Gomora ia haamahu ia tae i te mahana haavaraa i te reira oire.

16 Inaha! te tono nei au ia outou mai te mamoe i rotopu i te mau luko ra; e teie nei, ia paari outou mai te ophi ra, e te hapa ore mai te uuairao ra. 17 E ara râ ia outou i te taata; e tuu hoi ratou ia outou i te sunederi ra, e e papai hoi ia outou i roto i to ratou mau sunago; 18 e no ˈu nei e hopoihia ˈi outou i te aro o te mau tavana e te hui arii, ei ite no ratou e no te mau Etene. 19 Ia tuu râ ratou ia outou, eiaha e taiâ i te huru o ta outou e parau atu, e faaitehia mai outou i te parau i taua hora ra. 20 E ere hua hoi o outou tei parau o te Varua râ o to outou Metua ra tei parau i roto ia outou na. 21 Ei reira te tuaana e tuu atu ai i te taeae ia pohe, e te metua i te tamaiti; e e tia mai hoi te mau tamarii e haapohe i to ratou mau metua. 22 E e ririhia outou e te taata atoa no to ˈu nei iˈoa; o te taata râ e tapea maite e tae noa ˈtu i te hopea, o te ora ïa. 23 Ia hamani ino mai râ ratou ia outou i te tahi oire, a maue ê atu i te tahi; e parau mau hoi ta ˈu e parau atu ia outou nei, e ore e ati te mau oire o Iseraela nei ia outou, e tae mai ai te Tamaiti a te taata nei. 24 Aita te pǐpǐ i hau i ta ˈna orometua, aita hoi te tavini i hau i to ˈna ra fatu. 25 Ia au te pǐpǐ i ta ˈna ra orometua, e te tavini i to ˈna ra fatu atira ïa. I haamairi na ratou i te taata fare ia Belezebuba, a tae atu ai hoi i to ˈna mau tavini? 26 Eiaha râ e mǎtaˈu atu ia ratou; aore roa hoi e mea tapoˈihia e toe i te faaitehia; aore roa e mea moe e toe i te itea. 27 Ta ˈu e parau atu ia outou i roto i te pouri nei, o ta outou ïa e faaite hua i te maramarama; e tei parau-riirii-hia i roto i to outou tariˈa ra, o ta outou ïa e parau hua i nia iho i te mau fare. 28 Eiaha e mǎtaˈu i tei taparahi mai i te tino nei, eita râ te varua e pohe ia ratou; e mǎtaˈu râ outou ia ˈna i te tia ia ˈna ia rave pohe roa i te tino e te varua atoa i gehena. 29 E ere anei taipiti manu rii ia hoo i te moni veo hoê nei? e ore râ te hoê o taua na manu rii ra e moe i to outou Metua ia mairi i raro i te repo. 30 Eaha ˈtu â ïa, ua hope atoa ra te rouru o to outou upoo na i te taiohia. 31 Eiaha maori outou e mǎtaˈu, e maitai rahi hoi to outou i to te manu e ia rahi noa ˈtu. 32 E teie nei, o tei faˈi ia ˈu i mua i te aro o te taata nei, e faˈi atoa vau ia ˈna i mua i te aro o tau Metua i te ao ra. 33 O tei huna râ ia ˈu i mua i te aro o te taata nei, e huna atoa vau ia ˈna i mua i te aro o tau Metua i te ao ra. 34 Eiaha e manaˈo e i haere mai au e hopoi mai i te hau i te fenua nei, aore au i hopoi mai i te hau, i te ˈoˈe râ. 35 I haere mai hoi au e faatupu i te tamaˈi i te metua tane raua o te tamaiti, i te metua vahine raua o te tamahine, i te metua hoovai vahine raua o te hunoa vahine. 36 E itea hoi to te taata nei enemi i roto i to ˈna ihora fetii. 37 O tei rahi to ˈna hinaaro i tana metua tane e tana metua vahine, iti ia ˈu, aita oia i au ia ˈu, e o tei rahi to ˈna hinaaro i te tamaiti e te tamahine, iti ia ˈu aita oia i au ia ˈu. 38 E o te ore e rave i to ˈna satauro a pee mai ai ia ˈu, aita oia i au ia ˈu. 39 O tei tapea i to ˈna ora, e ere ïa oia i te ora; area te tuu noa i to ˈna ora no ˈu nei, e ora ïa to ˈna.

40 O tei ite mai ia outou na, ua ite ïa ia ˈu, e o tei ite mai ia ˈu nei, ua ite ïa i tei tono mai ia ˈu nei ra. 41 O tei ite mai i te peropheta, no te mea e peropheta, e noaa ia ˈna ta te peropheta ra utua; e o tei ite mai i te taata parau-tia, no te mea e taata parau-tia, e noaa ia ˈna ta te taata parau-tia ra utua. 42 E o te horoa i te hoê auˈa pape toetoe na te hoê o teie nei mau taata rii, no te mea e pǐpǐ oia na ˈu, e parau mau ta ˈu e parau atu ia outou nei, e ore roa oia e ere i te utua.