Zekaria

TE ORAMA RA O TE OTARO PARAU MAUE I FAAITEHIA MAI.

5 Ua nânâ faahou atura vau i tau mata, e ua hiˈo; e inaha te hoê otaro parau i te maueraa. 2 Ua na ô maira oia ia ˈu, Eaha ta oe e hiˈo na? Ua parau atura vau, Te hiˈo nei au i te hoê otaro parau i te maueraa; hoê taau kubiti i te maoro, hoê ahuru kubiti i te aano. 3 Ua na ô maira oia ia ˈu, O taua ino ra teie e reva nei i na nia i te fenua atoa nei: o te mau taata atoa hoi ia eiâ ra, e tâpû-ê-hia ïa mai tei te hoê paeau o te reira; e te mau taata atoa hoi ia tuhi ra, e tâpû-ê-hia ïa mai tei te hoê paeau o te reira. 4 Na ˈu te reira e faatupu, te parau maira Iehova sabaota ra, e tomo te reira i roto i te fare o te taata eiâ, e i roto atoa i te fare o te taata tǎpǔ haavare i to ˈu nei iˈoa: e tia hoi i roto i to ˈna fare i te vaiihoraa, e pau hoi to ˈna fare i te reira, te raau e te mau ofai atoa.

5 Ua haere ihora te melahi i parau mai ia ˈu ra, e ua na ô maira ia ˈu, A nânâ na i to mata, a hiˈo i tera ra mea i haere ihora. 6 Ua parau atura vau, Eaha ra ïa? Ua na ô maira oia, E epha tera e haere ihora. Ua na ô faahou maira oia, O to ratou huru teie i te fenua atoa nei. 7 E inaha, i hopoihia aˈera te hoê taleni tapau i nia, e inaha te hoê vahine te parahi ra i roto i taua epha ra. 8 Ua parau maira oia, O te ino te reira. Ua huri atura oia ia ˈna i roto i taua epha ra; e ua huri aˈera oia i taua taleni tapau ra i nia i te auvaha. 9 Ua nânâ aˈera i tau mata i nia, hiˈo atura e inaha, na vahine toopiti te reva ˈtura, e tei roto te mataˈi i to raua ra pererau; e pererau hoi to raua mai te pererau o te heside: e maraa aˈera ia raua taua epha ra i nia i te area i te raˈi e te fenua. 10 Ua parau atura vau i taua melahi i parau mai ia ˈu ra, E hopoi raua i te epha nei i hea? 11 Ua na ô maira oia ia ˈu, E patu i te fare no te reira i te fenua ra i Sinara: e haapapuhia hoi te reira, e tuu-maite-hia hoi te reira i to ˈna tiaraa.