Zekaria

TO ZIONA HAAMAITAI-FAAHOU-RAA I FAAITEHIA MAI.

3 Ua faaite maira oia ia ˈu i te tahuˈa rahi ra ia Iosua, i te tia-noa-raa i mua i te melahi a Iehova, e ia Satani i te tiaraa i tana rima atau ei patoi atu ia ˈna. 2 Ua parau atura Iehova ia Satani ra, Ia faahapa ˈtu Iehova ia oe, e Satani e; o Iehova i maiti ia Ierusalema te faahapa ˈtu ia oe: e ere anei teie nei taata i te omoi iritia mai no roto i te auahi?

3 Te ahu ra Iosua i te ahu viivii, tia noa ˈi i mua i te aro o te melahi. 4 Ua parau atura oia i te feia i tia mai i mua ia ˈna, na ô atura; A rave atu i te mau ahu viivii i nia ia ˈna nei. Ua parau atura oia ia ˈna, A hiˈo na, ua faataa-ê-hia e au ta oe hara ia oe ra, e na ˈu e faaahu ia oe i te ahu maitai. 5 Ua na ô atu râ vau, E tuu mai ratou i te tahi korona maitai i nia i tana upoo. Ua tuu ratou i te korona maitai i nia i tana upoo, e ua faaahu mai ia ˈna i te ahu. Te tia noa ra te melahi a Iehova i pihai ihora. 6 Ua faaite hua ˈtura te melahi a Iehova ia Iosua, na ô atura,

7 Te na ô maira Iehova sabaota ra; Ia haere oe na to ˈu ra mau eˈa, e ia haapao oe i ta ˈu ra haapaoraa; e ia haava oe i to ˈu ra fare, e ia tiai hoi oe i to ˈu ra mau aumoa, e horoa ˈtu vau i te tahi vahi no oe i reira i rotopu i te feia tia noa maira i teie nei. 8 E faaroo mai na i tena na, e te tahuˈa rahi ra, e Iosua, o oe e to mau hoa e parahi i mua ia oe ra; e feia maerehia hoi ratou: inaha hoi, e faatae atu vau i tau tavini ra, i te amaa. 9 Inaha hoi te ofai i tuuhia e au i mua ia Iosua; e tei nia hoi na mata e hitu i te ofai hoê: inaha na ˈu e ooti i te ootiraa no te reira, te na reira maira Iehova sabaota ra, e na ˈu e faaore i te hara o taua fenua ra i te mahana otahi. 10 Te na ô maira Iehova sabaota ra, Ia tae i taua mahana ra, e parau ai outou atoa i te taata-tupu ra i raro aˈe i te vine e i raro aˈe i te suke ra.