Zephania

Zephania

TA TE ATUA TAHOORAA ˈTU IA IUDA I TA ˈNA RA MAU HARA.

1 Te parau a Iehova i tae mai ia Zephania, a Kusi, a Gedalia, a Amaria, a Hizikia, i te anotau ia Iosia a Amona, e arii no Iuda.

2 E rave-ê-hia e au te mau mea atoa i nia i te fenua nei, te na reira maira Iehova. 3 E rave-ê-hia e au te taata e te puaa, e rave-ê-hia e au te manu o te reva, e te iˈa o te tai, e te mau turoriraa e te taata ino atoa ra; e haamou vau i te taata i nia i te fenua nei, te parau maira Iehova. 4 E faatoro vau i tau rima i nia ia Iuda, e i nia atoa i te taata atoa o Ierusalema; e haamou atu vau i ǒ nei i te toea o Baala, e te iˈoa atoa o te feia i hopoi i te tusia, e to te mau tahuˈa atoa; 5 e te feia atoa i haamori i to te raˈi atoa i nia i te mau fare ra; e te feia i haamori e i tǎpǔ ia Iehova, e tei tǎpǔ ia Malakama; 6 e te feia i faarue ia Iehova e ua hoˈi mai; e te feia aore i imi ia Iehova, e aore i ui ia ˈna.

7 Mamû noa i te aro o te Fatu ra o Iehova, ua fatata hoi te mahana o Iehova: ua haapao hoi Iehova i te tusia, e ua parauhia tana manihini. 8 E ia tae i taua mahana tusia na Iehova ra, e faautuahia e au te feia mana e te mau tamarii a te arii ra, e te feia atoa e ahu i te ahu huru ê ra. 9 Ia tae i taua mahana ra e faautuahia e au te feia i ouˈa i roto i te uputa fare, e î aˈera te fare o to ratou mau fatu i te rave uˈana, e te haavare ia ratou. 10 Te na ô maira Iehova, Ia tae i taua mahana ra e tae mai ai te reo auê mai ǒ mai i te uputa iˈa ra, e te pii no ǒ mai i te piti ra, e te parari rahi no te pae mouˈa mai. 11 A auê, e te mau taata o Maketesa, ua hope hoi te feia hoo i te pohe; te feia atoa e hopoi i te ario ra, ua tâpû-ê-hia ïa. 12 E ia tae i te reira taime e imi ai au ia Ierusalema ma te rama, e faautua ˈtu vau i te mau taata i manaˈo e, o te huru â ïa, o tei parau to ratou aau e, E ore Iehova e rave i te maitai, e ore atoa e rave i te ino. 13 E riro ta ratou taoˈa i te haru, e faaanohia to ratou mau fare: e patu ratou i te fare, e ore râ e parahi i roto; e tanu hoi i te ô vine, e ore râ e inu i te uaina no roto. 14 Ua fatata te mahana rahi o Iehova, te fatata maira, te peepee maira i te haere; o te roo ra o taua mahana o Iehova ra, e ino rahi ïa: e pii hua te feia puai rahi i reira. 15 E mahana riri taua mahana ra, e mahana ati rahi e te mauiui; e mahana pau rahi e te pohe; e mahana pouri e te rumaruma; e mahana ata rahi e te pouri taotao; 16 e mahana no te pu e no te hitimaue no te mau oire i auahia, e te mau pare teitei. 17 E tuu mai au i te ati i te taata nei, e mai te matapo ra to ratou haere, no te mea ua hara ratou ia Iehova: e ninii-noa-hia to ratou toto mai te repo huˈahuˈa ra, e faaruehia to ratou tino mai te repo ra. 18 E to ratou ario e to ratou auro, e ore ratou e ora i te reira i te mahana o te riri o Iehova; e pau roa hoi te fenua atoa i te auahi ra o to ˈna hae: e rave faahope roa hoi oia i teie nei i te taata atoa i nia i te fenua nei.