Habakuka

Habakuka

TE FAAHAPA NEI HABAKUKA I TE PARAU O TE FENUA I TE INO.

1 Te parau ta te peropheta ra ta Habakuka i ite ra.

2 Te maoro, e Iehova, o ta ˈu tiaororaa, e aore oe i faaroo mai! te maoro o ta ˈu pii-hua-raa ˈtu ia oe, e hamani ino teie e vai nei, e aita oe i faaora! 3 Eaha ra hoi oe i faaite mai ai i te ino, e ia hiˈo hoi au i te oto ra? te vai nei hoi te haru e te rave aroha ore i mua ia ˈu nei: e te vai nei hoi te feia e faatupu i te mârô e te tamaˈi. 4 I haapaehia ˈi te ture nei, aore hoi te parau au ma te haavare ore i matere: ua haaatihia te feia parau-tia e te taata parau ino; i pûpû ai te parau hapa tia ore ra.

5 A hiˈo na i roto i te mau etene, a hiˈo na, a maere roa ˈtu ai; e ohipa ta ˈu e rave i to outou nei pue mahana, faaite noa ˈtura ia outou e ore â outou e faaroo. 6 Inaha hoi, te faatia nei au i te Kaladaio, i te fenua haere oioi e te aroha ore, o te haaati i te aano atoa o te fenua, ia noaa te parahiraa e ere i ta ratou ra. 7 E feia mǎtaˈu-rahi-hia ratou e te riariahia: no ratou iho to ratou mana ia parau; e no roto ia ratou iho to ratou faateitei. 8 E te mau puaahorofenua atoa no ratou ra, e oioi rahi ïa i to te nemera, e te aito rahi ïa e iti to te luko ahiahi ra: e to ratou faahoro puaahorofenua ra e riro i te faaaano, e mai te vahi roa mai hoi taua feia puaahorofenua ra; e maue hoi ratou mai te aeto e ru i ta ˈna maa ia pau. 9 E tere faaherehere ore to ratou atoa e tae mai ai: e o mua i to ratou mata, e riro ïa mai te mataˈi no te hitia o te râ mai, e mai te one ra ta ratou tîtî ia haaputu mai. 10 E tâhitohia e ratou te mau arii ra, e riro hoi te feia mana ei ataraa na ratou: e vahavaha ratou i te mau pare; e ohu hoi ratou i te repo a rave ai. 11 Ruri ê ihora to ˈna manaˈo i reira, haere, hua ˈtu ra oia e rave i te hara, i te parauraa i taua puai no ˈna nei, e no to ˈna ra atua.

12 E ere anei oe mai tahito mai â, e Iehova? e tau Atua, e Tei Moˈa ra, e ore matou e pohe. E Iehova, ua haapaohia ratou e oe ei faautuaraa ˈtu; e ua haamau oe ia ratou ei aˈoraa, e te Mato e. 13 E ore to oe mata maitai e tia ia hiˈo i te ino, e ore hoi e au ia oe ia hiˈo i te parau ino; eaha hoi oe i hiˈo ai i te haavare, e te mamû noa ra oe ia horomii te taata ino i tei rahi ta ˈna parau-tia i ta ˈna iho? 14 E ua faariro oe i te taata mai te iˈa o te moana ra, e mai te mea rii aore e tavana i nia ia ratou ra? 15 Ua noaa anaˈe ïa ratou i te tamǎtauhia; e ua noaa anaˈe ïa ratou i te taupeˈa, e ua haaputu ïa ratou i roto i te pute; i oaoa ˈi ratou e ouˈauˈa noa ˈi. 16 No reira ratou i faatusia ˈi i ta ratou upeˈa; e ua tutui i te mea noˈanoˈa i ta ratou iho pute, no te mea no reira i meˈihia ˈi ta ratou tufaa, ua rahi ta ratou maa. 17 Atire anei hoi ia ninii noa na i ta ratou upeˈa, e eiaha e faaherehere i te taparahi i te mau fenua?