Mika

TE FANAURAA O TE MESIA, TO ˈNA BASILEIA, E TE PAURAA O TO ˈNA MAU ENEMI.

5 E haaputuputu maite ma te pǔpǔ, e tera ra tamahine pǔpǔ faehau: ua haaati ratou ia tatou; ua papaia e ratou te aaria o te haava no Iseraela ra i te raau.

2 E iti â oe, e Bete-lehema Epherata, ia amui atoa i roto i te mau tausani atoa i Iuda ra, e tae mai râ te hoê ia ˈu nei mai roto mai ia oe ra o te riro ei tavana i Iseraela nei; mai tahito mai â hoi to ˈna haerea, mai te matamua mai â. 3 E teie nei, e tuu atu Iehova ia ratou, e ia tae i te taime e fanau mai ai te fanau ra: ei reira e hoˈi mai ai te toea o to ˈna mau taeae, i te mau tamarii o Iseraela.

4 E tia noa oia ma te faaamu i ta ˈna nǎnǎ, ma te puai o Iehova, ma te iˈoa teitei o to ˈna ra Atua, o Iehova; e tia maite hoi ratou i te parahiraa; e rahi hoi oia i reira e tae noa ˈtu i te hopea mai o te fenua ra. 5 E riro taua taata ra o te tumu ïa no te hau. Ua tae anaˈe mai to Asura i to tatou nei fenua, e ua taataahi anaˈe oia i to tatou mau aorai, e faatupuhia tatou i reira ei patoi ia ˈna na tavana toohitu, e na taata arii toovau ra. 6 E pau hoi te fenua ra o Asura ia ratou i te ˈoˈe, te fenua o Nimeroda i te tomoraa ˈtu: e faaorahia tatou e ana i to Asura, ia tae mai oia i to tatou nei fenua e ua taataahi anaˈe oia i to tatou nei mau otia.

7 E vai â te toea o Iakoba i roto i te taata atoa ra e rave rahi, mai te hau no ǒ ia Iehova ra, mai te tuâ ûa i nia i te aihere ra, tei ore ïa e tiai i te taata nei, e ore hoi e haapǎpǎ i to te taata nei tamarii. 8 E vai â te toea o Iakoba i roto i te mau fenua ra, e i roto i te taata atoa ra e rave rahi, mai te liona i roto i te mau puaa o te aru ra, e mai te liona apî i roto i te mau nǎnǎ mamoe; ia haere anaˈe na roto ra, ua taataahi ïa i raro, e ua hahae e huˈahuˈa noa ˈˈe, e aore e faaora e ora ˈi. 9 E hopoihia to rima i nia i te feia i mârô mai ia oe ra, e hope roa to mau enemi i te tâpû-ê-hia. 10 Te na ô maira Iehova, Ia tae i taua mahana ra, e faatae-ê-hia ˈi e au to mau puaahorofenua i roto ia oe na; e na ˈu e faaore i to mau pereoo: 11 e faaore-atoa-hia e au te mau oire o to fenua; e na ˈu e huri i to mau pare ra i raro: 12 e faaore atoa hoi au i te mau hiˈohiˈo no roto i to oe na rima, e aita ˈtu o oe e hiˈoatâ: 13 e tâpû-atoa-hia e au to mau hohoˈa otiotihia ra, e to mau hohoˈa i tia i nia i roto ia oe ra; e ore oe e haamori faahou i tei hamanihia e to rima ra: 14 e taihitumuhia e au to mau uru raau i roto ia oe ra; na reira e pau ai ia ˈu to mau oire, 15 a tahoo atu ai ma te riri e te faauˈana i nia i te mau fenua aore i faaroo mai ia ˈu ra.