Hosea

TE FAAHARAHIA NEI EPHERAIMA, E O IUDA, E O IAKOBA.

12 Te amu nei Epheraima i te mataˈi, e te pu nei i te maoae, te faarahi nei oia i te haavare e te haru aita e mahana tuua: ua faaau ratou i te parau ia Asura, e te faahorohia nei te monoˈi i Aiphiti. 2 E mârôraa ta Iehova ia Iuda, e faautua ˈtu oia ia Iakoba i tei au i ta ˈna ra mau parau; e tahoo atu oia ia ˈna i ta ˈna i rave ra.

3 I roto oia i te opu i te haruraa i te poro avae o tana tuaana; e no to ˈna puai e mana arii to ˈna i te Atua ra: 4 oia ïa, e mana arii to ˈna i te melahi ra; tupu atura ta ˈna ia ˈna i oto ra, e ia faateni atu ia ˈna ra; i Betela to ˈna iteraa ˈtu ia ˈna, e i reira te parauraa mai ia tatou: 5 oia te Atua sabaota ra o Iehova; Iehova to ˈna iˈoa i haapaohia ra. 6 E teie nei, e fariu oe i to oe ra Atua: e haapao i te aroha hamani maitai ra e te parau au, e ati tamau maite i to oe ra Atua.

7 E taata hoo, e faito haavare tei tana rima: e mea tia ia ˈna te hamani ino ia vetahi ê. 8 Ua parau hoi Epheraima, Ua riro vau ei taata taoˈa, ua itea ia ˈu te taoˈa na ˈu. E i ta ˈu atoa ra mau ohipa e ore e itea ia ratou te ino ei hara na ˈu: 9 o to Atua ra vau, o Iehova, o tei aratai mai ia oe mai te fenua maira mai Aiphiti; e haaparahi faahou â vau ia oe i roto i te tiahapa, mai tei te anotau i te amuiraa moˈa ra. 10 I parau noa vau i te vaha o te mau peropheta, e i faarahi noa vau i te orama, e te faitoraa na te mau peropheta; 11 e hara tei Gileada; e mea faufaa ore mau â te mau idolo; te faatusia nei ratou i te puaatoro i Gilagala; e ua riro ta ratou mau fata mai te pueraa ofai i te vahi arotehia i te mau aua ra. 12 Horo atura Iakoba i te fenua ra o Arama; tavini atura hoi Iseraela i te vahine; e no te vahine â i tiai ai oia i te nǎnǎ mamoe i te mau nǎnǎ puaatoro. 13 E ua aratai mai Iehova ia Iseraela mai Aiphiti mai i te rima o te peropheta; e na te peropheta ratou i tiai. 14 Ua faatupu ra Epheraima i te riri rahi: i vaiiho ai te Fatu i to ˈna toto i nia ia ˈna iho, e tahoo atu oia i te faaino na ˈna ra.