Hosea

Hosea

TE FAAITE NEI HOSEA I TE RIRI O TE ATUA I TE TAIVA.

1 Te parau a Iehova i tae mai ia Hosea a Beeri, i te anotau ia Uzia, e ia Iotama, e ia Ahaza, e ia Hezekia, e mau arii anaˈe no Iuda, e te anotau hoi ia Ieroboama a Ioasa, e te arii no Iseraela. 2 Te haamataraa o te parau a Iehova ia Hosea ra. Ua parau maira Iehova ia Hosea, A haere e rave i te hoê vahine i mataro i te taiata, e haafanau hoi i te tamarii i mataro i te taiata; tei te taiata ˈtura hoi te fenua nei, e ua taiva roa ia Iehova. 3 Ua haere atura oia e ua rave atura ia Gomera, i te tamahine a Dibilaima; ua tô ihora oia e fanau maira e tamaroa. 4 Ua parau maira Iehova ia ˈna, Ia mairihia oia ia Iezereela; ia rooau iti aˈe hoi, ua tahoo atu vau i te toto o Iezereela i nia i te utuafare o Iehu e faaore roa hoi i te basileia o te utuafare o Iseraela. 5 E ia tae i taua mahana ra, e ofati ai au i te fana o Iseraela i te peho o Iezereela.

6 Ua tô faahou ihora hoi oia e fanau maira e tamahine, e ua parau maira Iehova ia ˈna, Ia mairihia oia ia Lo-ruhama, e ore hoi au e aroha faahou i te utuafare o Iseraela; e hopoi-ê-roa-hia râ ratou e au; 7 i te utuafare râ o Iuda, e aroha ïa vau; e faaora vau ia ratou i to ratou Atua ra ia Iehova; e ore râ vau e faaora ia ratou i te fana e te ˈoˈe, e te tamaˈi, e te puaahorofenua, e te faahoro puaahorofenua ra.

8 E haamairi ihora oia i te û ia Lo-ruhama, ua tô ihora e fanau maira e tamaroa. 9 Ua parau maira Iehova, Ia mairihia oia ia Lo-ami: e ere hoi outou i to ˈu ra mau taata, e ere hoi au i te Atua no outou.

10 I te taioraa râ i te tamarii a Iseraela, e riro ïa mai te one tahatai ra, o tei ore e tia ia faito e ia taio ra; e riro hoi ei te vahi i parauhia ˈtu ai ratou e, E ere outou i to ˈu ra taata, ei reira ratou e parauhia ˈtu ai, E tamarii anaˈe outou na te Atua ora ra. 11 Ei reira te mau tamarii a Iuda e te mau tamarii a Iseraela e haaputuputu ai, a faataa ˈtu ai i te hoê no nia iho ia ratou, a haere mai ai ratou mai te fenua maira: e riro hoi te mahana o Iezereela i te rahi.