Daniela

TE ORAMA A DANIELA I NA PUAA E MAHA, E NO TE BASILEIA A TE ATUA.

7 I te matahiti matamua o te arii o Babulonia ra o Belesazara, e taoto ta Daniela, e te orama i tana upoo i nia i tana roi; ua papai ihora oia i taua taoto ra, e ua faaite atura i ta ˈna parau. 2 Ua parau ihora Daniela, na ô aˈera, Hiˈo atura vau i taua orama no ˈu i te rui ra, e inaha, ua puroro noa maira na mataˈi o te raˈi e maha atoa ra i nia i te moana rahi ra. 3 Ua haere maira na mea ora rarahi e maha mai raro mai i te miti ra, e huru ê anaˈe to ratou. 4 O tei mutaa ihora mai te liona nei ïa, e pererau aeto ra te pererau: te hiˈo noa ra vau e pau aˈera na pererau e pee ai i nia ra i te hutihutihia; ua tia noa maira te avae mai te taata ra, e e aau taata tei horoahia ˈtu ia ˈna. 5 E inaha, e mea ora ê maira ïa, o te piti ïa, mai te daba te huru, ua faatiahia te hoê paeau i nia, e toru ivi aoao i te vaha i ropu i na niho ra; e ua parauhia ˈtu oia, A tia a amu e ia rahi. 6 E oti aˈera te reira, te hiˈo noa ra vau, e inaha, te vai ra te tahi mai te nemera, e maha o ˈna pererau manu i nia i te tua; e maha hoi afii to taua mea ora ra; e mana hoi tei horoahia no ˈna. 7 E i muri aˈe i te reira, ite atura vau i te orama i te po ra, e inaha, o te maha ïa o te mea ora, e mea riaria e te mehamehahia, e te puai rahi: niho rahi auri to ˈna; ua amu hoi te reira, e ua pau, e ua ofatifati, e ua taataahi i te toea i te avae: e huru ê hoi to te reira i to te mau mea ora rarahi i mutaa ihora; hoê ahuru hoi o ˈna tara. 8 Ua manaˈo ihora vau i taua mau tara ra, e inaha, ua tupu maira te hoê tara iti i roto ia ratou, i mua ˈˈe ra i te reira iritihia aˈera na tara i mutaa ihora e toru: e inaha, e mata tei teie nei tara mai te mata o te taata ra, e te vaha hoi i te parauraa i te parau rahi.

9 Te hiˈo ra vau, e haamauhia ihora te mau terono e ua parahi maira To te mau mahana tahito ra, o tei au to ˈna ahu i te hiona i te teatea, e te rouru o tana upoo, mai te huruhuru mamoe maitai ra ïa: e auahi ura to ˈna terono, e to ˈna pereoo e auahi ama ïa. 10 Puroro noa maira te auahi tarapape mai mua mai ia ˈna: e ua tausani hoi te tausaniraa i te taviniraa ia ˈna ra, e ua ahuru hoi te tausaniraa i te manotini i te tiaraa i mua i tana aro: parahi ihora te haavaraa, e ua heheuhia te mau buka. 11 Ua hiˈo ihora vau e no te parau rahi i parauhia e taua tara ra; hiˈo ihora vau, e taparahihia taua mea ora ra, e pau aˈera to ˈna pera, e tuuhia ˈtura i te auahi ama ra. 12 Area te tahi pae i taua mau mea ora rarahi ra, ravehia aˈera to ratou mana; i haamaorohia râ to ratou aho e ia tae i te tau e te taime. 13 Hiˈo ihora vau i taua orama i te rui ra, e inaha, te hoê mai te Tamaiti a te taata ra i te haerea mai na roto i te mau ata o te raˈi ra; e ua haafatata ˈtura oia i To te mau mahana tahito ra, e tuuhia ihora i pihai iho ia ˈna. 14 E ua horoahia maira te mana, e te hinuhinu, e te basileia no ˈna, ia auraro mai te taata atoa, e te mau fenua atoa, e te reo atoa ia ˈna; to ˈna mana, e mana mure ore ïa, e ore ïa e mou, e to ˈna basileia, e ore ïa e pau.

15 Ahoaho aˈera vau i tau varua, o vau nei o Daniela, i roto i to ˈu nei tino; e no te ahoaho rahi to ˈu i taua orama i tau upoo nei, 16 ua haere ihora vau i te hoê i tia noa mai i pihai iho, e ua ui atura vau ia ˈna i te auraa mau i taua mau mea atoa nei; ua parau maira oia ia ˈu, e ua faaite maira i te auraa ia ˈu, na ô maira: 17 Taua na mea ora rarahi e maha nei, e maha ïa basileia, o te tupu ïa i te fenua nei. 18 O te feia moˈa râ no Tei Teitei ra te rave i taua basileia nei, e no ratou roa ˈtu te basileia, e a muri, e a muri noa ˈtu. 19 Ua ui atura vau i te auraa i te maha o taua na mea ora rarahi, o tei ore i au ia ratou ra, e mehameha rahi ïa, e niho auri hoi to ˈna, e to ˈna maiuu, e veo ïa; o tei amu e ia pau roa, e ua ofatifati, e ua taataahi i te toea i to ˈna avae; 20 e na tara hoê ahuru i nia i te afii ra, e te hoê hoi tei tupu ra, e mairi ihora e toru i te reira ra: taua tara e mata to ˈna ra, e te vaha i te parauraa i te parau rahi ra, o tei itoito rahi to ˈna huru i to ratou atoa ra. 21 Te hiˈo noa ra vau, e ua tamaˈi maira taua tara nei i te feia moˈa ra, e riro atura te re ia ˈna ra; 22 e tae maira To te mau mahana tahito ra, e ua tuuhia mai te haavaraa i te feia moˈa no Tei Teitei ra, ua tae aˈera i te tau e riro ai te basileia i te feia moˈa ra.

23 Ua parau maira hoi oia, O te maha o te mea ora, o te maha ïa o te basileia i te fenua nei, e huru ê hoi to ˈna i to te mau basileia atoa ra, e pau hoi te ao atoa nei i te reira, e taataahi hoi i raro, e ofatifati hua hoi. 24 E na tara hoê ahuru no roto i teie nei basileia, o na basileia ïa hoê ahuru e tupu ra; e muri aˈe e tupu ai te tahi; e huru ê hoi to te reira i tei mutaa ihora, e toru hoi basileia e pau ia ˈna. 25 E te arii hoi no te reira, o te parau ïa i te parau faaino i Tei Teitei ra, e pau hoi te feia moˈa no Tei Teitei ra ia ˈna, e manaˈo hoi e ruri ê i te taime e te mau ture: e tuuhia mai hoi ratou i tana rima, e hoê aˈera tau e na tau hoi e te hoê tau vaehaa. 26 E parahihia râ te haavaraa, ia rave-ê-hia to ˈna mana, ia pau e ia haamou-roa-hia. 27 E te basileia, e te mana, e te rahi atoa o te basileia i raro aˈe i te raˈi atoa nei, o te horoahia ïa i te mau taata ra, i te feia moˈa o Tei Teitei, no ˈna te basileia mou ore ra, e hope hoi te mau tavana atoa i te auraro mai e te faaroo ia ˈna. 28 O te hopea ïa i taua parau ra. Area vau nei o Daniela, ahoaho roa aˈera to ˈu manaˈo, e huru ê atura tau mata ia ˈu nei: vaiiho ihora râ vau i taua parau nei i roto i tau aau.