Daniela

TO NEBUKANESA FAATIARAA I TE TII RAHI AURO I DURA RA.

3 Hamani ihora te arii ra o Nebukanesa i te hoê tii auro, e ono ahuru te kubiti i te teitei, e ono hoi kubiti i te aano: e ua faatia aˈera oia i taua tii ra i te vahi papu ra i Dura, i te mataeinaa ra i Babulonia. 2 Ua tono aˈera te arii ra o Nebukanesa i te vea e ope mai i te mau arii, e te mau tavana, e te mau raatira, e te mau haava, e te feia mau taoˈa, e te mau faaaˈo, e te mau tiaau, e te mau tavana i te mau mataeinaa ra, e haere mai i te haamoˈaraa i te tii i faatiahia e te arii ra, e Nebukanesa. 3 Ua haaputuputu maira te mau arii, e te mau tavana, e te mau raatira, e te mau haava, e te feia mau taoˈa, e te feia faaaˈo, e te mau tiaau, e te mau tavana i te mau mataeinaa ra, i te haamoˈaraa i te tii i faatiahia e te arii ra, e Nebukanesa. E ia tia anaˈe ratou i mua i taua tii i faatiahia o Nebukanesa ra. 4 Ua tiaoro maira te poro, te faaitehia ˈtu na outou, e te mau taata na, e te mau fenua na, e te reo ěê atoa ra, 5 ua ite anaˈe outou i te oto o te pu, e te vivo, e te kinura, e te sabaka, e te nabala, e te sumephonia, e te mau mea atoa i faaotohia ra, e tipapa outou i raro, i reira haamori ai i te tii auro i faatiahia e te arii ra, e Nebukanesa: 6 e o te ore e tipapa i raro a haamori ai, ei taua hora ra oia e titirihia ˈi i roto i te umu auahi ura ra. 7 E tae aˈera i te taime i ite ai te mau taata i te oto pu, e te vivo, e te kinura, e te sabaka, e te nabala, e te mau mea atoa i faaotohia ra, ua tipapa ihora te mau taata atoa i raro, e te mau fenua, e te reo ěê atoa, e ua haamori atura i te tii auro ta te arii ra ta Nebukanesa i faatia ra.

8 Ua haafatata maira te tahi pae Kaladaio i reira, ua tihotiho maira i te ati Iuda. 9 Ua parau maira ratou, na ô maira i te arii ra ia Nebukanesa, E te arii e, ia ora roa oe. 10 Ua faatia oe i te hoê parau, e te arii, e te taata i ite i te oto o te pu, e te vivo, e te kinura, e te sabaka, e te nabala, e te sumephonia, e te mau mea e faaotohia ra, o te tipapa ïa i raro haamori ai i te tii auro ra; 11 e o tei ore e tipapa i raro a haamori ai; e hurihia ïa i roto i te umu auahi ura ra. 12 Teie hoi e toofanu pue ati Iuda i tuuhia e oe i nia i te haapaoraa o te mataeinaa ra o Babulonia, o Sedaraka, e o Meseka, e o Abede-nego; aore taua mau taata nei i haapao ia oe, e te arii: aore ratou i haamori i to oe ra mau atua, aore hoi i haamori i te tii auro ta oe i faatia ra.

13 Ua faaue atura Nebukanesa ma te riri rahi uˈana no ˈna ra, e aratai mai ia Sadaraka, e ia Meseha, e ia Abede-nego ra. Ua aratai maira ratou i taua na taata ra i mua i te aro o te arii. 14 Ua parau maira Nebukanesa, na ô maira ia ratou, E parau mau anei, e Sadaraka, e Meseka, e Abede-nego, e ore outou e haamori i to ˈu nei mau atua, e ore hoi e haamori i te tii auro ta ˈu i faatia ra? 15 E tena na, ia ite outou i te oto o te pu, e te vivo, e te kinura, e te sabaka, e te nabala, e te sumephonia, e te mau mea e faaotohia ra, te tipapa ra outou i raro te haamori ra i te hohoˈa i hamanihia e au nei, ua tia ïa; ia ore râ outou ia haamori ra, ei taua hora ra outou e hurihia ˈi i roto i te umu auahi ura ra, e o vai te Atua e faaora ia outou i to ˈu nei rima? 16 Ua parau atura Sadaraka, ratou o Meseka, e Abede-nego, na ô atura i taua arii ra, E Nebukanesa, aore ra matou i ru i te parauraa ˈtu ia oe i tena na parau. 17 Ia hinaaro oia iho, e tia ïa i to matou Atua e haamori nei ia faaora oia ia matou i te umu auahi ura ra, e tia ïa ia ˈna ia faaora ia matou i to rima, e te arii; 18 ia ore râ oia ia hinaaro, e ore â matou e haamori i to oe ra mau atua, ia ite mai oe, e te arii, e ore hoi e haamori i te tii auro i faatiahia e oe ra.

19 Î roa aˈera Nebukanesa i te riri rahi, e huru ê atura tana mata ia Sadaraka, e ia Meseka, e ia Abede-nego: ua parau atura oia, faaue atura ia tahu ratou i te umu ra, e ia taihitu te tahuraa i te mau tahuraa atoa ra. 20 E ua faaue atura oia i te feia puai rahi i te nuu atoa no ˈna ra e ruuruu ia Sadaraka, e ia Meseka, e ia Abede-nego, e huri hoi ia ratou i roto i te umu auahi ura ra. 21 Ruuruuhia ihora taua pue taata ra, ma te ahu, e te taupoo, e te ahu tipona, e te mau ahu atoa ra, e hurihia ihora i roto i te umu auahi ura ra. 22 E no te mea te ru ra te faaue a te arii ra, e ua rahi roa te umu i te ama, pohe roa aˈera taua mau taata ra, o tei rave ia Sadaraka, e ia Meseka, e ia Abede-nego ra. 23 O eie nei râ pue taata tootoru, o Sadaraka, e o Meseka, e o Abede-nego ra, mairi ihora ïa i raro ma te ruuruuhia i rotopu i taua umu auahi ura ra.

24 Ua maere noa ihora te arii ra o Nebukanesa i reira, e ua tia ru noa maira, ua parau maira, na ô maira i te mau faaaˈo no ˈna ra, E ere anei tootoru a tatou tau taata ruuruuhia i huri i roto i te auahi? Ua parau atura ratou, na ô atura i te arii, E te arii, e parau mau. 25 Ua parau maira oia, na ô maira, Inaha, te ite nei au i na taata toomaha ma te tapea ore, i te haere-noa-raa no roto i te auahi e aore roa e maˈi; e te huru o te toomaha ra mai te Tamaiti ïa a te Atua ra.

26 Ua haafatata maira Nebukanesa i te auvaha o taua umu auahi ura ra, e ua parau atura, na ô atura, E Sadaraka, e Meseka, e Abede-nego, e na tavini o te Atua teitei, e haere mai i rapae, e haere mai i ǒ nei. Ua haere maira Sadaraka, e o Meseka, e o Abede-nego i rapae mai rotopu mai i te auahi ra. 27 E putuputu maira te mau arii, e te mau tavana, e te mau raatira, e te mau faaaˈo o te arii ra, ua hiˈo ihora i taua na taata ra, ite aˈera e aore roa to ratou tino i taea i te auahi, aore roa hoi te hoê io rouru o to ratou upoo i ama, aore hoi to ratou ahu i huru ê, aore hoi i mau mai te hauˈa auahi i nia ia ratou. 28 Ua parau ihora Nebukanesa, na ô aˈera, Ia haamaitaihia te Atua no Sadaraka, e no Meseka, e no Abede-nego, o tei tono mai i tana melahi e ua faaora i to ˈna pue tavini i tiaturi ia ˈna ra, e ua faaore aˈenei i ta te arii ra parau, e ua horoa noa mai i to ratou tino ia ore ratou ia haamori, ia ore ia tavini atu i te tahi atua ê, maori râ o to ratou ihora Atua. 29 E teie nei, te faatupu nei au i te hoê parau, E te mau taata, e te fenua, e te mau reo ěê atoa ra, ia faaino mai i te Atua no Sadaraka, e no Meseka, e no Abede-nego, e tapûpûhia ïa, e faarirohia ïa to ratou mau fare ei puea: no te mea aita ˈtu Atua e tia ˈi ia faaora mai teie nei te huru. 30 Ua faateitei ihora te arii ia Sadaraka, e ia Meseka, e ia Abede-nego, i taua mataeinaa ra i Babulonia.