Ezekiela

TE MAU TUFAA NO NA PǓPǓ TINO AHURU MA PITI RA.

48 Teie te iˈoa o te mau opu ra. Ia na te hiti i te pae i apatoerau i te pae i uta ia na Hetelona, i tae atu ai te taata i Hamata, Hazara-enana, i te hiti o Damaseko i te pae i apatoerau ra, i te fenua ra i Hamata: e to ˈna otia i te hitia o te râ ra, o tahatai ïa: o Dana hoê ïa tufaa. 2 E te otia o Dana, mai te hiti i te pae i te hitia o te râ ra, e tae atura i te pae i te tooa o te râ ra, o Asera hoê ïa tufaa. 3 E te otia o Asera, mai te hiti i te pae i te hitia o te râ ra, e tae atura i te pae i te tooa o te râ ra, o Naphatali hoê ïa tufaa. 4 E te otia o Naphatali ra, mai te hiti i te pae i te hitia o te râ ra, e tae atura i te pae i te tooa o te râ ra, o Manase hoê ïa tufaa. 5 E te otia o Manase ra, mai te hiti i te pae i te hitia o te râ ra, e tae atura i te pae i te tooa o te râ ra, o Epheraima hoê ïa tufaa. 6 E te otia o Epheraima, mai te hiti i te pae i te hitia o te râ ra, e tae atura i te tooa o te râ ra, o Reubena hoê ïa tufaa. 7 E te otia o Reubena, mai te hiti i te pae i te hitia o te râ ra, e tae atura i te tooa o te râ ra, o Iuda hoê ïa tufaa.

8 E te hiti o Iuda ra, mai te hiti i te pae i te hitia o te râ ra, e tae atura i te tooa o te râ ra, ei reira te vahi ta outou i pûpû, hoê taata ma pae tausani i te kubiti i te aano, e te maoro hoê ïa tufaa, mai te pae i te hitia o te râ ra e tae noa ˈtu i te pae i te tooa o te râ ra: e te fare moˈa ra ei rotopu ïa. 9 Te vahi ta outou e pûpû ia Iehova ra, hoê taau ïa ma pae i te tausani i te maoro, hoê ahuru i te tausani i te aano. 10 No te reira hoi te vahi moˈa pûpûhia no te feia tahuˈa: i te pae i apatoerau ra hoê taau ma pae i te tausani i te maoro, e te pae i te tooa o te râ ra hoê ahuru i te tausani i te aano, e te pae i te hitia o te râ ra hoê ahuru i te tausani i te aano, e te pae i apatoa ra hoê taau ma pae i te tausani i te maoro: e te fare moˈa o Iehova ei ropu ïa. 11 No te pǔpǔ tahuˈa haamaitaihia ra te reira i te mau tamarii a Zadoka; o tei haapao i te poroi no ˈu ra, tei ore i taiva a taiva ˈi te mau tamarii a Iseraela ra, mai te mau ati Levi i taiva ra. 12 E riro hoi ei vahi pûpû moˈa roa no ratou, no roto i te vahi pûpû o te fenua nei, i te hiti o te ati Levi ra. 13 E i mua mai i te hiti o te pǔpǔ tahuˈa ra, o ta te ati Levi ïa hoê taau ma pae i te tausani i te maoro, hoê ahuru i te tausani i te aano; i te maoro atoa ra hoê taau ïa ma pae i te tausani, e te aano hoê ïa ahuru i te tausani. 14 Eiaha hoi ratou e hoo i te reira; eiaha roa hoi ei taata e hoo maa noa i te oho matamua o te fenua nei: e mea moˈa hoi te reira na Iehova.

15 E na tausani e pae i toe i te aano ra, i mua mai i na tausani hoê taau e ma pae ra, ei vahi noa ïa no te oire, ei parahiraa, e ei fenua hiti; ei ropu hoi te oire tia ˈi. 16 Teie hoi te faito; i te pae i apatoerau e maha ïa tausani e pae hanere, e te pae i apatoa e maha ïa tausani e pae hanere, e te pae i te hitia o te râ ra e maha ïa tausani e pae hanere, e te pae i te tooa o te râ ra e maha ïa tausani e pae hanere. 17 E te fenua hiti no taua oire ra, e piti ïa hanere i te pae i apatoerau ra e pae ahuru, e te pae i apatoa ra e piti ïa hanere, e pae ahuru, e te pae i te hitia o te râ ra e piti ïa hanere e pae ahuru, e te pae i te tooa o te râ ra e piti ïa hanere e pae ahuru. 18 E te toea o te maoro i mua mai i te vahi pûpû moˈa ra, hoê ïa ahuru i te tausani i te pae i te hitia o te râ ra, hoê hoi ahuru i te tausani i te pae i te tooa o te râ ra, i mua mai i te vahi pûpû moˈa ra; e te maa i tupu i taua fenua ra, ei maa ïa na te feia i faaamu i taua oire ra. 19 E te feia e faaamu mai i taua oire ra, na te mau opu atoa i Iseraela nei e faaamu. 20 Taua vahi pûpû atoa ra hoê taau ïa e ma pae i te tausani, hoê taau hoi e ma pae i te tausani i te tahi pae: e maha aroâ to taua vahi moˈa ra ia pûpû outou, e te oire atoa i pûpûraa.

21 E te toea ra, na te arii ïa, i teie e i tera paeau i te vahi pûpû moˈa ra, e te taoˈa no te oire ra, i mua mai i tei tiraha tia i te taau hoê e ma pae i te tausani, no te vahi pûpû i fariu tia i te hiti o te fenua i te pae i te hitia o te râ ra, e te pae i te tooa o te râ ra, i tei tiraha tia i te taau ma pae o te tausani, i te hiti o te fenua i te pae i te tooa o te râ ra, i tei farii i te tufaa a te arii ra: e te vahi pûpû moˈa, e te vahi moˈa i taua fare ra, ei ropu ïa. 22 Mai te tufaa mai o te ati Levi ra, e mai te tufaa mai o te oire i ropu ra, no te arii ïa; i ropu i te hiti o Iuda e te hiti o Beniamina, o ta te arii ïa.

23 Area to toea i taua mau opu ra, mai te hiti i te pae i te hitia o te râ ra e te hiti i te pae i te tooa o te râ ra, o te tahi ïa o Beniamina. 24 E te hiti o Beniamina, mai te hiti i te pae i te hitia o te râ ra, e te hiti i te pae i te tooa o te râ ra, o te tahi ïa o Simeona. 25 E te hiti o Simeona, mai te hiti i te pae i te hitia o te râ ra, e te hiti i te pae i te tooa o te râ ra, o te tahi ïa o Isakara. 26 E te hiti o Isakara ra, mai te hiti i te hitia o te râ ra, e te hiti i te pae i te tooa o te râ ra, o te tahi ïa o Zebuluna. 27 E te hiti o Zebuluna ra, mai te hiti i te hitia o te râ ra, e te hiti i te pae i te tooa o te râ ra, o te tahi ïa o Gada. 28 E te hiti o Gada ra, i te hiti i te pae i apatoa ra, mai Tamara roa mai taua hiti ra, e tae noa ˈtu i te pape mârô i Kadesa, e tae noa ˈtura i te pape i te tai rahi ra. 29 O ta outou teie nei fenua e tufa kelero i te mau opu o Iseraela ei parahiraa, e teie hoi to ratou mau otia, te parau maira te Fatu ra o Iehova.

30 Teie te mau tomoraa i rapae au i taua oire ra; tei te pae i apatoerau ra, e maha ïa tausani i te kubiti e pae hanere i te faitoraa. 31 E mairihia hoi te mau uputa o te oire i te mau iˈoa o te mau opu o Iseraela ra: e toru uputa i te pae i apatoerau ra: hoê uputa no Reubena, hoê uputa no Iuda, hoê uputa no Levi. 32 E ei te pae i te hitia o te râ ra, e maha ïa tausani e pae hanere: e na uputa e toru ra; no Iosepha te tahi, no Beniamina te tahi, no Dana te tahi. 33 E ei te pae i apatoa ra, e maha ïa tausani e pae hanere i te faitoraa: e na uputa e toru ra; no Simeona te tahi, no Isakara te tahi, no Zebuluna te tahi. 34 E ei te pae i te tooa o te râ ra, e maha ïa tausani e pae hanere, e to ratou mau uputa e toru; no Gada te tahi, no Asera te tahi, no Naphatali te tahi. 35 Hoê ahuru e ma vau i te tausani i te aeho ia haaati ra: e te iˈoa o taua oire ra mai taua mahana maira, tei reira Iehova.