Ezekiela

TE AˈOHIA NEI TE MAU TIAI MAMOE RAVE INO RA E TE ATUA.

34 Ua tae maira te parau a Iehova ia ˈu nei, na ô maira, 2 E te tamaiti a te taata na, e tohu oe i te mau tiai ia Iseraela, a tohu, e parau atu ia ratou, Te na ô maira te Fatu ra o Iehova i te mau tiai; E pohe to te mau tiai ia Iseraela tei faaamu ia ratou iho! eiaha te mau tiai ia faaamu i te nǎnǎ? 3 Te amu ra outou i te meˈî, e te faaahu nei ia outou iho i te huruhuru e te tiapai nei i tei poria ra: aore râ outou i faaamu i te nǎnǎ. 4 O tei paruparu ra aore outou i faaetaeta, e tei maˈihia ra aore outou i faaora, e tei fati aore outou i taamu, e tei haapurarahia ra, aore outou i faahoˈi mai, aore hoi outou i imi i tei moe ra; ua faahepo râ outou ia ratou ma te aroha ore e te hamani ino. 5 I purara hoi ratou, no te mea aore e tiai: e ua riro ratou ei maa na te mau taehae o te aru ra, a purara ˈi ratou ra. 6 Ua haere noa te nǎnǎ na ˈu na nia i te mau mouˈa atoa ra, e i nia atoa i te mau aivi teitei ra: ua purara hoi tau nǎnǎ na nia i te fenua atoa ra, e aore roa e imi ia ratou.

7 E teie nei, e te mau tiai, e faaroo mai outou i te parau a Iehova; 8 Te na ô maira te Fatu ra o Iehova, Te ora nei au ra, no te mea ua riro tau nǎnǎ ei maa, e ua riro tau nǎnǎ ei amuraa na te mau taehae atoa o te aru ra, e aore e tiai, aore hoi tau mau tiai i imi i tau nǎnǎ, ua faaamu râ te mau tiai ia ratou iho, e aore i faaamu i tau nǎnǎ; 9 e teie nei, e te mau tiai, e faaroo mai i te parau na Iehova; 10 Te na ô maira te Fatu ra o Iehova, Inaha, e ore au e faatia i te mau tiai; e titau vau i tau nǎnǎ i to ratou rima, e faaore hoi au i ta ratou faaamuraa i ta ˈu nei nǎnǎ; e ore hoi te feia tiai e faaamu faahou ia ratou iho; e faaora hoi au i tau nǎnǎ i to ratou vaha, e eiaha ia riro ei maa na ratou.

11 Te na ô maira hoi te Fatu ra o Iehova, Inaha, na ˈu iho nei e imi i tau mau mamoe, e ia itea ˈtu ratou: 12 mai te tiai e imi i ta ˈna nǎnǎ, tei roto oia i ta ˈna nǎnǎ ia purara ê ra; e na reira atoa vau i te imi i ta ˈu nǎnǎ, e ua faaora ia ratou i te mau vahi atoa i purara ˈi ratou i te mahana i marumaru i te ata e te pouri. 13 E aratai mai au ia ratou i rapae au mai i te mau taata ra, e haaputu mai au ia ratou mai te mau fenua mai: e aratai mai au ia ratou i to ratou ihora fenua mau, a faaamu ai ia ratou i nia i te mau mouˈa o Iseraela, e te hiti o te mau pape ra, e te parahiraa atoa o te fenua nei. 14 E faaamu vau ia ratou i te amuraa maitai ra, e ei nia i te mau mouˈa teitei o Iseraela ta ratou aua: ei reira ratou e taoto ai i te aua maitai ra, e ei roto i te amuraa e poria ˈi ratou a amu ai i nia i te mau mouˈa o Iseraela ra. 15 Na ˈu e faaamu i tau nǎnǎ, e ua faataoto ia ratou i raro, te na reira maira te Fatu ra o Iehova. 16 Na ˈu e imi i tei moe ra, e ua faahoˈi mai i tei purara ê, e ua taamu hoi i tei fati ra, e na ˈu e faaetaeta i tei maˈihia ra; e na ˈu e tairi i tei poria e tei etaeta; e ua faaamu hoi au ia ratou ma te parau au ra.

17 Area outou, e tau nǎnǎ, te na ô maira te Fatu ra o Iehova; Inaha, na ˈu e hiˈo i te puaa, i te tahi e te tahi, e te mamoe oni e te puaaniho oni ra. 18 E mea iti anei ia outou, ua amu ihora hoi outou i te maa maitai ra e oti aˈera; ua taataahi ihora hoi to outou avae i te toe i taua maa na outou ra? e aore hoi outou i inu i te pape ateate anaˈe ra; ua faareru râ outou i te toe i to outou avae? 19 E tau nǎnǎ nei, te amu nei ratou i ta outou i taataahi i to outou avae; e tei faareruhia e to outou avae ta ratou e inu nei.

20 E teie nei, te na ô maira te Fatu ra o Iehova ia ratou; Inaha, o vau, o vau nei â, te hiˈo i te puaa poria e te puaa tiahape. 21 No te mea te tute nei to outou aoao e to outou humaha, e ua tute i tei maˈihia ra i to outou tara, e purara ê atu ratou ia outou: 22 e teie nei, e faaora vau i tau nǎnǎ e ore hoi ïa e pau faahou; e na ˈu e hiˈo i te puaa, i te tahi e te tahi. 23 E na ˈu e tuu i te tiai hoê i nia ia ratou, e na ˈna ratou e faaamu, o tau tavini nei o Davida; na ˈna ratou e faaamu, e oia to ratou tiai. 24 O vau hoi o to ratou Atua o Iehova, e tau tavini o Davida, ei arii ïa i roto ia ratou; o vau teie o Iehova e parau nei. 25 E fafau vau i te faufaa hau ia ratou, e na ˈu e faaore i te puaa taehae i nia i te fenua nei: e parahi noa hoi ratou ma te ora i te medebara; e taoto hoi i roto i te uru raau: 26 e faariro vau ia ratou, e te mau vahi i pihai iho i to ˈu nei mouˈa e ati noa ˈˈe ei maitai; e na ˈu e haamairi i te tuâ ûa i to ˈna tau; ei tuâ ûa faatupu ïa. 27 E hotu te mau raau o te ô ra i ta ratou maa, e tupu hoi to nia i te fenua ra; e parahi hoi ratou ma te ora i to ratou ra fenua, e ite hoi e, o vau o Iehova, ia ofatihia e au te tapea ra i to ratou zugo, e ia faaorahia ratou e au i te rima o te feia i titau mai ia ratou ei tavini. 28 E ore atura ratou e riro ei taoˈa pau no te mau fenua, e ore hoi ratou e pau i te taehae o te fenua ra; e parahi râ ratou ma te panoonoo ore, e aore roa e haamataˈutaˈu ia ratou. 29 E na ˈu e faatupu i te tahi ohi paroo na ratou, e ore hoi ratou e pohe faahou i te poia i taua fenua ra, e ore hoi e faaoromai faahou i te faaino o te mau fenua ra. 30 E ite ïa ratou i reira e, o vau to ratou Atua ra o Iehova, tei pihai iho ia ratou, e o ratou to ˈu taata, te utuafare o Iseraela, te na reira maira te Fatu ra o Iehova. 31 O outou hoi tau nǎnǎ, te nǎnǎ o ta ˈu nei aua, e taata outou, e o vau hoi to outou Atua ra o Iehova, te na reira maira te Fatu ra o Iehova.