Ezekiela
Ezekiela
TE ANOTAU I TOHU AI EZEKIELA I KEBARA.
1 E tae aˈera i te toru ahuru o te matahiti, e te maha o te marama, e te pae hoi o te mahana i taua marama ra, tei roto vau i te mau tîtî i te pape ra i Kebara, iritihia aˈera te raˈi, e ite atura vau i te orama a te Atua. 2 I te pae o te mahana i taua marama ra, o te matahiti pae ïa o te tîtîraa o te arii ra o Iehoiakina. 3 O te faaite papuraa mai ïa i te parau a Iehova ia Ezekiela a Buzi tahuˈa ra, i te fenua o te Kaladaio, i te pae o te pape ra o Kebara; e tei nia maira te rima o Iehova ia ˈna i reira.
4 E ua hiˈo ihora vau, e inaha, e puahiohio i te taeraa mai no te pae i apatoerau ra, e te hoê ata rahi, e te auahi i te haafifi-atoa-raa i roto ra, e te anaana i te haaati-atoa-raa; e i rotopu ra mai te hesemala te huru, i rotopu i taua auahi ra. 5 E te vai atoa ra i ropu mai na mea ora e maha ra te huru. Teie to ratou huru; mai to te taata nei â to ratou huru. 6 Taimaha anaˈe â o ratou mata e ati noa ˈˈe ratou, taimaha hoi o ratou pererau e ati noa ˈˈe. 7 E to ratou avae, e avae titiaifaro noa ïa; e to ratou maiuu avae ra, mai to te kafa ra ïa, e mai te veo faaanaanahia ra to ratou huru i te purapuraraa mai. 8 E rima taata hoi to ratou i raro aˈe i na pererau, i na hiti atoa e maha ra; i na reira atoa ratou toomaha to ratou pue mata e to ratou pererau. 9 Taatihia to ratou pererau te tahi i te tahi; aore ratou i fariuriu ia haere; i haere noa ra ratou atoa ra na mua. 10 E te huru o to ratou mau mata, e e mata taata to ratou, e te mata liona, i te pae atau: e o ratou atoa toomaha ra, e mata puaatoro ïa i te pae aui; e e mata aeto to ratou atoa toomaha ra. 11 O te huru ïa o to ratou ra mau mata. I faaareahia hoi to ratou mau pererau i te pae i nia ra; e piti aˈe pererau te mea ora hoê i taatihia, e e piti hoi ei tapoˈi ïa i to ratou tino. 12 E haere titiaifaro noa ratou atoa ra na mua; ta te varua e haere ra ua haere atoa ratou; aore hoi i fariu ia haere ratou ra. 13 E te huru o taua mau mea ora ra, e au ratou i te arahu auahi e ura ra, mai te huru o te lamepa i te peeraa i nia e te hoˈiraa i raro, na roto i taua mau mea ora ra; e te anaana maira taua auahi ra, e ua puroro maira te uira no roto i taua auahi ra. 14 Ua horo ihora taua mau mea ora ra, e ua hoˈi maira mai te anaparaa uira ra.
15 Te hiˈo noa ra vau i taua mau mea ora ra, e inaha, e pereoo tei nia i te fenua nei i pihai iho i taua na mea ora ra e na aroâ atoa e maha ra. 16 E te huru o taua na pereoo ra e ta ratou ohipa, mai te tarisisa te huru: e hoê o ratou hete e maha atoa ra: e to ratou huru e ta ratou ohipa, mai te mea e, e pereoo i ropu i te tahi pereoo. 17 E ia haere ratou ra, na nia i na hiti atoa e maha ra ia haere: e aore hoi ratou i fariu mai ia haere ra. 18 E to ratou haaatiraa, e teitei rahi to te reira, e mea riaria hoi; e to ratou haaatiraa, ua îî ïa i te mata e ati noa ˈˈe ratou e maha atoa ra. 19 E ua haere anaˈe taua na mea ora ra, na pereoo atoa i te haere-atoa-raa: e ua hopoi-anaˈe-hia na mea ora i nia ê i te fenua ra, ua hopoi-atoa-hia na pereoo. 20 E te mau vahi atoa i haerehia e te varua ra, ua haere atoa ratou, i reira hoi te varua i te haereraa: ua hopoi-atoa-hia na pereoo i pihai iho: te vai ra hoi te varua o taua mau mea ora ra i roto i te mau pereoo. 21 Ua haere anaˈe te reira, ua haere atoa teie; e ua tia anaˈe te reira, ua tia atoa teie; e ua hopoi-anaˈe-hia te reira i nia ê i te fenua ra, ua hopoi-atoa-hia na pereoo i pihai iho; tei roto hoi te varua o taua na mea ora ra i te mau pereoo ra.
22 E mai te reva nei te huru i te vairaa mai i nia ˈˈe i te upoo o taua mau mea ora ra, mai te kerehe riariahia ra te huru, i te hohoraraahia na nia ˈˈe i to ratou mau upoo ra. 23 E o raro aˈe i taua reva ra te tarava noa ra to ratou mau pererau, te tahi e te tahi: taipiti anaˈe â to ratou ei tapoˈi i to ratou tino i teie paeau, e taipiti hoi to ratou ei tapoˈi i to ratou tino i tera paeau. 24 E ua haere anaˈe ratou ra, te faaroo ra vau i te haruru o to ratou mau pererau, mai te haruru o te tai rahi ra, mai te reo o te Puaihope ra; te haruru o to ratou reo mai te haruru o te nuu atoa ra: e ua tia noa ratou ra, ua tuu ïa i to ratou mau pererau. 25 E te hoê reo maira no roto i te reva i nia ˈˈe i to ratou mau upoo ra, a tia noa ˈi ratou ma te pererau i tuuahia ra.
26 E o nia ˈˈe i te reva i nia i to ratou mau upoo ra, mai te hoê terono te huru mai te ofai saphira ra; e i nia ˈˈe i te huru o te terono ra, e hohoˈa ïa no te taata i te parahiraa i nia iho. 27 Ua hiˈo ihora vau mai te hesemala te huru, mai te auahi ra e ati noa ˈˈe i roto ra; mai to ˈna taha aoao ra e nia aˈera, e mai to ˈna taha aoao e raro ihora, ite atura vau e mai te auahi te huru, e ua ati aˈera oia i te anaana. 28 Mai te huru o te anuanua e vai i roto i te ata i te mahana ûa nei, o te huru ïa o te anaana e ati noa ˈˈe. O te huru ra teie o te anaana o Iehova. E tei te iteraa ˈtu vau ra, ua tipapa ihora vau i raro te mata, faaroo atura vau i te reo o te hoê i parau maira.