Oto o Ieremia
TE PURE NEI IEREMIA, E TE FAAITE NEI I TE ATI RAHI MA TE HAEHAA.
5 Haamanaˈo mai, e Iehova, i tei iri mai i nia ia matou nei: e hiˈo mai i raro nei, e haamanaˈo mai i to matou ino. 2 Ua ruri-ê-hia ta matou tufaa tei ia vetahi ê, e to matou mau fare tei ia vetahi ê, e to matou mau fare tei te taata ěê. 3 Ua riro matou ei otare aore e metua tane, ua ivi to matou mau metua vahine. 4 Ei moni e inu ai matou i ta matou pape, i hoohia mai hoi ta matou vahie. 5 Te faahorohia nei matou ma te hopoia i nia to matou aˈî, te haa noa nei matou, aore e faaearaa. 6 Ua auraro matou ia Aiphiti, e ia Asura, ia paia hoi matou i te maa. 7 Ua rave to matou mau metua i te hara, e aita nei; e tei nia ia matou te pohe i ta ratou mau hara. 8 E tavini tei faahepo mai i nia ia matou, e aore roa hoi e faaora e ora ˈi i ratou rima. 9 Te roaa nei ta matou maa ma te itea ore te ora, no te ˈoˈe i te medebara. 10 Ua ereere to matou iri mai te umu ra, no te oˈe rahi ra. 11 Te mau vahine i Ziona, ua harua-noa-hia e ratou, e te mau paretenia i te mau oire i Iuda ra. 12 Tarî-noa-hia te hui arii i te rima, e aore i faaturahia te feia paari. 13 Ua rave ratou i te taata apî ei feia taviri sitona, e ua hiˈa te tamarii i raro aˈe i te hopoia vahie. 14 Ua ore te mau taata paari i te uputa, e te mau taata apî i ta ratou i faaoto ra. 15 To matou oaoa aau ra, ua ore ïa, ua riro to matou oriraa ei otoraa. 16 Te korona o to matou upoo ra ua mairi ïa, atae hoi tatou! no te mea ua rave hoi tatou i te hara. 17 No reira i taiâ i to tatou aau, no teie nei mau parau i mohimohi ai to tatou mata; 18 no te mouˈa ra o Ziona, o tei ano ra ïa, e ua haere noa te alope na nia iho. 19 Area oe, e Iehova, e tia oe i te parahiraa e a muri noa ˈtu, e to oe terono i tera ui, i tera ui. 20 Eaha oe i haamoe hua mai ai ia matou nei? E haamaoro mai hoi oe i to oe faarueraa mai ia matou? 21 E haafariu oe ia matou ia oe, e Iehova, ua fariu ïa matou i reira; faahou mai oe i to matou pue mahana mai tei tahito ra. 22 Ua faarue hua mai râ oe ia matou nei? e riri rahi roa hoi to oe ia matou.