Oto o Ieremia
TE MIHI NEI TE PEROPHETA I TE HURU O TE TAATA.
3 O vau te taata i ite i te pohe i te papairaa i to ˈna riri; 2 o vau ta ˈna i aratai, ia haere noa vau na te pouri, eiaha ia na te maramarama; 3 ua fariu faahou mai â oia i tana rima e rave â ia ˈu e mure noa ˈtu te mahana.
4 Ua faaaao mai oia i tau tino e tau iri, e ua ofati oia i tau mau ivi; 5 ua patu haaati mai oia ia ˈu, ua haapuni oia ia ˈu i te mauiui e te ati; 6 ua haaparahi oia ia ˈu i te mau vahi pouri, mai te feia pohe tahito ê ra.
7 Ua haaati mai oia ia ˈu i te aua e aita ˈtura vau i tae i rapae, ua faateiaha mai oia i tau mau fifi nei; 8 e ia tiaoro atu vau e ia pii hua, ua opani oia i tau pure i rapae; 9 ua arai oia i tau eˈa i te ofai taraihia ra, e ua haapiˈo oia i tau eˈa.
10 E daba tiai mai oia ia ˈu, e liona i roto i te pupuniraa; 11 ua faafariu ê oia i to ˈu ra mau eˈa e ua hahae mai ia ˈu, e ua faaano mai oia ia ˈu; 12 ua haafefe oia i ta ˈna fana e ua faatia ia ˈu ei fa no te ohe.
13 Ua faatae roa oia i te mau ohe no to ˈna piha i roto i tau taha aoao; 14 e tâhitohitoraa vau no tau mau taata atoa, o to ratou ïa arearea e rui noa ˈtu te mahana; 15 ua faaî mai oia ia ˈu i te mea avaava, ua faataero oia ia ˈu i te mea horahora ra.
16 Ua ofati oia i tau niho i te iriiri, ua tuu haehaa oia ia ˈu i roto i te rehu auahi; 17 taa ê atura tau varua aita e hau, e te maitai ra, ua moe ïa ia ˈu; 18 ua parau ihora vau, Ua faaore mai Iehova i tau etaeta e tau tiaturiraa.
19 Te manaˈoraa i to ˈu nei pohe e to ˈu nei ati, e raau maramara ïa e te pape maramara ra; 20 eita tau varua e ore i te manaˈo i te reira, e te topa noa nei i roto ia ˈu; 21 teie râ ta tau aau e manaˈo nei, e teie nei, e tiaturiraa to ˈu nei.
22 No te aroha o Iehova i ore ai matou i hope ai i te pau, e eita hoi to ˈna hamani maitai e mure; 23 e aroha apî to ˈna i te mau poipoi atoa nei; te rahi ra to oe haavare ore; 24 o Iehova ta ˈu nei tufaa, te na reira maira tau varua, no reira vau i tiaturi atu ai ia ˈna.
25 Maitai to Iehova i te taata i tiai ia ˈna ra, i te varua i imi ia ˈna ra; 26 e mea maitai ia tiaturi atu â oia e ia tiai maite i te ora na Iehova; 27 e mea maitai hoi i te taata ia hopoi i te hopoia i to ˈna apîraa ra.
28 Te parahi noa ra oia ma te mamû, no te mea, ua tuuhia ïa i nia ia ˈna; 29 e tuu noa ˈtu oia i to ˈna vaha i raro i te repo, peneiaˈe e tiaturiraa tana; 30 e horoa noa ˈtu oia i to ˈna papariˈa i tei tairi mai, ua faaîî-noa-hia oia i te faaino.
31 E ore hoi Iehova e faarue roa ˈtu; 32 tuu noa mai â oia i te pohe, e aroha mai â oia, e ia au i te rahi atoa o to ˈna aroha; 33 e ore hoi oia e tuu mauruuru noa mai i te pohe, e te oto hoi i te tamarii a te taata nei.
34 I te taataahi i to ˈna avae i te mau taata tapeahia i te fenua nei, 35 i te ruri ê i te parau faaau a te taata nei i te aro o tei teitei ra, 36 i te faaore i ta te taata nei parau au, e ore roa Iehova e faatia i te reira.
37 O vai te taata i parau, e ua tupu ihora, tei parau mai Iehova e eiaha? 38 E ere anei tei te parau a te Teitei e tupu ai te ino e te maitai? 39 Eaha te mea i inoino ai te taata ora nei, te taata i te fariiraa i te utua o ta ˈna hara? 40 E imi tatou, e hiˈopoa maite i ta tatou haerea, a hoˈi ai tatou ia Iehova ra; 41 tatou e hopoi i to tatou aau ma to tatou rima atoa i te Atua i nia i te raˈi ra, a na ô atu ai, 42 Ua hara matou e aore i faaroo; e aore oe i faaore mai; 43 ua tapoˈi oe i to mata i te riri e ua auau mai ia matou; e ua taparahi oe ma te faaherehere ore; 44 ua tapoˈi oe ia oe iho i te ata, ia ore te pure ia pǔpû atu i roto ra. 45 Ua faariro oe ia matou mai te pera e te mea faaruehia i rotopu i te mau taata nei? 46 Ua parau te vaha o to matou mau enemi atoa ia matou nei; 47 ua roohia matou i te mǎtaˈu, e te marei, e te ano, e te pohe roa. 48 Te tahe pape noa nei tau mata i te pohe o te tamahine o to ˈu ra mau taata. 49 Te topatapata noa nei tau mata, aore i tuutuu, aore i faaea; 50 e ia hiˈo mai Iehova i raro ia haapao mai i nia i te raˈi ra; 51 no tau mata nei i mauiui ai tau aau i te mau tamahine atoa no to ˈu nei oire. 52 Te feia i enemi noa mai ia ˈu nei aore e hara ra, ua auau hua mai ia ˈu mai te manu ra; 53 ua opani ratou ia ˈu i roto i te apoo ia pohe, e ua hopoi i te tahi ofai i nia ia ˈu; 54 ua tahe noa te pape na nia i tau upoo; e ua na ô aˈera vau, Ua faarue roa vau: 55 ua tiaoro vau i to iˈoa, e Iehova, mai roto i te apoo ra i raro; 56 e ua ite hoi oe i tau reo i te na ôraa e, Eiaha oe e fariu ê i to tariˈa i to ˈu nei autâ e to ˈu tiaororaa. 57 Ua haafatata mai oe i te mahana a tiaoro atu ai au ia oe ra, e ua parau mai oe, Eiaha e mǎtaˈu. 58 Ua parau oe, e Iehova, i te parau a tau varua, e ua faaora oe ia ˈu ra; 59 ua hiˈo mai oe, e Iehova, i te hamani ino ia ˈu nei, e faatia mai oe i ta ˈu parau: 60 ua hiˈo mai oe i ta ratou tahoo ia ˈu nei, e ta ratou mau parau i imihia ia ˈu nei. 61 Ua faaroo oe i ta ratou faaino, e Iehova, e ta ratou mau ravea i imi ia ˈu nei, 62 Te parau a tau mau enemi e ta ratou mutamutaraa ia ˈu nei e muri noa ˈtu te mahana. 63 Ia parahi ratou i raro e ia tia hoi ratou i nia, inaha, o vau â to ratou arearea. 64 E riro oe i te tahoo mai ia ratou, e Iehova, ia au i tei ravehia e to ratou rima; 65 e riro oe i te faarue ia ratou ia iita to ratou aau, e tae mai te katara na oe i nia ia ratou. 66 E riro oe e te auau ia ratou ma te riri, e ia pau atu ratou ia oe, i raro aˈe i teie nei mau raˈi, e Iehova e.