Ieremia

TE ENEMI I TONOHIA MAI E RAVE IA IUDA I TE NOUNOU TAOˈA.

6 A hoˈi atoa, e te mau tamarii a Beniamina, mai roto atu i Ierusalema; ei Tekoa outou faaoto ai i te pu, e ei nia i Bete-hakerema faatia ˈi i te tapao auahi; te itea ra te ati i te haerea mai mai te pae i apatoerau ra, e pau rahi roa ra. 2 Tei nehenehe ra tei rave faahereherehia ra, te tamahine o Ziona, ta ˈu e opua nei ia pohe. 3 E riro i te haere mai te feia tiai e ta ratou mau nǎnǎ atoa ia ˈna ra: a patia ˈi i to ratou mau tiahapa ia ˈna e ati noa ˈˈe; a amu ai ratou atoa i to ratou ra vahi. 4 E faaineine outou i te tamaˈi ia ˈna; a tia, e haere tatou i nia i te mahana maoro nei, atae hoi tatou! ua poto hoi te mahana nei, e te ata ahiahi nei ua maoro ïa. 5 A tia, e haerea noa tatou i te po, tatou e vavahi i to ˈna ra mau fare arii. 6 Ua parau mai hoi Iehova sabaota ra, A tâpû na i te mau raau na ˈna; e ahu i te tahi vahi teitei ia Ierusalema: e au ïa oire ia na reirahia ˈtu oia; te mau hamani ino atoa hoi tei roto ia ˈna. 7 Mai te pape pihaa ra e pihaa noa mai â to ˈna pape, ua haamanii noa mai â oia i to ˈna ino; te rave uˈana e te haru tei itea i roto ia ˈna; te maˈi e te papai te vai tamau noa maira i mua ia ˈu. 8 E farii mai oe i te aˈo, e Ierusalema, o te faataa ê atu hoi au ia oe; o te faaano atu vau ia oe, ei fenua taata ore.

9 Te na ô maira Iehova sabaota ra, Mai ta ratou e pofai hua i te vine ra, e na reira ratou i te rave i te toea o Iseraela ra; faahoˈi mai i to rima mai te pofai vine i te mau ete ra. 10 O vai ta ˈu e parau, e ta ˈu e aˈo atu ia faaroo mai ratou? inaha to ratou tariˈa e peritome ore, e ore e faaroo mai; inaha hoi te parau a Iehova, e parau faaino ïa na ratou, aore roa te reira i autia ˈtu e ratou. 11 E teie nei, ua î roa vau i te riri o Iehova; ua fiu vau i te tapearaa, e ninii atu vau i nia i te mau tamarii i te mau aroâ nei, e i nia atoa i te amuiraa taata apî atoa ra: e riro hoi te tane e te vahine atoa; o tei paari, e tei hope roa to ˈna pue mahana. 12 E riro to ratou mau fare ia vetahi ê, e ma te reira atoa ta ratou mau aua e ta tatou mau vahine; e faatoro hoi au i tau rima i te mau taata no teie nei fenua, te na reira maira Iehova. 13 Mai te taata iti haihai ra e tae noa ˈtu i tei rahi, ua riro roa ratou atoa i te nounou taoˈa; e mai te peropheta e tae noa ˈtu i te tahuˈa, ua ati paatoa ïa i te haavare. 14 Ua taatiati a iri noa ratou i te paruparu o te tamahine a to ˈu ra mau taata, i te na ôraa e, Ei hau, ei hau; e aita roa ˈtu hoi e hau. 15 I haama anei ratou a rave ai ratou i te parau faufau ra? aita, aore roa ïa i haama; aita, aore ratou i ite i te haama: e teie nei, e hiˈa ratou te tahi e te tahi; ia haerehia ˈtu ratou e au ra, e hurihia ïa ratou i raro, te na reira maira Iehova.

16 Ua na ô mai hoi Iehova, Tia noa outou i te pae eˈatia, a hiˈo ai; a ui ai i te mau eˈa tahito ra, i te eˈa maitai ra, a haere ai outou na reira, e itea ia outou te faaearaa no to outou varua: ua na ô râ ratou, E ore matou e na reira. 17 E na ˈu e tuu i te tiai i nia ia outou, i te na ôraa e, E faaroo outou i te oto o te pu ra: ua na ô maira ratou, E ore matou e faaroo. 18 E teie nei, e faaroo mai, e te mau fenua, e haamanaˈo, e te amuiraa taata e, i to roto ia ratou nei. 19 E faaroo mai, e te fenua nei: inaha! e hopoi mai au i te ino i nia i teie nei mau taata, o te hopea ïa o to ratou manaˈoraa; no te mea aore ratou i faaroo i ta ˈu nei parau, e ta ˈu nei ture, ua faarue ratou i te reira. 20 Eaha te faufaa ia hopoi mai i te mea noˈanoˈa mai Seba mai ia ˈu nei, e te to momona no te fenua roa? aore ta outou mau tusia taauahi i tiahia, e ta outou mau tusia, e mea au ore ïa ia ˈu. 21 E teie nei, te na ô maira Iehova, Inaha! e tuu vau i te tiairaa i mua i teie nei feia, e turori hoi te mau metua e te mau tamarii i te reira; e e pohe atoa te taata-tupu e tana hoa atoa. 22 Te na ô maira Iehova, Inaha! e pǔpǔ taata te haere mai mai te pae i apatoerau ra, e fenua rahi tei tia mai no te hopea mai o te fenua ra; 23 ua haru ratou i te fana, e te mahae; e aroha ore to ratou, e ore roa e faaherehere; e haruru to ratou reo mai te haruru miti ra; e na nia anaˈe mai ratou i te puaahorofenua, ua faananai-anaˈe-hia, mai te feia i ineine ia aro ra: e aro mai ratou ia oe, e te tamahine a Ziona. 24 O te roo anaˈe ra ta tatou i faaroo, e ua paruparu hoi to tatou rima: ua roohia tatou e te ati; e mai to te vahine e fanau ra te mauiui. 25 Eiaha e tae i te aihere, eiaha e haere noa na te eˈatia; ua ati hoi tatou i te mǎtaˈu, e te ˈoˈe o te enemi. 26 E te tamahine a to ˈu ra mau taata, e ahu na i te ahu oto, a hurihuri noa ˈi ia oe i roto i te rehu auahi; a oto na oe mai te oto i te tamaiti here ra; ei auê rahi roa ra: e haere-hotuapo-noa-hia mai taua haru ra i nia ia tatou. 27 Ua tuu aˈenei au ia oe ei hiˈo, e mai te pare hoi oe i roto i to ˈu ra mau taata, ia ite oe e ia tamatahia e oe to ratou haerea. 28 E taiva rahi ino to ratou atoa, e feia faaino haere; e veo e te auri, ua ino anaˈe ratou: 29 ua ama te puhipuhi, ua hope te maa tapau i te auahi; eaha ta te tunu ra faufaa ia tunu; aore hoi te ota i faataa-ê-hia ra. 30 E ario faataa-ê-hia, to outou iˈoa ia ratou; ua faataa-ê-hia hoi ratou e Iehova.