Ieremia

TE ORURE HAU A ZEDEKIA, E IERUSALEMA I TE PAURAA.

52 Tei te matahiti taau ma hoê Zedekia i arii ai oia, hoê ahuru hoê tiahapa o ˈna matahiti i te ariiraa i Ierusalema: o Hamutala te iˈoa o tana metua vahine, e tamahine no Ieremia ra, no Libena. 2 Rave atura oia i te parau ino i te aro o Iehova, mai ta Iehoiakima i rave ra. 3 I na reirahia no te riri o Iehova ia Iuda e ia Ierusalema, e ia tuua-ê-roa-hia ratou e ana. Orure ihora hoi Zedekia i te hau o te arii o Babulonia.

4 E tae aˈera i te iva o te matahiti o te hau no ˈna, e te ahuru o te marama, e te ahuru hoi o te mahana i taua marama ra, i tere mai ai te arii o Babulonia, o Nebukanesa, oia e te nuu atoa, e rave ia Ierusalema, e ua patia ihora i te puhapa i reira, e ua patu ihora i te pare i reira e ati noa ˈˈe. 5 Arohia ihora taua oire ra e tae aˈera i te matahiti hoê ahuru ma hoê i te hau o Zedekia ra. 6 I te maha o te marama, e te iva o te mahana i taua marama ra, te rahi ra te oˈe i taua oire ra i reira, e aore roa e maa ta te taata o te fenua ra. 7 Parari ihora te oire; reva anaˈe atura te mau taata tamaˈi, faarue maira i taua oire ra i te po, i na te uputa i ropu i na patu ra, i te ô a te arii ra; tei mua mai te Kaladaio i taua oire ra e ati noa ˈˈe; haere anaˈe atura ratou na te vahi papu ra.

8 Ua auau maira râ te nuu o te Kaladaio i te arii, e noaa ihora Zedekia i te mau vahi papu i Ieriko ra; purara ê atura to ˈna mau taata ia ˈna. 9 Ua rave ihora ratou i te arii, e ua aratai maira i Ribela i te arii o Babulonia ra, i te fenua o Hamata; e ua tuu maira oia i te parau ia ˈna. 10 Ua tairi ihora te arii o Babulonia i na tamarii a Zedekia ra i mua mau i to ˈna mata; e ua tairi ihora hoi i te mau arii o Iuda i Ribela ra. 11 Ua ohiti aˈera oia i na mata o Zedekia ra, e ua tapea ihora ia ˈna i te tapea veo ra: e ua hopoi atura te arii o Babulonia ia ˈna i Babulonia, e ua tuu atura ia ˈna i roto i te tapearaa e tae noa ˈtura i te mahana i pohe ai ra.

12 E tae aˈera i te pae o te marama, e te ahuru o te mahana i taua marama ra, i te matahiti hoê ahuru ma iva i te hau o te arii o Babulonia ra, o Nebukanesa, te haere maira te raatira o te mau faehau ra, o Nebuzara-dana, o tei tia i mua i te aro o te arii o Babulonia, i Ierusalema, 13 na ˈna i tutui i te fare o Iehova, e te fare o te arii, e te mau fare atoa i Ierusalema, te mau fare rarahi ra, tei tuia e ana i te auahi: 14 e te nuu atoa o te Kaladaio i parahi i ǒ te raatira o te feia faehau, o tei vavahi ïa i te patu atoa i Ierusalema e ati noa ˈˈe. 15 E te tahi pae i te mau taata rii ra, e te tahi pae taata i faatoehia i roto i te oire, e te feia taiva tei reva i ǒ te arii o Babulonia, te toea o taua feia rahi ra, o tei hopoi-tîtî-hia ïa e te raatira o te feia faehau e Nebuzara-dana ra. 16 O te tahi pae taata rii ra no taua fenua ra, o tei vaiihohia ïa e te raatira o te feia faehau ra e Nebuzara-dana, ei tope vine, e ei faaapu. 17 E te mau pou veo i roto i te fare o Iehova, e te mau vairaa, e te farii-vai rahi veo i roto i te fare o Iehova, o tei vavahihia ïa e te Kaladaio, e ua hopoi i te veo i Babulonia. 18 E te mau pani, e te mau taipu, e te mau paoti, e te mau auˈa, e te mau punu, e te mau farii veo atoa ra, e tei ravea e ratou i te raveraa ra, o tei hopoi-ê-hia ïa. 19 E te mau auˈa, e te mau farii auahi, e te mau auˈa poopoo, e te mau pani, e te mau vairaa-mori, e te mau punu, e te mau auˈa, te mau mea auro ra, o taua auro ra, o te mau mea ario, o taua ario ra, o ta te raatira o te feia faehau i hopoi ê. 20 Na pou e piti ra, e te farii-vai rahi hoê, e na puaatoro veo hoê ahuru e ma piti i raro aˈe i te vairaa, i hamanihia e te arii e Solomona no te fare o Iehova, te veo no taua mau mea nei aita ïa e faito. 21 Na pou hoi, hoê ahuru ma vau i te kubiti i te teitei te tahi pou, e te taura e ati ai taua pou ra, hoê ahuru ïa e ma piti i te kubiti; e maha rimarima taua hei ra i te meumeu, te poopoo ra hoi i roto. 22 E te tapoˈi i nia ihora, e veo ïa; te teitei o taua tapoˈi ra, e pae ïa kubiti; e taheihia taua tapoˈi ra e taremunahia i nia iho i taua tapoˈi ra e ati noa ˈˈe, e veo anaˈe; e mai te reira atoa te tahi pou, e remuna atoa ïa. 23 E iva ahuru e ono tiahapa taua na remuna ra, i fariu tia i na mataˈi atoa ra; hoê hanere remuna i nia i taua hei ra e ati noa ˈˈe.

24 Ua rave ihora te raatira o te feia faehau ra i te tahuˈa rahi ra ia Seraia, e te tahuˈa tauturu ra ia Zephania, e na tiai uputa ra tootoru; 25 e ua rave ihora hoi i te hoê eunuka no roto i te oire ra, o te faaitoito ïa i te feia tamaˈi ra, e toohitu hoi pue taata no pihai iho i te arii ra, no roto â i te oire, e te papai parau rahi no te nuu ra, o tei haaputu mai i te taata atoa e ono ahuru no taua fenua ra, i itea i ropu i taua oire ra; 26 o ta te raatira o te feia faehau, ta Nebuzara-dana i rave, e ua aratai atura i te arii o Babulonia i Ribela. 27 Tairihia ihora ratou e te arii o Babulonia, e pohe roa aˈera i Ribela, i te fenua o Hamata; hopoi-ê-hia ˈtura Iuda ei tîtî e mairi maira to ˈna iho fenua.

28 Teie na taata i hopoi-tîtî-hia e Nebukanesa, i te matahiti hitu ra, e toru tausani, e toru taau e toru tiahapa, ati Iuda: 29 e tae aˈera i te matahiti hoê ahuru e vau tiahapa o Nebukanesa ra, ua hopoi tîtî oia mai Ierusalema ˈtu i na taata e vau hanere, e toru ahuru, e piti tiahapa: 30 e tae aˈera i te matahiti taau ma toru o Nebukanesa, i hopoi-tîtî-hia ˈi e te raatira o te feia faehau ra e Nebuzara-dana, na taata e hitu hanere e maha ahuru, e ma pae, e ati Iuda. E taua mau taata atoa ra ia taio, e maha ïa tausani e ono hoi hanere.

31 E tae aˈera i te toru ahuru ma hitu o te tîtîraa o te arii o Iuda o Iehoiakina, i te ahuru ma piti o te marama, e te mahana taau ma pae ra, ua tuu maira te arii o Babulonia ra, o Evile-merodaka, i te matahiti i arii ai oia ra, i te arii o Iuda ia Iehoiakina, i rapae au i taua tapearaa ra; 32 e ua paraparau maitai atura oia ia ˈna, e ua faateitei oia i to ˈna terono ia teitei aˈe i to te mau arii atoa i Babulonia ra. 33 E ua haapae atura i tana ahu i te tapearaa ra; e ua amu oia i te maa i mua i tana aro e hope roa aˈera o ˈna pue mahana i te oraraa nei. 34 E haapao-tamau-hia hoi ta ˈna tufaa, na te arii o Babulonia i horoa; o te mahana o te tufaa, e tae noa ˈtu i te mahana e pohe ai oia, e hope roa aˈera o ˈna pue mahana i te oraraa nei.