Ieremia

IOHANANA I TE FAAROO-ORE-RAA I TE PARAU A IEREMIA RA.

43 E hope aˈera ta Ieremia parauraa i te taata atoa ra, i te mau parau atoa a to ratou Atua, a Iehova, i tonohia mai ai oia e to ratou Atua ra, e Iehova, i teie atoa nei mau parau; 2 ua parau maira Asaria a Hosaia, e o Iohanana a Karea, e te feia teoteo atoa ra, i te parauraa ia Ieremia ra, E haavare ta oe ra; aore to matou Atua ra, o Iehova, i tono mai ia oe ia parau mai e, Eiaha outou e tae i Aiphiti, a parahi ai i reira: 3 o Baruka râ a Neria ra, te patiatia ïa ia oe ia matou nei, ia riro matou i te rima o te Kaladaio, ia taparahihia matou, e ia hopoi-tîtî-hia matou i Babulonia. 4 Aore aˈera Iohanana a Karea ra, e te mau raatira atoa o te nuu ra, e te taata atoa ra, i faaroo i te reo o Iehova, ia parahi noa i te fenua ra o Iuda. 5 Ua rave aˈera râ Iohanana a Karea ra, e te mau raatira atoa o te nuu ra, i te toea o Iuda, o tei hoˈi mai mai te mau fenua atoa i tiahihia ˈtu ai ratou ra, ia parahi i te fenua ra i Iuda; 6 i te mau tane, e te mau vahine, e te mau tamarii, e te mau tamahine a te arii ra, e te mau taata atoa i vaiihohia e te raatira o te mau faehau ra e Nebuzara-dana, ia Gedalia, a Ahikama, a Saphana, e te peropheta ra o Ieremia, e ia Baruka a Neria ra; 7 o tei haere anaˈe ïa i te fenua ra i Aiphiti; aore hoi ratou i faaroo i te reo o Iehova: e tae atura ratou i Tapanehesa.

8 Ua tae maira te parau a Iehova ia Ieremia i Tapanehesa, na ô maira, 9 A rave oe i na ofai rahi i to rima na, a huna ˈi i roto i te araea ra, i te tahuraa araea i te tomoraa i te utuafare o Pharao, i Tapanehesa, i te aro o te tahi pae taata o Iuda ra; 10 a parau atu ai oe ia ratou, Te na ô maira Iehova sabaota ra, te Atua o Iseraela; Inaha, e tono vau i te vea e aratai mai i tau tavini i te arii o Babulonia ra ia Nebukanesa, e haamau vau i to ˈna terono i nia i eie nei pue ofai i hunahia e au nei, e na ˈna e hohora i te vauvau na nia ihora. 11 E haere mai hoi oia e tairi i te fenua nei i Aiphiti, i to te pohe ra, ia pohe ïa, e to te tîtî ra, ia tîtî ïa, e to te ˈoˈe ra, ia tairihia i te ˈoˈe. 12 E tutui hoi au i te auahi i roto i te fare o te mau atua o Aiphiti; e na ˈna ratou e tutui i te auahi, e e hopoi-tîtî-hia e ana; e ahu hoi oia i taua fenua ra ia Aiphiti, mai te tiai mamoe e ahu i to ˈna ra ahu; a haere atu ai oia mai reira ˈtu ma te hau. 13 E na ˈna e vavahi i te mau tii i roto i te fare mahana ra, i te fenua ra i Aiphiti; e te mau atua i Aiphiti ra, na ˈna ïa e tutui i te auahi.