Ieremia

TE PARAU NEI TE ATUA I TE TAATA IA TATARAHAPA IA ORA.

4 Ia tia ia oe i te hoˈi mai, e Iseraela, e hoˈi mai ia ˈu nei, te na reira maira Iehova; e ia tia ia oe i te faarue i ta oe ra mau mea faufau i mua ia ˈu nei, e ore oe e hopoi-ê-hia: 2 e tǎpǔ ra oe i te oraraa o Iehova ra, ma te parau mau, ma te au, e ma te parau-tia; e haamaitai mai hoi te mau fenua ia ratou iho ia ˈna, e e hanahana hoi ratou ia ˈna.

3 Te na ô maira hoi Iehova i te mau taata no Iuda e to Ierusalema; A utaru na i to outou fenua vaiiho noa ra, eiaha e ueue i roto i te aihere. 4 Ia peritomehia outou no Iehova, e hopoi ê atu i te iri mua o to outou aau na, e te mau taata o Iuda, e to Ierusalema; o te puroro noa ˈtu tau riri mai te auahi, ua ama anaˈe hoi e ore e pohe ia tinai, no te ino o ta outou parau i rave.

5 E faaite outou i Iuda, e parau haere i Ierusalema; e na ô atu, A faaoto no outou i te pu i te fenua nei; e faaite haere e eiaha ei vahi toe, e na ô atu, A ope mai e haere tatou i roto i te mau oire faaetaetahia ra. 6 E faatia na i te tapao i te pae i Ziona; e haere paatoa, eiaha e tiatia haere; ua fatata vau i te hopoi mai i te ino no te pae i apatoerau mai, e te pohe rahi ino ra. 7 Ua reva mai te liona mai roto mai i to ˈna aihere; tei te eˈa maira te taparahi i te mau fenua; ua faarue oia i to ˈna vahi ia pau to fenua; e ino roa to mau oire, e ore roa e taatahia. 8 A ahu na i te ahu oto i te reira, a oto, a aue, no te mea, aore â te riri uˈana o Iehova i faafariu-ê-hia ia tatou nei. 9 Te na ô maira hoi Iehova, ia tae i taua mahana ra e tarapape ai te aau o te arii, e to te pǔpǔ arii atoa ra, e maere hoi te mau tahuˈa, e hitimaue hoi te mau peropheta.

10 Ua na ô atura vau, Auê! e te Fatu e, e Iehova! ua vare roa teie nei mau taata e Ierusalema atoa ia oe i te parauraa mai e, Ei hau â to outou, e ua taeâ-roa-hia te aau nei i te puta i te ˈoˈe. 11 Ia tae i te reira tau e parauhia ˈi i teie nei feia e Ierusalema; E mataˈi veavea tei te medebara no nia mai i te mau aivi, te farara tia maira i te tamahine o to ˈu ra mau taata; e ere râ i te mataˈi haapuehu ota, e te tamâ; 12 e tae mai te hoê mataˈi rahi ia ˈu nei no reira mai; oia ïa, ei teie nei au e parau ai i ta ˈu faahaparaa ia ratou. 13 Inaha, mai te ata ra oia ia haere mai, e mai te puahiohio to ˈna ra pereoo; e oioi rahi to te mau puaahorofenua na ˈna, i to te aeto. Atae hoi tatou! ua pau tatou. 14 A tamâ na i to aau i te ino, e Ierusalema, ia ora hoi oe. Mai te aha ra te maoro o te manaˈo ino i te vai-noa-raa i roto ia oe ra? 15 E reo hoi tei tiaoro mai mai Dana mai ra, e te faaite hua maira i te pohe mai te mouˈa maira mai Epheraima. 16 E faaite outou i te mau fenua, inaha! e faaite hua outou ia Ierusalema, e te haere maira te hiˈo mai te fenua roa mai, o te pii hua ïa i te mau oire o Iuda nei. 17 Mai te tiai aua ra ratou i te haaatiraa ia ˈna, no te mea ua faarue oia ia ˈu, te na reira maira Iehova. 18 No to oe haerea, e ta oe i rave ra i tae mai ai teie nei mau ino i nia ia oe ra; o te huru ïa o ta oe hara; e mea ino rahi; e tae roa ïa te pohe e i roto i to aau na.

19 Auê tau aau e! e tau aau! ua mauiui au, e ua tae roa i roto i tau aau ra: ua horuhoru tau aau i roto ia ˈu nei, e ore au e tia ia mamû noa, no te mea, ua ite oe, e tau varua e i te pu i te otoraa; e te pii tamaˈi. 20 O te pohe hoi e ua na nia iho te pohe tei piihia; o te fenua atoa hoi tei pau e ati noa ˈˈe: aore aˈera e mahia pau roa aˈera tau mau tiahapa: e tau mau paruru ra, mai te amoraa mata ïa. 21 Mai te aha ra te maoro tera ra tapao i te hiˈoraahia ˈtu e au? e te faarooraa i te pu i te otoraa mai?

22 Ua maamaahia to ˈu ra mau taata; aita ratou i ite ia ˈu; e tamarii ite ore ratou, aore e haroaroa ia ratou: te paari ra ratou ia rave i te ino, area te rave i te maitai, aore ïa ratou i ite.

23 Hiˈo ihora vau i te fenua, e inaha! te vai uruuru noa ra e te ano! e te raˈi atoa, e aore e maramarama. 24 Hiˈo atura vau i te mau mouˈa, e inaha! te aueue ra; e te patî noa ra te mau aivi mai te mea mâmâ ra. 25 Hiˈo ihora vau, e inaha! aore e taata; e ua maue ê anaˈe te mau manu o te raˈi ra. 26 Hiˈo ihora vau, e inaha! te fenua ruperupe i mutaa ihora, ua riro ei medebara; e ua pau to ˈna mau oire i te parari, i mua i te aro o Iehova, i mua hoi i te veavea uˈana o to ˈna riri.

27 Te na ô maira hoi Iehova, E riro te fenua atoa i te ano; e ore râ vau e rave faahope roa. 28 O te mea teie e oto ai te fenua, e ereere ai hoi te raˈi i nia ra; ua parau hoi au, e ore e tatarahapa; ua opua vau, e ore hoi e hoˈi. 29 E fati to te mau oire atoa ra, i te haruru o te feia puaahorofenua e te mau teˈa ra; e tomo ratou i roto i te uru raau pouri e te meumeu; e paiuma hoi ratou i nia i te mau ana o te mouˈa ra; e hope te mau oire atoa ra i te faaruehia, e aore roa e taata e parahi i roto. 30 Ia pau oe ra, eaha oe i reira? ahu noâ oe i te ahu uteute, faaunauna noâ oe i te unauna auro, e parai hua noâ hoi oe i to mata i te pêni; e faaneheneheraa faufaa ore to oe; e vahavahahia mai oe e te feia i hinaaro mai ia oe ra, e titau mai hoi ia oe ia pohe. 31 I faaroo na vau i te auê mai to te vahine ia mauiui ra; e te oto mai to tei fanau i te matahiapo ra; te oto o te tamahine o Ziona; te autâ ra, te hohora ra i te rima, te na ô ra, Auê hoi au nei e! ua taiâ roa tau varua i te mau taparahi taata nei.