Ieremia

O IEREMIA I TE TAPEARAAHIA E TE ARII RA E ZEDEKIA.

32 Te parau i tae mai ia Ieremia no ǒ ia Iehova ra, i te matahiti hoê ahuru o te arii ra o Zedekia, e arii no Iuda: i te ahuru ra e ma vau o te matahiti o Nebukanesa ra.

2 Te haaati hua ra te nuu o te arii o Babulonia ia Ierusalema i reira, te tapeahia ra te peropheta ra o Ieremia i roto i te aumoa o te tapearaa ra, no te utuafare ra o te arii o Iuda. 3 Ua tapeahia hoi oia e te arii o Iuda, e Zedekia, na ô atura, Eaha hoi oe i tohu ai, e i na ô mai ai e, Te na ô maira Iehova, Inaha, teie au a tuu atu i teie nei oire i roto i te rima o te arii o Babulonia, e pau hoi teie nei oire ia ˈna? 4 E ore hoi te arii o Iuda ra o Zedekia e ora i te rima o te Kaladaio, e tuu-mau-hia râ oia i te rima o te arii o Babulonia, e parau atu oia ia ˈna to ˈna vaha i to ˈna vaha, e na to ˈna mata e hiˈo atu i to ˈna ˈtu mata. 5 E na ˈna e hopoi ia Zedekia i Babulonia, e ei reira oia vai ai e ia tiihia ˈtu e au ra, te parau maira Iehova. Tamaˈi noâ outou i te Kaladaio, e ore â to outou hinaaro e tupu.

6 Ua na ô maira Ieremia, I tae maira te parau a Iehova ia ˈu nei, na ô maira, 7 Inaha, Hanameela a Saluma, te taeae o to metua na, te haere maira ia oe ra, e riro hoi i te parau mai e, E hoo oe i te aua na ˈu i Anatota, i te ture hoi i te hoo-faahou-raa ra, e au ïa oe ia hoo ra. 8 Ua haere maira Hanameela, e tamaiti na te taeae o to ˈu ra metua, ia ˈu nei, ta Iehova hoi i parau maira, i te aumoa o te fare tapearaa ra, e ua na ô maira ia ˈu, E hoo oe i te aua na ˈu i Anatota, i te fenua o Beniamina; taua tufaa ra hoi, e te hoo atoa tei au ïa ia oe ia hoo: e hoo oe na oe iho. Ite aˈera vau e, na Iehova ïa parau. 9 Hoo atura vau i taua fenua ra i Anatota ia Hanameela, i te tamaiti a te taeae a tau metua ra, e ua tuu atura vau i te moni, hoê ahuru ma hitu i te sekela ario. 10 Papaihia ihora te parau na ˈu e ua piahia ihora, e faataa ihora vau i te ite ei ite, e ua faito ihora vau i te moni i roto i te faito. 11 Ua rave ihora vau i te parau hoo ra, i tei piahia ra ma te au i te ture ra e te haapaoraa, e tei ore i piahia. 12 Ua tuu atura vau i taua parau hoo ra ia Baruka, a Neria, a Maaseia, i te aro o Hanameela, i te tamaiti a te taeae o tau metua ra, e i mua atoa hoi i te aro o te feia i ite ra, tei papaihia i roto i te parau hoo ra, e i mua atoa hoi i te aro o te mau ati Iuda atoa ra, tei parahi i roto e te aumoa o te tapearaa ra. 13 E ua aˈo atura vau ia Baruka i mua i to ratou aro, na ô atura, 14 Te na ô maira Iehova sabaota ra, te Atua o Iseraela, A rave na i na parau i papaihia nei, i teie nei parau hoo, tei piahia e tei ore i piahia, a tuu ai i roto i te hoê farii repo, ia vaiiho taiata e ia rahi noa ˈtu te mahana. 15 Te na ô maira hoi Iehova sabaota ra, te Atua o Iseraela, E noaa faahou mai â te fare, e te aua, e te ô vine, i teie nei â fenua.

16 Pure atura vau ia Iehova, i muri aˈe i te parau hoo i te tuuraahia e au ia Baruka a Neria ra, e ua na ô atura, 17 E te Fatu e, e Iehova! inaha, na oe te raˈi nei i hamani, e te fenua, i te mana rahi no oe ra, e to rima i faatorohia ra; aita roa e mea e ore i te oti ia oe; 18 o tei aroha noa i te taata e tausani noa ˈtu, e o tei tahoo i te hara a te metua ra i nia i te tamarii tei ˈna muri mai i te fanau ra; o Tei Rahi, o te Atua Puai, o Iehova sabaota ra, to ˈna iˈoa: 19 o tei rahi ia parau ra, e te ravea rau ra, o tei araara noa te mata i nia i te mau haerea atoa o te taata nei, ia faaau oia i te utua na te taata atoa ia au maite i tana haerea, ia au i te hopea o ta ˈna ra parau: 20 o tei faaite i te tapao e te ravea taa ê i te fenua ra i Aiphiti, e tae roa aˈenei i teie nei mahana, e ia Iseraela atoa nei, e te taata atoa ra; e ua noaa ia oe te iˈoa mai tei teie nei mahana: 21 e ua aratai mai oe i to mau taata ia Iseraela mai te fenua maira mai Aiphiti, ma te tapao, e te ravea taa ê, e ma te rima puai, e te rima faatorohia ra, e ma te riaria rahi; 22 e ua horoa i teie nei fenua no ratou, ta oe i tǎpǔ atu i to ratou mau metua e e horoa na ratou, e fenua tahe pape noa te û e te meli. 23 E ua tomo ratou i taua fenua nei, e ua parahihia e ratou; aita râ ratou i faaroo i to reo, aore hoi i haapao i ta oe ture; e te mau mea atoa ta oe i faaue ia ratou e rave, aore ïa ratou i rave; i tuu mai ai oe i teie nei mau ino ia iri i nia ia ratou. 24 Inaha, ua tae ta ratou ravea i te oire e rave, e ua tuuhia te oire i te rima o te Kaladaio e aro maira, no te ˈoˈe, e no te poia, e no te maˈi; e ta oe hoi i parau ra ua tupu ïa, e inaha, te ite ra hoi oe. 25 Ua parau maira oe ia ˈu e, e te Fatu, e Iehova; E hoo oe i te aua i te moni, e faataa hoi i te ite ei ite; e inaha, ua horoahia te oire i te rima o te Kaladaio.

26 I reira te parau a Iehova i te taeraa mai ia Ieremia ra, na ô maira, 27 Inaha, o vau o Iehova, te Atua no te taata atoa nei; te vai atura anei te mea e ore e tia ia ˈu ia rave ra? 28 E teie nei, te na ô maira Iehova, Inaha, e horoa vau i teie nei oire i te rima o te Kaladaio, e te rima o te arii o Babulonia, o Nebukanesa ra, e pau teie nei oire ia ˈna. 29 E na te Kaladaio e aro mai i teie nei oire e tomo, e tutui hoi i teie nei oire i te auahi, e ia ama ˈtu, e te mau fare atoa, tei tutuihia e ratou te mea noˈanoˈa na Baala i nia ihora e ua ninii hoi i te tusia inu na te mau atua ěê, ia ooo atu vau ra. 30 Rave noa na hoi te tamarii a Iseraela, e te tamarii a Iuda, te mea ino anaˈe ra i mua ia ˈu nei, mai to ratou apîraa mai â; o te faaooo anaˈe ra ta te tamarii a Iseraela i rave i to ratou rima ia ˈu nei, te parau maira Iehova. 31 Tau riri e te ooo anaˈe ra ta teie nei oire i faatupu iho nei, mai te mahana mai â i faatia ˈi ratou i taua oire nei, e tae noa aˈenei i teie nei mahana, ia faataa-ê-hia i tau mata nei, 32 I te mau parau iino atoa hoi a te tamarii a Iseraela, e te tamarii a Iuda, ta ratou i rave ei faaooo mai ia ˈu, ratou e to ratou mau arii, e te pǔpǔ arii atoa ra, e te feia tahuˈa, e te mau peropheta ra, e te taata atoa o Iuda, e to Ierusalema. 33 Ua fariu mai hoi ratou i to ratou tua ia ˈu nei, aore te aro; e ia ˈu hoi i haapii ia ratou ma te tia vave i te poipoi e te haapiiraa ˈtu, aore roa te hoê i faaroo mai a farii mai ai i te aˈo ra. 34 E ua faatia mai ratou i te mea faufau i roto i te fare i mairihia i to ˈu nei iˈoa, ia viivii atu. 35 E ua faatia ratou i te mau vahi teitei i ǒ Baala, i te peho o te tamaiti a Hinoma, ei faataeraa ˈtu i ta ratou mau tamaroa e ta ratou mau tamahine ia Moloha, tei faaore-roa-hia e au, no te mea tia ore ia ˈu nei; rave ihora ratou i te reira parau faufau ia harahia Iuda.

36 I teie nei râ, te na ô maira te Atua o Iseraela, o Iehova, i teie nei oire, ta outou e parau na e, Ua tuuhia ˈtu i te rima o te arii o Babulonia, i te ˈoˈe, e te poia, e te maˈi; 37 Inaha, e haaputu mai au ia ratou mai te mau fenua atoa mai i tiahihia ˈtu ai ratou e au i taua riri no ˈu ra, i te ooo rahi no ˈu ra, e taua tairoiro no ˈu ra; e aratai faahou mai au ia ratou i teie nei vahi, e haaparahi au ia ratou i ǒ nei ma te ora. 38 Ei taata hoi ratou no ˈu, e ei Atua vau no ratou. 39 E horoa ˈtu vau i te aau hoê, e te parau hoê na ratou, ia mǎtaˈu tamau mai ratou ia ˈu, ia maitai ratou, e ta ratou mau tamarii a muri aˈe. 40 E fafau vau i te faufaa mure ore ia ratou, e ore hoi au e ruri ê i to ratou ra huaai, ia hamani maitai râ vau ia ratou; e tuu hoi au i te mǎtaˈu ia ˈu i roto i to ratou aau, e ore hoi ratou e faarue mai ia ˈu ra. 41 E oaoa vau i nia ia ratou i te hamani-maitai-raa ˈtu ia ratou, e tanu mau vau ia ratou i ǒ nei, ma tau aau atoa, e ma tau varua atoa. 42 Te na ô maira hoi Iehova, Mai ia ˈu i hopoi mai i teie nei ino rahi i nia i teie nei mau taata, e hopoi atoa mai hoi au i te mau maitai atoa ta ˈu i parau ia ratou ra. 43 E hoohia te mau aua i teie nei fenua, ta outou e parau na e, Ua ano, aita e taata, aita hoi e puaa; ua tuuhia ˈtu i te rima o te Kaladaio. 44 E aua anaˈe ta te taata nei e hoo i te moni, e te parau atoa i te papairaahia, e te piaraa, e te faataaraa i te ite ei ite, i te fenua o Beniamina, e i pihai atoa iho Ierusalema, e te mau oire o Iuda, e te mau oire i te fenua aivi, e te mau oire atoa i te vahi papu, e te mau oire i te pae i apatoa; e ruri ê hoi au i to ratou tîtîraa, te na reira maira Iehova.