Ieremia
TE FAUFAA A TE ATUA, E TE HAAPAO-ORE-RAAHIA E RATOU RA.
11 Te parau i tae mai ia Ieremia mai ô mai ia Iehova ra, na ô maira,
2 E faaroo mai outou i te parau i teie nei faufaa, e parau atu oe i taua parau nei i te mau taata no Iuda, e te mau taata no Ierusalema; 3 e parau atu oe ia ratou, Te na ô maira te Atua o Iseraela o Iehova, Ia katarahia te taata e ore e faaroo i te parau o teie nei faufaa, 4 Ta ˈu i faaue i to outou mau metua i te mahana i aratai mai ai au ia ratou mai te fenua maira mai Aiphiti, mai roto mai i te umu auri ra, a na ô atu ai, E faaroo mai outou i tau reo, e rave hoi i ta ˈu e parau atu ia outou ra: e riro ïa outou ei taata no ˈu i reira, e riro hoi au ei Atua no outou. 5 Ia faatupu hoi au i te tǎpǔ ta ˈu i tǎpǔ atu i to outou mau metua ra, e e horoa vau i te fenua tahe pape noa te û e te meli, mai tei teie nei mahana. Ua parau atura vau, na ô atura, Oia ïa, e Iehova e. 6 Ua parau maira Iehova ia ˈu, E faaite haere i teie nei mau parau i te mau oire o Iuda, e te mau aroâ o Ierusalema, e na ô atu, E faaroo mai outou i te parau o teie nei faufaa, a rave ai. 7 Ua aˈo hua ˈtu hoi au i to outou hui metua i te mahana i aratai mai ai au ia ratou mai te fenua maira mai Aiphiti, e tae roa aˈenei hoi i teie nei mahana, i te tia-vave-raa te poipoi roa i te aˈoraa ˈtu, i te na ôraa e, E faaroo mai outou i ta ˈu parau. 8 Aita râ ratou i faaroo, aore hoi i fariu mai i te tariˈa, haapao noa ˈtura te taata atoa i te mârô o to ˈna ihora aau ino: i hopoi mai ai au i te mau parau i roto i teie nei faufaa i nia ia ratou, ta ˈu i parau atu ia ratou ra e rave; aita râ ratou i rave.
9 Ua parau atoa maira Iehova ia ˈu, E amuiraa tei itea i roto i te mau taata o Iuda, e i roto atoa i to Ierusalema. 10 Ua fariu faahou ratou i te mau hara a to ratou mau metua, o tei ore i faaroo mai i ta ˈu parau; ua pee hoi ratou i te mau atua ěê, i te haamoriraa ia ratou: te utuafare o Iseraela, e te utuafare o Iuda, ua ore atoa ïa ua haapao i te faufaa na ˈu nei i ta ˈu i faaau i to ratou ra mau metua. 11 E teie nei, te na ô maira Iehova, Inaha, teie au a hopoi mai i te ino i nia ia ratou, e ore hoi ratou e ora ia ape; e tiaoro noa mai hoi ratou ia ˈu e ore au e faaroo atu. 12 E haere hoi te mau oire o Iuda, e te taata no Ierusalema, e tiaoro i te mau atua ta ratou i tutui i te mea noˈanoˈa ra; e ore roa râ ratou e ora i te reira, ia roohia mai ratou e te ati ra. 13 Ua faito atoa to mau atua, e Iuda, i to oe ra mau oire ia taio ra; e ua faito atoa to mau aroâ i Ierusalema i te mau fata ta outou i faatia i taua mea haama ra; e fata tutuiraa mea noˈanoˈa no Baala. 14 E teie nei, eiaha oe e pure i teie nei feia, eiaha e faaite i to ratou hinaaro, eiaha e ani i ta ratou; e ore hoi au e faaroo ia tiaoro mai ratou ia ˈu ra, ia roohia ratou e te ati ra. 15 Eaha ta tau here nei faufaa i roto i tau fare nei, e te rave ra oia i te parau ino ma te feia rahi atoa ra, e ua faaruehia te tusia moˈa e oe ra? te oaoa ra oe ia rave i te parau ino ra. 16 E olive ruperupe, e te nehenehe, e te hotu i te maa maitai ra, o to oe ïa iˈoa ia Iehova; ua tutui râ oia i te reira i te auahi ma te atuatu rahi, e ua pau te mau amaa i te auahi. 17 Na Iehova sabaota, tei tanu ia oe ra, i faaite mai i te ino no oe ra, no te ino o te utuafare o Iseraela, e te ino o te utuafare o Iuda, i ta ratou i rave ia ratou iho, i te faaoooraa mai ia ˈu, i te tutuiraa i te mea noˈanoˈa no Baala.
18 Ua faaite maira Iehova ia ˈu, e ite aˈera vau; ua faaite mai oe ia ˈu i ta ratou ravea. 19 Mai te pinia mamoe rata ra vau ia arataihia e taparahi; aore hoi i ite e, ua opua ratou e rave ia ˈu, i te na ôraa e, E tâpû tatou i te raau ma te maa atoa i nia iho; e faataa ê atu tatou ia ˈna i te fenua o te taata ora nei, ia ore ia manaˈo-faahou-hia ˈtu to ˈna iˈoa. 20 O oe râ, e Iehova sabaota ra, to oe te manaˈo tia ra, o tei hiˈopoa hua i te manaˈo e te aau ra, e faaite mai oe ia ˈu i to riri ia ratou; ua faaite-hua-hia e au tau parau ia oe ra. 21 E teie nei, te na ô maira Iehova i te mau taata no Anatota tei titau mai ia oe ia pohe, i te na ôraa mai e, Eiaha oe e tohu i te iˈoa o Iehova, o te pohe hoi oe i to matou nei rima: 22 Te na ô maira hoi Iehova sabaota, Inaha, e rave atu vau ia ratou; e pohe te mau taata apî i te ˈoˈe; e ta ratou mau tamaroa e ta ratou mau tamahine, e pohe ïa i te poia; 23 e ore hoi te hoê paeau o ratou e toe i te vaiihohia; e hopoi mai hoi au i te ino i nia i te mau taata o Anatota, to ratou ïa matahiti i ravehia ˈi ratou ra.