Ieremia

Ieremia

TE TAIME E TE PARAURAA IA IEREMIA RA.

1 Te parau a Ieremia a Hilikia ra, te hoê o te pǔpǔ tahuˈa i parahi i Anatota, i te fenua o Beniamina ra; 2 tei parauhia mai te parau a Iehova i te anotau o Iosia a Amona, e arii no Iuda, i te matahiti hoê ahuru ma toru i te hau no ˈna ra; 3 e i te tau hoi o Iehoiakima a Iosia ra, i te arii o Iuda, e hope roa aˈera te matahiti hoê ahuru ma hoê i te hau o Zedekia a Iosia, e arii no Iuda, e tae roa aˈera i te hopoiraa ia Ierusalema ei tîtî i te marama pae ra.

4 I reira te parau a Iehova i te taeraa mai ia ˈu nei, e te na ôraa e, 5 Aita oe i hamanihia e au i roto i te opu, i ite ai au ia oe; e aita oe i fanau, i faataahia ˈi oe e au; e ua haapaohia oe e au, ei peropheta na te mau fenua. 6 Ua parau atura vau, Auê! e tau Fatu, e Iehova e! aore hoi au i ite i te parau; e tamaiti iti hoi au. 7 Ua parau maira Iehova ia ˈu, Eiaha e parau, e tamaiti iti au: o tei tonohia oe e au ra, o ta oe ïa e haere; e o ta ˈu e faaue ia oe ra, o ta oe ïa e parau. 8 Eiaha oe e mǎtaˈu i to ratou mata; ei pihai atoa iho hoi au ia oe ei faaora ia oe, te parau maira Iehova. 9 Ua faatoro maira Iehova i tana rima, ua faatiaia maira i tau vaha; e ua na ô maira Iehova ia ˈu, Inaha, ua tuu vau i tau parau i roto i to vaha. 10 Inaha, ua haamana ˈtu vau ia oe i teie nei mahana i nia i te mau fenua, e te mau basileia atoa ra, ia taihitumu, e ia huri i raro, ia haapau, e ia haamou roa ˈtu; ia patu tia i nia, e ia tanu.

11 Ua tae maira te parau a Iehova ia ˈu nei, na ô maira: Eaha ta oe e hiˈo na, e Ieremia? ua parau atura vau, E papua iti sekadi ta ˈu e hiˈo nei. 12 Ua parau maira Iehova ia ˈu, Ua tia ta oe i hiˈo ra: e faatupu etaeta hoi au i ta ˈu nei parau.

13 Ua tae faahou maira te parau a Iehova ia ˈu nei, na ô maira, Eaha ta oe e hiˈo ra, e Ieremia? ua parau atura vau, Te ite nei au i te hoê pani e te au i te pǔpûraa ˈtu; e ua faafariu-ê-hia te auvaha ia na te pae i apatoerau i te pǔpû. 14 Ua parau maira Iehova ia ˈu, E riro na apatoerau atu te ino i te pǔpûraa ˈtu i na nia i te taata atoa o te fenua na. 15 Inaha hoi, e tiaoro atu vau i te mau fetii atoa no te mau basileia atoa i te pae i apatoerau, te parau maira Iehova: e haere anaˈe mai ratou, a haamau ai te taata atoa i to ˈna terono, i te tomoraa i te mau uputa i Ierusalema, e i nia atoa i te mau patu e ati noa ˈˈe, e i nia atoa i te mau oire o Iuda. 16 Na ˈu e tuu atu i ta ˈu parau ia ratou, no ta ratou mau parau ino ra; ua faarue hoi ratou ia ˈu, e ua tutui i te mea noˈanoˈa i te mau atua ěê, e ua haamori i te ohipa a to ratou rima i rave.

17 E tena na, e tatia na oe i to tauupu, a tia, a parau atu oe ia ratou i ta ˈu e faaue atu ia oe na; eiaha oe e taiâ i to ratou mata, o te vaiiho noa ˈtu vau ia oe ia maheahea ia ratou. 18 Inaha, ua faarirohia oe e au i nauanei mai te oire faaetaetahia ra, mai te pou auri, e mai te patu veo, i teie atoa nei fenua; e te mau arii atoa o Iuda, e te pǔpǔ arii atoa ra; e to ˈna atoa ra feia tahuˈa, e te mau taata atoa o te fenua na: 19 e tamaˈi mai hoi ratou ia oe, e ore râ e tupu; ei pihai atoa iho vau ia oe ei faaora ia oe, te parau maira Iehova.