Isaia
E RAHI TO TE EKALESIA I Ǒ TE ETENE.
54 A umere i te oaoa, e te ui, aore i fanau e; ia puroro noa to oe pii ma te oa, e ia ouˈauˈa noa, e tei ore i mauiui i te tamarii e; ua rahi hoi ta te ivi ra tamarii i ta te tara tane ra, te na reira maira Iehova. 2 A faaatea na i to tiaraa tiahapa; e hopoi i te paruru o to parahiraa i te atea ê: eiaha e faaherehere; e haamaoro i to mau taura, e haamau etaeta i to mau tîtî. 3 E tupu hoi oe i te rahi, i te pae atau, e te pae aui; e parahihia te mau fenua e o to oe ra huaai; e taatahia te mau oire pau ra ia ratou. 4 Eiaha e mǎtaˈu; e ore hoi oe e haama; eiaha e haama; e ore hoi oe e faainohia: e moe hoi ia oe to haama i te apîraa ra; e te faaino i to iviraa ra, e ore ïa oe e manaˈo faahou i te reira. 5 O tei hamani hoi ia oe ra, o to tane ïa, o Iehova sabaota ra to ˈna iˈoa; e o tei faaora hoi ia oe ra, o Tei Moˈa ïa i Iseraela nei, o te Atua no te mau fenua atoa nei to ˈna iˈoa.
6 Mai te vahine faaruehia, e ua oto to ˈna aau, o to Iehova ïa faahoˈiraa mai ia oe ra; e mai te vahine i faaipoipo-apî-hia, e faaruehia ihora, te na reira maira to Atua ra. 7 E amoraa mata iti nei to ˈu faarueraa ia oe; e faahoˈi mai râ vau ia oe ma te aroha rahi: 8 i te riri iti poto i purou ai au i tau mata ia oe, ei aroha mure ore râ to ˈu aroha ia oe, te na reira maira te Faaora ia oe, o Iehova. 9 Mai tei te anotau ia Noa ra, o ta ˈu ïa e rave i teie nei: mai ta ˈu hoi i tǎpǔ i te pape ia Noa ra e ore e nina-faahou-hia te fenua: oia atoa ta ˈu i tǎpǔ ia oe ra e e ore au e riri faahou, e ore hoi e aˈo ia oe na. 10 E taa ê hoi te mau mouˈa, e huritumuhia hoi te mau aivi; e ore râ tau hamani maitai ia oe e taa ê, e te faufaa hau na ˈu ra, e ore ïa e huritumuhia, te na reira maira tei aroha hua mai ia oe ra, o Iehova.
11 E tei roohia, e te ati e, e te tairihia e te vero, e aore e mahanahana! inaha, e haamau vau i ta oe ra mau ofai i te pua unauna, e to oe ra mau niu i te saphira; 12 ei kadakada ta oe mau aua aputaputa ia hamani au, e to oe ra mau uputa, ei akade ïa; e to oe ra mau patu otia, ei ofai maitatai ïa. 13 E te mau tamarii atoa na oe ra, e haapiihia ïa e Iehova, e e hau rahi to te mau tamarii na oe ra. 14 E haapapuhia oe i te parau-tia: ei te atea ê te hamani ino, e ore oe e mǎtaˈu i te reira; ei te atea ê hoi te mǎtaˈu; e ore ïa e faafatata mai ia oe ra. 15 Inaha, e putuputu mai hoi ratou, e ere râ ia ˈu nei; e o tei putuputu mai e mârô ia oe ra, e hiˈa ïa ia oe. 16 Inaha hoi te tiapai auri ra, na ˈu ïa i hamani, o tei puhipuhi i te arahu e ama aˈera, e ua hamani ihora i te mauhaa i ta ˈna iho ohipa; e na ˈu hoi i hamani i te haapau ra ia pau.
17 Te mauhaa ra no oe i hamanihia ˈi ra, e ore ïa e tupu; e te mau vaha atoa e patoi ia oe i te haavaraa ra, e hapa ïa ia oe. O te tufaa teie o te mau tavini o Iehova; e tei ia ˈu te faatia ia ratou, te na reira maira Iehova.