Isaia
TE PAURAA O TE MAU ENEMI NO TE EKALESIA.
34 E haafatata mai, e te mau fenua, e faaroo mai; e haapao mai ia ˈu, e te mau taata e: ia faaroo mai te fenua, ma te î atoa ra; te ao atoa, e tei tupu atoa i reira. 2 Te vai nei hoi te riri o Iehova i nia i te mau fenua atoa, e to ˈna ooo tei nia i to ratou atoa ra mau nuu; ua faataahia ratou e ana, ua horoahia ratou no te pohe. 3 E to ratou i pohe ra, e faarue-noa-hia ïa; e pee te hauˈa ino i nia i to ratou mau tino, e horohia te mouˈa i to ratou toto. 4 E mou paatoa to te raˈi atoa ra; e e otarohia te raˈi mai te parau e otarohia ra: e mairi to ratou atoa ra, mai te rau vine ia oriorio ra, e mai te suke ai ore no nia i te suke ra. 5 Ua taero tau ˈoˈe i nia i te raˈi; e inaha, e tae mai ïa i raro i nia ia Edoma; i nia i te feia i faataahia e au no te pohe. 6 Ua fiu te ˈoˈe o Iehova i te toto; ua î i te toâhua: i te toto fanauˈa mamoe, e te puaaniho; i te toâhua i te taha aoao o te mamoe oni ra: e tusia hoi ta Iehova i Bozara, e te patiaraa puaa e rave rahi i te fenua ra i Edoma. 7 E te reema i te mairi-atoa-raa-ratou atoa ra e te mau puaatoro patehe, e te mau puaatoro pae atoa: e taero to ratou fenua i taua toto ra: e ǐî hoi te repo o to ratou fenua i te meˈi. 8 O te mahana faaiteraa riri hoi te reira na Iehova; te matahiti tahooraa ïa no te tia ia Ziona. 9 E riro ta ˈna ra mau pape tahe ei tapau, e te repo e riro ei gopheri, e riro hoi to ˈna fenua ei tapau ura ra. 10 E ore roa e tinaihia i te rui e te ao; e tia to ˈna au auahi i te peeraa i nia e a muri noa ˈtu; e tia oia i te vai-ano-noa-raa i te mau ui atoa ra, e ore e haerehia e te taata e a muri noa ˈtu. 11 O te kata râ e te kephoda te parahi i reira, e te inesupha e te oreba te noho i o ˈna ra: e tatai oia i te leni pau na nia ia ˈna ra, e ua tuu hoi i te tapao o te ano i reira. 12 E te feia rarahi i o ˈna ra, aore ïa, ia parau atu ratou ei tavana i nia ia ratou ra; e te hui arii i o ˈna ra, e riro ïa i te ore roa. 13 E tupuhia to ˈna mau fare arii i te raau taratara; e te iriaeo e te tataramoa, i roto i to ˈna ra mau pare; e riro hoi oia ei parahiraa no te teni; e ei hezere no te mau tamahine o te ione ra. 14 E rave rahi te mea taehae o te aru e te mea taehae o te motu e farerei i reira, e pii hoi te sairima i te hoa i reira; ei reira atoa te taehae o te rui e tau ai, noaa ihora to ˈna faaearaa i reira. 15 Ei reira hoi te ophi oˈua e ofaa ˈi, a fanau ai i to ˈna huero; a ahi ai, a haaputu ai i to ˈna fanauˈa i raro aˈe i to ˈna mǎrǔ; e riro atoa te mau die ra i te putuputu i reira; a tataipiti ai ratou atoa e ati noa ˈˈe.
16 Imi maitai na outou i te buka na Iehova, e taio maite: e ore roa te hoê o teie e moe ê; e ore roa te hoê ufa e ere i te apiti ia ˈna; na te vaha o Iehova hoi i parau mai, e na to ˈna iho varua i haaputu ia ratou. 17 Ua haamairi hoi oia i te kelero no ratou, e na tana rima hoi i tataura i ta ratou tufaa: e parahi tamau hoi ratou i te fenua; e hope te mau ui atoa ia ratou i te parahiraa.