Isaia

E HAAMAITAI TE FEIA FAAROO I TE ATUA.

12 Ia tae i taua mahana ra e parau ai oe e, E haamaitai au ia oe, e Iehova; riro noa mai hoi oe ia ˈu ra, ua faatioi-ê-hia ra to oe riri, e ua haamahanahana mai oe ia ˈu. 2 Inaha! ua riro mai te Atua ei ora no ˈu; e tiaturi au, e ore au e mǎtaˈu: o to ˈu hoi ïa puai, e o to ˈu ïa arueraa, o te Fatu ra, o Iehova, e ua riro mai oia ei ora no ˈu. 3 E e huti outou i te pape ma te oaoa no te tumu o te pape ora ra; 4 ei te reira mahana outou e parau ai e, Haamaitai outou ia Iehova; e tiaoro atu i to ˈna iˈoa; e faaite i te taata i ta ˈna mau ravea puai; e faaite outou i te teitei o to ˈna ra iˈoa. 5 E himene outou ia Iehova, i te mau ravea maitai hau ê na ˈna ra. Ua faaite-paatoa-hia te reira i te fenua atoa ra. 6 E pii hua, e umere ma te oaoa, e te parahi i Ziona ra e; te rahi ra hoi Tei Moˈa i Iseraela nei i rotopu ia oe ra.