Maseli

E PARAU NO TE PAIETI ORE, E NO TE HAAPAO MAITAI.

28 Te horo noa ra te paieti ore, aore e taata i te auau mai; mai te liona ra te feia parau-tia i te mǎtaˈu ore. 2 E orure hau tei taua fenua ra e rave rahi to ˈna arii; ei taata haapao maitai râ, papu atura ïa i te haapaoraa mau. 3 E tavana veve tei hamani ino i te taata rii ra, e au ïa i te vero rahi aore e maa toe ra. 4 Te feia i faarue i te ture ra, ua haamaitai ïa i te paieti ore; o tei haapao râ i te ture ra, ua patoi ïa ia ratou. 5 E ore te haapao atâ e haapao i te mea tia ra; o te feia râ i imi ia Iehova ra, e haapao ïa i te mau mea atoa ra. 6 E maitai to te taata haehaa haapaoraa tia ra, i tei piˈo to ˈna haerea, rahi noa ˈtu ai te taoˈa. 7 O tei haapao i te ture ra, e tamaiti paari ïa; o te taua râ no te puhura ra, ua faaino ïa i tana metua tane. 8 O tei faarahi i ta ˈna taoˈa i te tarahu tia ore e te hamani ino ia vetahi ê, ua faarahi oia na te hamani maitai i te taata rii. 9 O tei fariu ê i to ˈna tariˈa eiaha ia ite i te ture, e riro ta ˈna pure ei mea faufau. 10 O tei haapiˈo ê i te taata parau-tia ra ia haere na te eˈa ino ra, oia hoi te hiˈa i roto i tana iho apoo; o te maitai râ tei noaa i te taata haerea tia ra. 11 Te paari ra te taata taoˈa i to ˈna ihora manaˈoraa; te imi-hua-hia ra râ oia e te taata haehaa paari ra. 12 Ua oaoa anaˈe te feia parau-tia ra, ua maitai roa ïa; ua teitei anaˈe te paieti ore ra, ua tapuni te taata. 13 O tei tapoˈi i ta ˈna hara, e ore ïa e maitai; o tei faˈi râ e ua faarue, e arohahia ïa. 14 E ao to te taata e ore e faaea i te mǎtaˈu ra; o te faaetaeta râ i tana aau, e roohia ïa e te ino. 15 Mai te liona uuru ra e te daba pohe poia ra, oia te tavana haapao atâ i nia te taata rii. 16 O te arii haapao ore ra, e hamani ino rahi ïa; o tei ore râ e nounou i te taoˈa ra, e maoro ïa o ˈna pue mahana. 17 O te taata teiaha i te toto na ˈna i haamanii ra, te horo ra ïa i te apoo, eiaha e haruhia mai e te taata. 18 O tei haere ma te piˈo ore ra, e ora ïa; o tei haapiˈo râ i tana haerea, e mairi noa ˈtu ïa i roto i te apoo. 19 O tei faaapu i to ˈna fenua, e maa ïa ta ˈna; o tei pee haere ra i te faatau ra, e pohe ïa i te poia. 20 O te taata haavare ore ra te rahi ra to ˈna maitai; o tei ru râ i te haaputu i ta ˈna taoˈa ia rahi eita e ore te hara. 21 Ia haapao i te huru o te taata i te haavaraa, e ere ïa i te mea maitai; hoê nei maamaa iti ia hopoi atu i te reira taata e hara ïa oia. 22 Te taata mata nounou taoˈa ra, te ru ra ïa ia rahi te taoˈa; aita râ oia i ite, e roohia mai oia e te veve. 23 O tei avau atu i te taata ra e itehia mai â oia i muri aˈe, i tei haapaia ˈtu to ˈna arero ia ˈna. 24 O tei eiâ i ta te metua tane e ta te metua vahine, a parau ai e, E ere i te hara, e au oia ia amui i te feia taparahi taata ra. 25 Te taata aau teoteo ra ua faatupu oia i te avau; o tei tiaturi râ ia Iehova e haaporiahia ïa. 26 O tei tiaturi i to ˈna iho aau, e maamaa ïa; o tei haapaari maite râ i to ˈna haerea, e ora ïa i te reira. 27 O tei horoa i te taata rii ra eita oia e ere; o tei ore râ e haapao ia ratou ra e rahi te katara e iri i nia ia ˈna. 28 Ia faateiteihia te feia paieti ore, te tapuni nei te taata; ia pohe râ ratou ra, te rahi ra te feia parau-tia.