Salamo

E PURE IA MAITAI TE EKALESIA RA.

Himene e Salamo na Asapha.

83 Eiaha oe e mamû noa, e te Atua e; eiaha oe, e te Atua, e parahi noa ma te parau ore. 2 Inaha hoi! te auě nei te mau enemi, e te feia i riri mai ia oe ra, te teitei nei ïa te upoo. 3 Te imi ra ratou i te ravea paari i to oe ra mau taata, te feruri nei ratou atoa i te feia i moe ia oe ra. 4 Te na ô ra ratou, Haere mai, tatou e tâpû ê atu, eiaha ia riro ei fenua; eiaha te iˈoa ra o Iseraela ia manaˈo-faahou-hia ˈtu. 5 Ua amui tahi noa ta ratou ra parauraa: ua tahoê noa ta ratou parau ia oe: 6 te mau tiahapa o Edoma, e te ati Isemaela, to Moabi, e to Hagara, 7 to Gebala, to Amona, e to Amaleka, to Philiseti, e to Turia atoa ra. 8 Ua amui atoa Asura ia ratou, e ua riro ei rima no te mau tamarii a Lota ra. Sela.

9 Na reira oe ia ratou mai ta oe i rave ia Midiana; e ia Sisera e ia Iabina i te pape ra ia kisona. 10 Pohe ihora hoi ratou i Ene-dora, riro atura ei para no te fenua. 11 E faariro i to ratou feia rarahi mai ia Oreba e mai ia Zeeba, e to ratou mau arii atoa mai ia Zeba e mai ia Zalamuna: 12 ua parau hoi ratou e; Tatou e haru i te mau parahiraa o te Atua no tatou iho. 13 Faariro oe ia ratou, e tau Atua, mai te ota ra, e mai te aihere i te aro o te mataˈi ra. 14 Mai te uru raau e pau i te auahi ra, e mai te mau mouˈa e ura i te auahi ura ra: 15 na reira oe i te auau ia ratou i te vero no oe ra, e ia haapeapeahia ratou i te puahiohio no oe ra. 16 E tapoˈi i to ratou mata i te haama, ia imi ratou i to oe ra iˈoa, e Iehova: 17 ia haama ratou e ia maheahea e a muri noa ˈtu! ia tapoˈihia ratou e te hepohepo e pohe atu! 18 Ia ite te taata atoa e, o Iehova to oe iˈoa, e o oe anaˈe tei Teitei i te fenua atoa nei.